ᤔᤠᤱᤛᤣᤒᤢᤱ
ᤁᤥᤛᤡ ᤂᤠᤶᤄᤢ ᤜᤠᤱᤕᤢᤰᤗᤧ ᤏᤧᤐᤠᤗᤡ ᤛᤠᤵᤐᤠᤏ᤻ ᤏᤢ ᤁᤢᤕᤥ᤹ ᥇᥉ ᤛᤠᤵᤐᤠᤏ᤻ᤜᤠ᤹ ᤁᤥᤛᤡᤒᤠ ᤜᤠᤱᤛᤜᤠᤱᤕᤢᤰᤁᤡᤒᤠ ᤕᤠᤶᤈᤥᤒᤠ ᤛᤠᤵᤐᤠᤏ᤻ᤖᤧ ᤏᤠᤘᤠᤀᤥ ᤌᤣᤛᤣᤁ᤻ᤖᤥ ᥈᥋ ᤕᤧᤴᤎᤣᤀᤠᤱᤎᤥ ᤕᤠᤔ᤻ᤈᤥᤁ᤻ᤁᤥ᤹ ᤋᤠᤐ᤻ᤔᤠᤖᤧ ᤀᤡᤱᤓᤴ ᤆᤥᤃᤢᤀᤠᤱ ᤘᤠ ॥ ᤗᤠᤈᤣ᤹ᤔᤡᤱᤛᤥ ᤔᤧᤶᤔᤠ ᤔᤠᤌᤠᤁᤢ ᤑᤠᤸᤃᤢᤏᤴᤍ ᤗᤡᤱᤍᤧᤴ ᤛᤠᤘᤠᤏ᤻ ᤋᤱᤏᤠᤶᤖᤧ ᤛᤢᤕᤧᤶᤔᤥ ᤕᤢᤰᤑᤥ ᤋᤢᤶᤋᤢᤶᤔᤩᤠᤜᤠᤱ ᤜᤡᤰᤔᤋ᤻ ᤁᤢᤔᤠᤖ᤻ ᤁᤠᤖ᤻ᤁᤡᤖᤧ ᤁᤢᤃᤥ ᤌᤡᤶᤔᤥᤀᤣ ᤕᤠᤔ᤻ᤈᤥᤐᤠ ᤆᤥᤁ᤻ᤔᤠᤖᤧ ᤀᤡᤱᤓᤴ ᤛᤠᤵᤐᤡ ᤕᤠᤔ᤻ᤈᤥᤁ᤻ᤁᤥ᤹ ᤋᤩᤠᤒᤠ ᤐᤠᤋᤢᤀᤠᤱ ᤘᤠ ॥

ᤑᤠᤱᤏᤠᤶᤓᤣᤖᤧ ᤋᤱᤈᤢᤶ ᤁᤢᤀᤡᤛᤡᤰ ᤛᤠᤵᤐᤠᤏ᤻ ᤀᤠᤕᤥᤃ ᤗᤠᤶᤒᤠ ᤁᤥᤛᤡ ᤂᤠᤶᤄᤢᤀᤥ ᤔᤤᤌᤡᤗᤡ ᤏᤢ ᤕᤠᤰᤌᤢᤱ ᤛᤠᤵᤐᤏ᤻ᤏᤡᤴ ᤜᤠᤱᤕᤢᤰᤐᤠ ᤕᤠᤔ᤻ᤈᤥᤁ᤻ᤐᤘᤠ ᤛᤠᤵᤐᤠᤏ᤻ᤖᤧ ᤏᤠᤘᤠᤀᤥ ᤀᤥᤃᤠᤵ ᤆᤥᤁ᤻ᤔᤠ ᤆᤶᤍᤡᤱ ᤆᤥᤃᤢᤀᤠᤱ ᤘᤕᤠ ॥ ᤁᤖ. ᤕᤢᤰᤑᤥᤒᤠ ᤕᤖᤡᤰ ᤂᤠᤏᤡᤴᤒᤠ ᤛᤠᤅ᤻ ᤛᤢᤘᤠᤱᤖᤧ ᤕᤁ᤻ᤘᤠᤍᤱᤅᤡᤴ. ᤛᤢᤘᤠᤱᤖᤧ ᤐᤠᤱᤏᤡᤛᤢᤶ ᤋᤠᤱᤛᤧᤐ᤻ ᤏᤢ ᤌᤥᤒᤥ ᤆᤥᤁ᤻ᤔᤠ ᤋᤠᤖᤠᤵᤗᤣ ᥇᥉ ᤛᤠᤵᤐᤏ᤻ᤜᤠ᤹ ᤕᤠᤶᤈᤥᤒᤠᤖᤧ ᤏᤠᤘᤠᤀᤥ ᤕᤥᤃᤠᤵ ᤆᤥᤁ᤻ᤔᤠ ᤁᤢᤃᤥᤌᤡᤶ ᤆᤥᤁᤡ ᤂᤠᤶᤄᤢ ᤜᤠᤱᤕᤢᤰ ᤋᤃᤡ ᤐᤥᤖᤧᤒᤠᤖᤥ ॥ ᤜᤠᤱᤕᤢᤰᤗᤧ ᤕᤢᤰᤑᤥᤒᤠ ᤛᤠᤵᤐᤠᤏ᤻ ᤏᤣᤐᤠᤗᤡ ᤀᤠᤱᤘᤣ᤹ ᤕᤢᤰᤑᤥᤀᤥ ᤕᤢᤰᤑᤥ ᤐᤠᤏ᤻ ᤖᤠᤀᤡ. ᤌᤠᤖᤢ. ᤋᤠᤔᤠᤱ. ᤔᤃᤖ. ᤒᤠᤴᤋᤠᤘᤠ. ᤀᤢᤷᤍᤢ. ᤖᤠᤈᤒᤱᤛᤡ. ᤏᤣᤐᤠᤗ ᤓᤠᤛᤠ. ᤆᤠᤶᤗᤡᤱ. ᤛᤣᤷᤐᤠ. ᤛᤴᤌᤠᤗᤡ ᤏᤢ ᤖᤠᤀᤡ ᤐᤠᤏ᤻ᤜᤠ᤹ ᤌᤡᤰᤀᤡᤜᤢᤵᤐᤥ ᤁᤢᤃᤥᤖᤧ ᤀᤡᤓᤢᤳᤋᤢᤀᤠᤱ ᤘᤠᤖᤥ ॥

ᤂᤠᤶᤄᤢ ᤋᤢᤶᤒᤠᤖᤧ ᤛᤜᤠᤱᤕᤢᤰᤗᤧ ᤁᤣᤒᤣᤁ᤻ᤐᤠ ᥇᥇ ᤏᤠᤶᤗᤣ ᤕᤠᤶᤔᤠ ᤂᤠᤶᤄᤢ ᤜᤠᤱᤕᤢᤰᤐᤠ ᤕᤠᤶᤈᤥᤒᤠᤖᤧ ᤛᤠᤵᤐᤠᤏ᤻ ᤁᤠ᤹ᤀᤡᤒᤠ ᤋᤱᤃᤠᤶ ᤆᤥᤁ᤻ᤔᤠᤖᤧ ᤑᤠ᤹ᤀᤠᤱ ᤁᤧᤒᤥᤅ᤻ᤒᤠ ᤀᤣᤏ᤻ ᤛᤰᤂᤣᤍᤡᤱ ᤆᤥᤁᤡ ᤂᤧᤴ ᤕᤠᤶᤈᤥᤀᤡᤴ ᤁᤢᤗᤠᤶ ᤜᤴᤍᤧᤒᤠᤖᤥ ॥
ᤂᤠᤶᤄᤢ ᤜᤠᤱᤕᤢᤰᤗᤧ ᤋᤱᤒᤣᤌᤵᤔᤠ ᤕᤢᤰᤑᤥ ᤛᤠᤵᤐᤠᤏ᤻ ᤋᤱᤏᤠᤶ ᤋᤥᤔᤠᤖᤧ ᤑᤠ᤹ᤀᤠᤱ ᤀᤡᤱᤓᤴ ᤆᤥᤁᤡ ᤒᤡᤎᤣᤕᤁ ᤋᤠᤱᤛᤧᤐ᤻. ᤌᤥᤒᤥ ᤏᤢ ᤑᤥᤒᤥᤖᤧ ᤁᤢᤕᤥ ᤐᤠᤏ᤻ ᤘᤠ ॥ ᤁᤸᤗᤧ ᤂᤠᤶᤄᤢᤒᤠ ᤕᤁ᤻ᤐᤠᤏ᤻ᤏᤡᤒᤠ ᤐᤠᤱᤅᤣᤏᤡᤛᤢᤶ ᤆᤢᤶᤓᤥᤍᤡᤱᤒᤠ ᤆᤥᤁᤡ ᤕᤁ᤻ᤘᤠᤍᤱ ᤗᤢᤶᤔᤥ ᤌᤡᤰᤀᤡᤜᤢᤵ ᤁᤢᤕᤥ᤹ ᤌᤢᤶᤔᤢᤰᤐᤥ ᤆᤥᤃᤢᤒᤠ ᤏᤛᤠᤏ᤻ ᤘᤠ ॥

ᤂᤠᤶᤄᤢ ᤋᤢᤶᤋᤢᤔᤩᤠᤜᤠᤱ ᤁᤠᤷᤁᤡᤖᤧ ᤋᤥᤏ᤻ᤍᤢᤒᤠ ᤏᤥᤏᤡᤱᤘᤠ ᤙᤰᤀᤥ ᤂᤠᤶᤄᤢ ᤜᤠᤱᤕᤢᤰ ᤕᤠᤶᤈᤥᤒᤠ ᤛᤠᤵᤐᤠᤏ᤻ᤖᤧ ᤁᤠ᤹ᤀᤡᤀᤥ ᤋᤱᤃᤠᤶ ᤕᤠᤔ᤻ᤈᤥᤁ᤻ ᤋᤠᤔᤠ ᤁᤥᤛᤡ ᤂᤠᤶᤄᤢᤒᤠ ᤑᤠ᤹ᤀᤠᤱ ᤕᤁ᤻ᤔᤧᤗᤢᤱᤒᤠ ᤐᤥᤂᤠᤒᤠ ᤛᤠᤵᤐᤣ ᤘᤠ ॥ ᤁᤸᤗᤧ ᤂᤠᤶᤄᤢᤀᤥ ᤁᤧᤘᤠᤒᤠ ᤕᤖᤡᤰ ᤛᤠᤵᤐᤠᤏ᤻. ᤛᤠᤰᤌᤡᤶ ᤏᤢ ᤛᤢᤘᤠᤱᤒᤠ ᤐᤠᤱᤏᤡᤛᤢᤶ ᤏᤠᤈᤶ ᤆᤥᤁᤡ ᤘᤁ᤻ᤘᤠᤍᤱᤅᤡᤴ ᤌᤡᤰᤜᤢᤵᤀᤥ ᤀᤡᤄᤣᤅ᤻ᤔᤠᤀᤠᤱ ᤋᤃᤡ ᤐᤥᤔᤠᤕᤠᤏ᤻ᤒᤠ ᤛᤠᤵᤐᤣ ᤘᤠ ॥ ᤂᤠᤶᤄᤢ ᤋᤢᤶᤋᤢᤔᤩᤠᤜᤠᤱ ᤁᤠᤷᤁᤡᤖᤧ ᤁᤥᤛᤡ ᤂᤠᤶᤄᤢᤒᤠ ᤜᤠᤱᤕᤢᤰᤁᤥ ᤁᤧᤖᤧᤰ ᤌᤠᤁ᤻ᤕᤢᤌᤡᤶ. ᤛᤠᤰᤌᤡᤶ. ᤙᤰᤙᤰ ᤏᤢ ᤛᤠᤵᤐᤠᤏ᤻ ᤋᤠᤱᤛᤧᤐ᤻ ᤆᤥᤁᤡ ᤁᤧᤖᤧᤰ ᤛᤅ᤻ ᤛᤢᤘᤠᤱᤖᤧᤴ ᤐᤠᤱᤏᤡᤛᤢᤶ ᤕᤢᤰᤛᤡᤱ ᤆᤥᤁ᤻ᤔᤠᤀᤥ ᤂᤠᤶᤄᤢᤖᤧ ᤛᤡ᤹ᤖᤢᤒᤠ ᤏᤢ ᤕᤠᤏ᤻ᤍᤢᤒᤠ ᤌᤠᤖᤡᤰ ᤁᤢᤈᤥᤁ᤻ ᤆᤥᤃᤢᤒᤠ ᤐᤠᤏ᤻ ᤐᤠᤏᤢᤀᤠᤱ ᤘᤠ ॥

