ᤆᤧᤖᤧᤱᤏᤠᤶ ᥈᥉ ᤔᤠᤱᤛᤣᤒᤢᤱ/ ᤋᤠᤵᤗᤣᤈᤢᤱᤒᤠ ᤛᤡᤍᤡᤱᤒᤠ ᤐᤠᤱᤓᤣ᤹ᤗᤢᤅ ᤗᤡᤶᤒᤢᤍᤡᤶ ᤆᤡᤋᤣᤪ ᤁᤠᤣᤁ᤻ᤔᤠᤀᤠᤣ ᤁᤡᤖᤠᤋ᤻ ᤛᤠᤶᤕᤠᤣᤀᤠᤣ ᤛᤡᤁ᤻ᤔᤧᤴᤇᤢᤰ ᤕᤁ᤻ ᤕᤠᤔ᤻ᤒᤰ ᤑᤠᤣᤛᤠᤒᤠ ᤛᤱᤈᤢᤶᤔᤡᤒᤠ ᤛᤠᤱᤍᤠᤱᤃᤧᤏ ᤘᤠᤖᤢᤶᤛᤠᤒᤠ ᤛᤠᤱᤃᤠᤪᤶᤒᤠ ᤋᤠᤣᤐ᤻ᤜᤠᤱ ᤗᤡᤱᤍᤧᤴᤖᤧ ᤆᤀᤡᤋ᤻ᤗᤢᤅ ᤛᤢᤏᤠᤜᤴ ᤐᤠᤣᤂᤠᤀᤠᤱ ᤘᤠ᤹ ॥
ᤁᤢᤖᤢᤰᤐᤠ ᤕᤧᤴᤎᤣᤗ᤻ᤗᤧ ᤁᤡᤖᤠᤋ᤻ ᤛᤠᤶᤕᤠᤣᤌᤠᤁᤢ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤀᤠᤳᤔᤠᤏᤴᤍ ᤛᤣᤀᤡᤱ ᤛᤠᤣᤖᤡᤰ ᤔᤢᤜᤡᤅᤅ᤻ᤃᤢᤶ ᤀᤱᤛᤡᤔᤠᤔᤠᤱ ᤛᤠᤔ᤻ᤒᤠ ᤐᤒᤡᤋᤪᤜᤠᤱᤔᤠ ᤗᤡᤱᤍᤧᤴᤛᤡᤖᤧ ᤛᤠᤱᤃᤠᤪᤶᤒᤠ ᤋᤠᤣᤐ᤻ᤜᤠᤱ ᤗᤡᤱᤍᤧᤴᤖᤧ ᤆᤀᤡᤋ᤻ᤗᤢᤱ ᤛᤢᤏᤠᤜᤴ ᤆᤠᤣᤃᤧᤳᤇᤢᤀᤠᤱ ᤘᤠᤕᤠ ॥ ᤆᤀᤡᤋ᤻ᤗᤢᤅ ᤛᤢᤏᤠᤜᤴ ᤆᤠᤣᤁ᤻ᤛᤣ ᤛᤠᤶᤕᤠᤣ ᤌᤠᤁᤢ-ᤌᤠᤁᤢᤔᤠ ᤑᤧᤗᤠᤎᤠᤗᤶᤒᤠ ᤐᤣᤃᤧᤳᤇᤡᤀᤠᤱ ᤘᤕᤠ ॥ ᤐᤠᤜᤧᤴ ᤐᤠᤏᤠᤣᤒᤠ ᤛᤢᤕᤧᤶᤔᤠᤣ ᤛᤠᤶᤕᤠᤣ ᤌᤠᤁᤢᤗᤠᤶᤒᤠ ᤔᤢ᤹ᤀᤡᤐᤠᤏ᤻ ᤀᤠᤱ ᤌᤠᤛᤢᤀᤠᤱ ᤘᤕᤠ ॥
ᤛᤡᤍᤡᤱᤒᤠ ᤐᤠᤱᤓᤣ᤹ᤗᤢᤅ ᤌᤠᤣᤛᤢᤍᤡᤶᤒᤠ ᤔᤠᤏᤒᤜᤠᤍᤢᤖ ᤖᤠᤀᤡ ᤋᤢᤶᤋᤖᤣᤒᤠ ᤘᤕᤧᤒᤠ ᤌᤡᤶᤒᤣ᤹ᤀᤠᤣ ᤛᤡᤍᤡᤱᤒᤠ ᤐᤠᤱᤓᤣ᤹ᤗᤢᤱᤒᤠ ᥍ ᤀᤣ ᤕᤰᤗᤰᤐᤠ ᤌᤠᤣᤛᤢᤍᤡᤶᤒᤠ ᤏᤢ ᤋᤃᤡᤒᤠ ᤌᤠᤣᤛᤢᤍᤡᤶᤒᤠ ᤹ ᤑᤠ᤹-ᤌᤠᤣᤛᤢᤍᤡᤶᤒᤠᤀᤠᤱ ᤋᤧᤩᤛᤡᤀᤠᤱ ᤘᤕᤠ ॥
ᤋᤠᤣᤐ᤻ᤜᤠᤱ ᤗᤡᤱᤍᤧᤴᤏᤡᤴ ᤒᤡᤁᤪᤶ ᤋᤱᤒᤣ ᥈᥆᥍᥊ ᤋᤱᤒᤣᤖᤧ ᤛᤡᤴᤆᤣᤀᤡ ᤑᤰᤋᤠᤱᤗᤢ ᤛᤠᤶᤕᤠᤣᤀᤡᤒᤠ ᤋᤠᤰᤁᤴᤇᤧ ᤐᤣᤃᤠᤖ ᤐᤋᤇᤠ᤹ᤸᤗᤧ ᤀᤠᤸᤗᤠᤣᤒᤠ ᤛᤡᤍᤡᤱᤒᤠ ᤐᤠᤱᤓᤣ᤹ᤗᤢᤱᤒᤠ ᤗᤡᤶᤒᤢᤍᤡᤴ ᤆᤡᤋᤪᤣ ᤁᤠᤣᤁ᤻ᤔᤠ ᤁᤢᤓᤣᤛᤠᤱ ᤐᤠᤱᤓᤣ᤹ᤒᤠ ᤁᤠ᤹ᤀᤡᤒᤠᤏᤢ ᤋᤠ᤹ᤈᤧᤱᤅᤡ ᥈᥆᥍᥊ ᤛᤡᤛᤣᤁ᤻ᤖᤠᤣ ᥌ ᤏᤠᤶᤗᤧ ᤕᤠᤶᤔᤠ ᤔᤠᤛᤡᤱ ᤐᤠᤣᤂᤠᤀᤠᤱ ᤘᤕᤠ ॥ ᤜᤢᤏᤧ᤹ ᤔᤠᤛᤡᤱᤒᤠ ᤋᤧᤴᤀᤠᤣ ᤗᤡᤱᤃᤧᤴ ᤁᤢᤍᤡᤶᤒᤠ ᤆᤀᤡᤳᤗᤢᤅ ᤕᤢᤱᤛᤡᤱᤅᤠᤱ ᤕᤢᤱ ॥
ᤋᤠᤣᤐ᤻ᤜᤠᤱ ᤗᤡᤱᤍᤧᤴᤖᤧ ᤆᤢᤰᤔᤢᤰᤁᤠᤣ ᤏᤡᤛᤢᤶ
ᤛᤠᤘᤠᤏ᤻ – ᥈᥆᥆᥆ ᤁᤁ᤻ᤑᤧᤰᤘᤠ ᥈ ᤏᤠᤶ ᤛᤧᤴᤇᤧᤪᤱᤒᤠ ᤋᤃᤡᤒᤠ (ᤈᤡᤋ᤻ᤐᤢᤖ ᥎, ᤐᤠᤖᤡᤃᤠᤀᤢ, ᤀᤡᤗᤠᤶ) ᤔᤠᤛᤡᤱᤒᤠ – ᥈᥆᥍᥊ ᤛᤡᤛᤣᤁ᤻ᤖᤠᤣ ᥌ ᤛᤧᤴᤇᤧᤪᤱᤒᤠ ( ᤛᤡᤍᤡᤱᤒᤠ ᥋, ᤆᤡᤋᤪᤧᤁᤠᤣᤁ᤻ᤔᤠ , ᤋᤠᤵᤗᤣᤈᤢᤱ) ᤁᤷᤏᤛᤡᤱᤖᤧ ᤛᤖᤢᤶᤒᤠ ᤛᤠ᤺ ᤁᤇᤠᤷᤖᤠᤛ ᤏᤢ ᤑᤡᤐᤖᤠᤏᤡ ᤀᤠᤣᤍᤠᤣᤔᤠᤖᤧ ᤛᤢᤶᤒᤠ ᤛᤠ᤺ᤖᤧ ᤏᤠᤘᤠᤀᤠᤣ ᤋᤠᤣᤐ᤻ᤜᤠᤱ ᤗᤡᤱᤍᤧᤴ ᤛᤠᤘᤠᤏ᤻ ᤐᤠᤣᤂᤠᤀᤠᤱ ᤘᤕᤠ ॥ ᤛᤠᤘᤠᤏ᤻ ᤐᤠᤣᤂ᤻ᤒᤠ ᤋᤧᤴᤏᤡᤴ ᤀᤠᤸᤗᤠᤣ ᤍᤣᤀᤢᤔᤠᤀᤡ ᤐᤠᤱᤕᤰᤗᤢᤱ -᥏, ᤀᤡᤗᤠᤶᤖᤠᤣ ॥
ᤔᤣᤂᤡᤶ ᤏᤢ ᤜᤡᤶᤛᤕᤅ᤻
ᤎᤢᤛᤣᤏᤡ ᤀᤡᤗᤠᤶᤒᤠ ᤈᤡᤋ᤻ᤒᤠᤍᤢᤖ ᤑᤡᤕᤠᤁ᤻ ᤏᤢ ᤁᤠᤀᤡᤗᤡᤔᤠᤕᤠ ᤆᤠᤶᤗᤡᤱᤖᤧ ᤀᤣᤔᤠᤛᤠ ᤁᤠᤤᤛᤡᤗᤠ ᤏᤢ ᤋᤱᤒᤣ ᥈᥆᥇᥎ ᤀᤠᤣ ᤔᤣᤂᤡᤶ ᤐᤠᤣᤅ᤻ᤅᤡ ᥋, ᤕᤠᤶᤒᤡᤇᤠ᤹ᤛᤠ᤺ ( ᤒᤡᤖᤜᤠᤱ,ᤀᤶᤒᤖ, ᤛᤠᤈᤏ, ᤛᤖᤠᤣᤈ, ᤏᤢ ᤛᤴᤍᤣᤛ ) ᤏᤢ ᤔᤧᤴᤇᤢᤔᤠ ᤛᤠ᤺ (ᤐᤒᤡᤋᤠᤪ, ᤀᤔᤡᤪᤋᤠ, ᤓᤡᤶᤔᤠᤕᤠ, ᤖᤴᤈᤏᤠ, ᤁᤔᤗᤠ ᤏᤢ ᤐᤢᤏᤶ ᤗᤡᤱᤍᤧᤴ)ᤖᤧ ᤁᤢᤶᤒᤠ ᤐᤠᤣᤂᤠ
ᤜᤠᤱᤌᤡᤶᤈᤠᤣᤁ᤻
᥈᥆᥉᥌ ᤋᤱᤒᤣᤸᤗᤧ ᤈᤏᤔᤋ ᤛᤱᤃᤪᤜ ᤒᤜᤢᤍᤗ ᤗᤠᤶᤒᤠ ᤀᤡᤱᤛᤧ ᤆᤢᤶᤓᤠᤣᤒᤠ ᤐᤠᤛᤡᤱ ᤐᤠᤣᤅ᤻ᤡ ᤜᤠᤱᤌᤡᤶᤈᤠᤣᤁ᤻ᤀᤠᤣ ᤗᤠᤛᤧᤒᤠ ॥ ᤀᤡᤓᤠᤱ ᥎ ᤐᤠ ᤕᤰᤗᤰ ᤌᤠᤣᤛᤢᤍᤡᤶᤠᤒᤠ ᤐᤠᤣᤂᤠᤀᤠᤱ ᤘᤕᤠᤒᤠ ॥
ᤛᤱᤈᤢᤶᤓᤠᤣᤛᤠᤒᤠ ᤏᤢ ᤛᤠᤶᤕᤠᤣᤒᤠ ᤛᤣᤘᤠ
ᤁᤡᤖᤠᤋ᤻ ᤛᤠᤶᤕᤠᤣᤌᤠᤁᤢ ᤗᤡᤱᤍᤧᤴ ᤀᤠᤳᤔᤠᤏᤴᤍ ᤛᤣᤀᤡᤱᤗᤠᤶᤒᤠ ᥈᥆᥉᥆ ᤋᤱᤒᤣ ᤆᤧᤖᤧᤱᤏᤠᤶ ᤁᤡᤐᤋᤣᤀᤠᤣ ᤛᤠᤶᤍᤠᤱ ᤘᤠᤖᤢᤶ ᤌᤠᤛᤡᤱᤒᤠ ॥ ᤛᤠᤶᤕᤠᤣᤌᤠᤁᤢᤗᤠᤶᤒᤠ ᤌᤡᤰᤛᤡᤃᤣᤁ᤻ᤐᤠ ᥈᥆᥈᥍ ᤋᤱᤒᤣᤖᤧ ᤑᤢ᤹ᤗᤢᤱᤃᤡ ᤛᤠᤶᤕᤢᤰ (ᤃᤢᤑᤠ) ᤕᤱᤅᤠᤀᤡᤸᤗᤧ ᤋᤢᤔᤧᤇᤡᤀᤠᤱ ᤘᤕᤧᤳᤇᤡ ॥ ᤂᤧᤴ ᤕᤧᤶᤔᤠ ᤀᤡᤓᤠᤱ ᤐᤠᤱᤓᤣ᤹ ᤐᤴᤆᤠᤕᤋ᤻ᤒᤠ ᤌᤠᤣᤛᤢᤍᤡᤶᤒᤠ ᤘᤕᤠ ॥ ᤌᤠᤁᤢ ᤏᤢ ᤌᤠᤁᤢᤔᤠᤛᤡ᤹ ᤒᤢᤒ᤻᤹ᤒᤠ ᤒᤠᤖᤡᤀᤠᤣ ᤕᤢᤱᤏᤧᤳᤇᤡᤸᤗᤧ ᤕᤰᤔᤠ ᤆᤠᤣᤁ᤻ᤀᤠ ᤑᤠ᤹ᤛᤡᤅ ᤆᤠᤣᤃᤢᤀᤠᤱ ᤘᤕᤠ ॥ ᤋᤔᤠᤂᤣᤒᤠ ᥈᥆᥉᥋ ᤒᤠ ᤛᤡᤃᤠᤱᤒᤠ ᤆᤢᤶᤗᤢᤱᤅᤠᤣ᤹ ᤑᤠ᤹-ᤛᤜᤠᤱᤔᤡᤒᤠᤖᤧ ᤏᤠᤘᤠᤀᤠᤣ ᤘᤕᤠ ॥
ᤐᤠᤱᤓᤣ᤹ᤗᤠᤶᤒᤠ ᥈᥆᥉᥊ ᤀᤠᤱᤎᤠᤣ ᥉᥍ ᤋᤱᤒᤣ ᤌᤠᤖᤡᤰ ᤐᤠᤱᤅᤣ ᤔᤠᤱᤕᤢᤰᤏᤠᤒᤠ ᤆᤠ ᤑᤢᤱᤒᤠ ᤛᤢᤶᤔᤠᤖᤧ ᤗᤰᤗᤠᤣᤒᤠ ᤘᤕᤠ ॥ ᥈᥆᥊᥏ ᤀᤠᤣ ᤌᤠᤁᤢ ᤔᤠᤱᤃᤧᤴᤏᤠ ᤛᤣᤘᤠ ᤑᤠ᤹-ᤌᤠᤣᤛᤢᤍᤡᤶᤒᤠᤖᤧ ᤏᤠᤘᤠᤀᤠᤣ ᤕᤠᤔ᤻ᤒᤰ ᤆᤠᤣᤃᤠ᤹ ॥ ᤔᤠᤀᤡ ᤓᤃ᤻ᤘᤋᤡ ᤏᤡᤛᤠᤶᤜᤡᤶᤒᤠ ᤛᤜᤠᤱᤔᤡᤒᤠ ᤕᤠᤔ᤻ᤒᤰ ᥈᥆᥉᥈ ᤀᤠᤱᤎᤠᤣ ᥈᥆᥊᥍ ᤌᤠᤣᤛᤢᤍᤡᤶᤒᤠ ᤏᤢ ᤏᤡᤛᤠᤶᤜᤡᤶ ᤆᤠᤣᤁ᤻ᤔᤠ ᤕᤠᤔ᤻ᤒᤰ ᤆᤠᤣᤃᤢᤀᤠᤱ ᤘᤕᤠ ॥ ᤐᤗᤠᤛᤣ ᤁᤡᤖᤠᤋ᤻ ᤜᤠᤱᤛᤠᤶ ᤔᤠᤱᤜᤡᤶ ᤌᤠᤣᤛᤢᤍᤡᤶᤒᤠ ᥈᥆᥊᥈ ᤀᤠᤱᤎᤠᤣ ॥ ᤔᤠᤱᤜᤡᤶ ᤛᤣᤘᤠᤛᤠᤒᤠᤖᤧ ᤏᤠᤘᤠᤀᤠᤣ ᥈᥆᥊᥎ ᤀᤠᤱᤎᤠᤣ ᥎ ᤋᤱᤒᤣ ᤌᤠᤖᤡᤰ ᤆᤠᤣᤃᤢᤀᤠᤱ ᤘᤕᤠ ॥ ᤁᤡᤖᤠᤋ᤻ ᤜᤠᤱᤛᤠᤶ ᤔᤢᤈᤠᤣᤋ᤻ᤗᤢᤱ ᤔᤠᤱᤜᤡᤶ ᤆᤠᤣᤁ᤻ᤔᤠᤀᤠᤣ ᤔᤠᤱᤜᤡᤶ ᤆᤠᤣᤁ᤻ᤔᤠ ᤋᤢᤶᤒᤠ (ᤔᤡᤛ᤻ᤋᤡᤖᤡ) ᤒᤠᤜᤧᤴ ᤋᤱᤒᤣᤀᤠᤱᤎᤠᤣ ᤋᤢᤶᤛᤣᤘᤠᤛᤠᤒᤠ ᤋᤣᤈᤒᤜᤠᤍᤢᤖ ᤌᤱᤗᤅ ᤗᤠᤶᤒᤠ ᤜᤢ᤹ᤛᤡᤱᤗ ᥈᥆᥋᥍ ᤀᤠᤣ ᤔᤢᤈᤠᤣᤋ᤻ᤗᤢᤅ ᤔᤠᤱᤜᤡᤶᤒᤠ ᤋᤢᤶᤔᤠᤱᤛᤣᤘᤠᤛᤠᤒᤠ ᤕᤢᤰᤛᤡᤱ ᤐᤠᤣᤅᤡ ᥈᥆᥍᥈ ᤋᤱᤒᤣ ᤛᤧᤴᤇᤧᤪᤗᤠ ᤌᤠᤰᤖᤡᤰ ᤕᤠᤔ᤻ᤒᤰ ᤆᤠᤣᤃᤢ ॥ ᤛᤠᤶᤕᤠᤣᤌᤠᤁᤢ ᤏᤡᤛᤠᤶᤄᤠᤣ ᤑᤢ᤹ᤗᤢᤱᤃᤡᤀᤠᤣ ᥈᥆᥍᥉ ᤀᤠᤠᤱᤎᤠᤣ ᤋᤠᤱᤛᤧᤐ᤻ᤔᤠᤖᤧ ᤕᤠᤔ᤻ᤒᤰ ᤆᤠᤣᤁ᤻ᤔᤠ ᤜᤣᤁ᤻ᤋᤢᤀᤠᤱ ᤘᤕᤠ ॥
ᤁᤢᤏᤢᤶ ᤕᤧᤶᤔᤠᤣ
ᤛᤡᤱᤛᤡᤱ, ᤛᤣᤛᤣᤀᤠᤱ, ᤑᤠᤣᤏᤡᤱᤘᤠ ᤑᤠᤣᤓᤠᤣᤏᤢ ᤔᤠᤱᤛᤣᤘᤠ ᤆᤠᤣᤁ᤻ᤜᤡ ᤘᤕᤧᤸᤗᤧ ᤀᤠᤒᤠᤱᤅᤣ ᤔᤠᤛᤡᤱᤔᤠ ᤐᤠᤏ᤻ ᤋᤃᤡ ᤐᤠᤋᤢᤒᤠ ᤁᤢᤀᤡᤛᤡᤰᤁᤣ ᤐᤠᤣᤂᤧᤒᤠ ॥ ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢᤗᤠᤶᤒᤠᤏᤢ ᥈᥆᥋᥏ ᤋᤱᤒᤣᤀᤠᤣ ᤜᤡᤱᤔᤢ᤹ᤀᤡ ᤆᤰᤛᤡᤱ ᤆᤠᤣᤃᤢᤒᤠ ॥ ᤁᤡᤖᤠᤋ᤻ᤖᤣ ᤛᤣᤘᤠᤋᤠᤰᤋᤧᤴ ᤛᤡᤴᤆᤣᤀᤡ ᤑᤰᤋᤠᤱᤗᤢᤱ ᤐᤣᤃᤠᤖ ᤐᤳᤇᤠᤸᤗᤧ ᤛᤡᤍᤡᤱᤒᤠ ᤐᤠᤱᤓᤣ᤹ᤗᤢᤱᤒᤠ ᤗᤡᤶᤒᤢᤍᤡᤶ ᤆᤡᤋᤪᤣ ᤁᤠᤣᤁ᤻ᤔᤠᤀᤠᤣ ᥈᥆᥍᥊ ᤛᤡᤛᤣᤁ᤻ᤖᤠᤣ ᥌ ᤏᤠᤶᤗᤧ ᤕᤠᤶᤔᤠ ᤛᤠᤱᤃᤠᤪᤶ ᤐᤣᤒᤠ ॥ ᤁᤡᤖᤠᤋ᤻ ᤛᤠᤶᤕᤠᤣᤒᤠ ᤛᤠᤵᤔᤢᤴᤎᤢᤶᤔᤠᤣ ᤀᤠᤵᤑᤠ᤹ᤗᤠᤱ ᤔᤧᤴᤔᤠᤏᤠ ᤔᤡᤱ ᤋᤠᤣᤐ᤻ᤜᤠᤱ ᤗᤡᤱᤍᤧᤴ ᤗᤠᤣ ॥
ᤀᤡᤱᤄᤱ ᤆᤡᤃᤰᤘᤠ ᤐᤠᤏ᤻ᤗᤧᤱ – ᤔᤠᤱᤛᤣᤒᤢᤱᤏ᤻ᤕᤢᤈ ᤗᤠᤶᤒᤠ