ᤔᤠᤱᤛᤣᤒᤢᤱ/ ᤋᤠᤵᤗᤣᤈᤢᤱᤒᤠ ᤔᤣᤖᤡᤱᤍᤧᤴ ᤐᤠᤱᤓᤣ᤹ᤗᤢᤱ ᥈, ᤛᤠᤴᤌᤠᤁᤠᤪᤒᤠ ᤒᤠᤗᤢᤁᤣ ᤔᤧᤵᤏᤠᤒᤠ ᤋᤧᤴᤏᤠᤣ᤹ ᤁᤡᤖᤠᤋ᤻ ᤛᤠᤶᤕᤠᤣ ᤛᤛᤡᤔᤢᤴᤎᤢᤶ ᤔᤠᤗᤠᤶᤛᤠᤒᤠ, ᤗᤠᤈᤣ᤹ ᤔᤡᤱᤛᤠᤣ ᤔᤧᤶᤔᤠ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤑᤸᤃᤢᤏᤴᤍᤖᤧ ᤆᤀᤡᤋ᤻ᤗᤢᤱ ᤛᤢᤏᤠᤜᤴ ᤐᤠᤣᤅ᤻ᤒᤠ ᤐᤠᤣᤀᤠᤀᤠᤱ ᤘᤠ ॥
ᤁᤡᤖᤠᤋ᤻ ᤔᤢᤈᤠᤣᤳᤗᤢᤱ ᤕᤢᤔᤠ᤹ ᤔᤠᤱᤜᤡᤶ ᤆᤢᤶᤓᤠᤣᤖᤧ ᤕᤢᤰᤛᤡᤱ ᤔᤧᤈᤠᤣᤃᤢᤒᤠ ᤆᤀᤡᤋ᤻ᤗᤢᤱᤅᤡᤴ ᤆᤧᤖᤧᤱᤏᤠᤶ ᥈᥈ ᤏᤠᤶᤗᤧ ᤕᤠᤶᤔᤠ ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤀᤠᤳᤔᤠᤏᤴᤍ ᤛᤣᤀᤡᤱ ᤏᤢ ᤛᤠᤶᤕᤠᤣ ᤌᤠᤁᤢᤔᤠᤔᤠᤱ ᤛᤠᤔ᤻ᤒᤠ ᤐᤒᤡᤋᤪᤜᤠᤱᤔᤠ ᤗᤡᤱᤍᤧᤴᤖᤧ ᤆᤀᤡᤋ᤻ᤗᤢᤱ ᤛᤢᤏᤠᤜᤴ ᤆᤠᤣᤁ᤻ᤛᤢᤒᤠ ᤔᤠᤱᤜᤡᤶ ᤆᤢᤶᤓᤠᤣᤒᤠ ᤌᤠᤣᤛᤢᤍᤡᤶᤒᤠ ᤖᤢᤐᤠ ᤛᤠ᤺ᤘᤠ ᤛᤣᤪᤅ᤻ᤗᤧ ᤐᤠᤋᤢᤀᤠᤱ ᤘᤠ ॥ ᤜᤢᤏᤧ᤹ ᤐᤠᤋᤢᤒᤠ ᤀᤡᤛᤡᤰ ᥎ ᤑᤢᤋ᤻ ᥎ ᤀᤡᤏ᤻ᤆᤒᤠ ᥋ ᤜᤧᤴᤇᤡᤱ ᤁᤣᤈᤡᤒᤠ ᤆᤀᤡᤋ᤻ᤗᤢᤱᤅᤡᤴ ᤔᤠᤱᤛᤣᤒᤢᤱ ᤔᤧᤈᤠᤣᤃᤢᤀᤠᤱ ᤛᤠᤴᤌᤠᤁᤠᤪ ᤔᤧᤍᤣ᤹ᤖᤢᤒᤠ ᤐᤠᤋᤢᤀᤠᤱ ᤘᤠ ॥
ᤆᤀᤡᤋ᤻ᤗᤢᤱ ᤕᤢᤰᤛᤡᤱ / ᤛᤢᤏᤠᤜᤴ ᤆᤢᤶᤓᤠᤣᤒᤠ ᤛᤜᤠᤱᤔᤡᤒᤠ ᤛᤡᤪᤈᤋᤠ ᤗᤠᤒᤢᤅ᤻ᤗᤧ ᤀᤡᤛᤡᤰ ᥇᥍ ᤏᤠᤶᤗᤧ ᤋᤔᤠᤣᤖ ᤘᤠᤜᤱᤅᤠᤣ ᤛᤠᤰᤔᤢᤖᤠ ᤘᤠᤍᤣᤔ᤻ᤔᤠ ॥ ᤆᤧᤖᤧᤱᤏᤠᤶ ᥈᥆ ᤏᤠᤶᤗᤧ ᤕᤠᤶᤔᤠ ᤋᤠᤏᤠᤶ ᤗᤠᤎᤢᤱ ᤛᤣᤔᤡ ᤛᤣᤘᤠ ᤏᤢ ᥈᥈ ᤏᤠᤶᤗᤣ ᤕᤠᤶᤔᤠ ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢ ᤌᤠᤁᤢᤔᤠ ᤗᤠᤶᤒᤠ ᤆᤀᤡᤋ᤻ᤗᤢᤱ ᤛᤢᤏᤠᤜᤴ ᤐᤠᤣᤅ᤻ᤒᤠ ॥ ᤐᤕᤶ ᤌᤡᤶᤒᤣ᤹ᤀᤡᤴ ᤆᤀᤡᤋ᤻ ᤕᤢᤰᤛᤡᤱ ᤏᤢ ᤔᤠᤱᤜᤡᤶ ᤆᤠᤣᤁ᤻ᤔᤠᤀᤠᤣ ᤆᤢᤶᤓᤠᤣᤒᤠ ᤐᤠᤛᤡᤱ ᤐᤠᤍᤠᤱ ᤏᤢ ᤕᤖᤡᤰᤁᤣ ᤛᤣᤘᤠᤛᤠᤖᤧ ᤜᤢᤴᤇᤡ᤹ ᤛᤢᤶᤒᤢᤃᤧᤴ ᤜᤢᤰᤘᤠ ᤑᤠ᤹ᤛᤡᤱᤕᤠᤱ ᤗᤠᤶᤒᤠ ᤐᤠᤣᤂᤠᤀᤠᤱ ᤘᤠᤒᤠ ᤋᤱᤜᤡᤒᤠᤖᤧ ᤔᤧᤒᤠᤋᤢᤀᤠᤱ ᤘᤠ ॥
