ᤆᤧᤖᤧᤱᤏᤠᤶ ᥈᥆᥎᥆/᥆᥊ ᤍᤔᤁ᤻ / ᤛᤡᤗᤠᤤᤋᤡ ᤎ᤻ᤘᤈᤣ ᤁᤠᤣᤁ᤻ᤔᤠᤀᤠᤣ ᤏᤡᤛ᤻ᤛᤣᤜᤠᤱᤔᤠ. ᤗᤠᤈᤣ᤹ ᤔᤡᤅᤛᤠᤣ ᤔᤧᤶᤔᤠ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤑᤠᤸᤃᤢᤏᤴᤍᤖᤧ ᤆᤣᤜᤡᤶ ᤏᤧ ॥ ᤛᤠᤣ-ᤛᤠᤣᤖᤡᤰ ᤏᤡᤛ᤻ᤛᤣᤜᤠᤱᤔᤠᤏᤢ ᤁᤧᤘᤠᤒᤠ ᤛᤠᤶᤕᤠᤣ ᤛᤠ᤺. ᤏᤠᤶᤓᤢᤴᤕᤰ ᤔᤠᤱᤜᤡᤶᤒᤠ ᤁᤢᤜᤣᤁ᤻ᤛᤡᤱᤒᤠ ᤛᤣᤘᤠᤛᤠᤒᤠ ᤛᤡᤍ᤻ᤍᤡᤏᤴᤍ ᤑᤧᤈᤱᤖᤧᤴ ᤆᤣᤜᤡᤶ ᤏᤢ ᤂᤠᤀᤡᤰᤛᤠᤶᤒᤠ ᤖᤴᤎᤠᤣᤈ ᤏᤧᤶᤒᤠᤱᤖᤧ ᤆᤣᤜᤡᤶᤔᤠᤱ ᤁᤢᤓᤣᤛᤠᤱ ᤏᤧ ॥ ᤜᤧᤶᤔᤠᤩᤁ᤻ᤗᤰ ᤔᤧᤴᤏᤠᤱ ᤔᤠᤵᤔᤠᤕᤖᤡᤰ ᤆᤣᤜᤡᤶᤜᤠ᤹ ᤐᤠᤜᤧᤴ ᤋᤧᤴᤏᤠᤣ᤹ ᤔᤧᤏᤧ ॥ ᤒᤠᤜᤧᤰᤁᤣᤀᤠᤱ ᤁᤴ ᤋᤧᤴᤏᤡᤴ ᤔᤠ᤺ᤌᤠᤁᤢᤖᤧ ᤆᤢᤰᤐᤠᤱᤓᤣ᤹ ᤔᤡᤱᤘᤠᤏ᤻ᤍᤢᤱᤒᤠᤖᤠᤣ ॥
ᤏᤡᤛ᤻ᤛᤣᤜᤠᤱᤔᤠᤖᤧ ᤆᤣᤜᤡᤶᤖᤧ ᤁᤢᤓᤣᤛᤠᤱ ᤗᤡᤃᤵᤐᤡᤛᤠᤱ ᤀᤠᤣᤔ᤻ᤀᤡ ᤕᤧᤵᤗ ᤆᤀᤡᤋ᤻ᤗᤢᤱ ᤕᤧᤶᤔᤠ ᤏᤡᤱᤘᤠ ᤆᤠᤣᤃᤢᤱᤅᤠᤱ ᤘᤠ ॥ ᤆᤀᤡᤋ᤻ᤗᤢᤱ ᤕᤧᤶᤔᤠ ᤛᤢᤐ᤻ᤔᤠᤀᤠᤱ. ᤏᤡᤛ᤻ᤛᤣᤜᤠᤱᤔᤠᤖᤧ ᤆᤣᤜᤡᤶ ᤏᤢ ᤛᤠᤣᤛᤠᤣᤖᤡᤰ ᤂᤧᤴ ᤋᤧᤴᤏᤠᤣ᤹ ᤁᤧᤏᤧᤒᤠ ᤁᤧᤖᤧᤰ ᤆᤣᤜᤡᤶᤜᤠ᤹ ᤐᤏᤠᤣᤒᤠ ᤆᤠᤣᤁ᤻ᤔᤠ ॥ ᤂᤧᤴ ᤋᤧᤴᤀᤠᤣ ᤑᤢᤱᤀᤡᤁ᤻ ᤆᤠᤣᤁ᤻ᤔᤠ ॥ ᤔᤠᤅ᤻ᤄᤠ ᤔᤠᤅ᤻ᤄᤠᤏᤢ ᤛᤣᤘᤠᤛᤠᤜᤠ᤹ ᤔᤧᤍᤠᤱ ᤛᤣᤘᤠ ᤔᤧᤈᤠᤣᤁ᤻ᤁᤡᤸᤗᤧ ᤀᤢᤛ᤻ᤖᤢ ᤐᤠᤣᤅ᤻ᤗ ᤗᤠᤱᤜᤢᤰ ᤘᤠᤜᤵᤔᤠ ᤋᤧᤴ ᤆᤠᤣᤁ᤻ᤔᤠ ॥ ᤂᤡᤖᤡᤘᤖᤡ ᤏᤡᤕᤠᤖᤠᤍᤣᤔᤠ. ᤏᤠᤔ᤻ᤛᤡᤱᤔᤠ ᤋᤧᤴ ᤆᤠᤣᤁ᤻ᤔᤠᤎᤠᤔᤠ ᤏᤡᤱᤘᤠ᤹ ᤆᤠᤣᤃᤢᤱᤅᤠᤱ ᤘᤠᤖᤠᤣ ॥
ᤎ᤻ᤘᤈᤣ ᤁᤠᤣᤁ᤻ᤔᤠᤀᤡᤴ ᤀᤠᤣᤔᤵᤔᤠᤸᤗᤧ ᤗᤢᤶᤓᤠᤣ᤹ᤀᤡᤴ ᤜᤰᤛᤢᤐ᤻ ᤕᤢᤱᤏᤠᤒᤠ ᤁᤢᤛᤡᤱ. ᤁᤧᤒᤠᤣᤁ᤻ᤐᤠ ᤁᤠᤣᤁ᤻ᤔᤠ ᤏᤢ ᤁᤢᤛᤶᤔᤠᤣ ᤆᤩᤎᤡᤰ ᤏᤧᤏᤧᤒᤠ ᤋᤧᤴ ᤁᤧ ॥ ᤒᤠᤜᤧᤴ ᤋᤧᤴᤏᤠᤣ ᤆᤣᤜᤡᤶᤜᤠ᤹ ᤔᤧᤏᤧ ॥ ᤁᤢᤓᤣᤛᤠᤱ ᤀᤠᤘᤠ ᤜᤡᤶᤔᤠᤱ ᤏᤧ ॥ ᤏᤠᤶᤒᤡᤴ ᤏᤢ ᤌᤠᤃᤧᤴ ᤗᤧᤶᤈᤠᤱ ᤋᤠᤶᤓᤢᤱ ᤏᤧ ॥ ᤏᤠᤶᤎᤠ ᤏᤢ ᤗᤠᤱᤃᤧᤴ ᤗᤧᤶᤈᤠᤱ ᤏᤡᤱᤒᤠᤣ ᤏᤧ ॥ ᤁᤢᤓᤣᤛᤠᤱ ᤕᤠᤣᤕᤠᤣᤰ-ᤕᤠᤣ ᤆᤢᤰᤐᤠ ᤁᤧᤒᤠᤣᤁ᤻ᤐᤠ ᤁᤠᤣᤁ᤻ᤔᤠᤀᤠᤣ ᤋᤠᤶᤓᤢᤱᤗᤧ ᤁᤢᤵᤋᤢᤒᤠ ᤋᤧᤴᤏᤠᤣ ᤏᤠᤶᤓᤢᤴᤕᤰ ᤔᤠᤱᤜᤡᤶ ᤏᤧ ॥
ᤎ᤻ᤘᤈᤣ ᤁᤠᤣᤁ᤻ᤔᤠᤀᤠᤣᤏᤢ ᤏᤡᤁᤧᤎᤠᤐ᤻ᤐᤠ ᤏᤡᤕᤠᤖᤠᤜᤠ᤹ ᤀᤠᤣᤔᤵᤔᤠᤸᤗᤧ ᤛᤧᤰᤁᤠ ᤏᤡᤱᤘᤠ᤹ ᤐᤜᤡᤶᤒᤠ ᤏᤡᤎᤠᤐ᤻ ॥ ᤕᤠᤣᤃᤖ ᤕᤠᤣ ᤗᤠᤱᤃᤧᤴ ᤒᤡᤛᤠᤱ ᤋᤧᤔᤧᤴᤖᤧ ᤐᤏᤠᤣᤒᤠ ᤏᤡᤕᤠᤖᤠ ॥ ᤏᤠᤶᤒᤡᤴ. ᤏᤠᤶᤎᤠ ᤏᤢ ᤌᤠᤱᤃᤧᤴ ᤒᤡᤛᤠᤱ ᤁᤠᤣᤁ᤻ᤔᤠ ᤑᤠᤱᤈᤱ ᤏᤢ ᤏᤠᤅ᤻ᤈᤱ ᤑᤡᤖᤡᤱᤗᤡᤱᤏᤠ ᤗᤧᤰᤁᤠᤱ ᤏᤧᤖᤠᤣ ॥
ᤏᤡᤛ᤻ᤛᤣᤜᤠᤱᤔᤠᤖᤧ ᤜᤡᤴᤍᤠᤣᤁ᤻ ᤁᤢᤏᤢᤶ ᤕᤧᤶᤔᤠᤣ ᤕᤖᤡᤰᤁᤣ ᤕᤧᤶ ᤒᤠ᤺ ᤛᤡᤗᤠᤤᤋ᤻ ᤘᤕᤧᤒᤠ ॥ ᤁᤴ ᤋᤧᤴᤀᤠᤣ ᤛᤠᤵᤔᤢᤴᤎᤢᤶᤔᤡᤒᤠ ᤀᤸᤗᤎᤠᤖᤡᤰ ᤏᤡᤔᤧᤴᤍᤧᤵᤏᤠ ᤂᤧᤶᤔᤧᤴᤍᤧᤵᤏᤠ ᤜᤡᤴᤍᤠᤣᤁ᤻ᤜᤠ᤹ ᤔᤧᤘᤠ ॥ ᤛᤧᤰᤂᤠᤀᤣ ᤛᤡᤗᤠᤤᤋᤡ ᤏᤡᤛ᤻ᤛᤣᤜᤠᤱᤔᤠᤖᤧ ᤜᤡᤴᤍᤠᤣᤁ᤻ᤐᤠ ᤔᤢᤰᤛᤡᤒᤠ ᤛᤠᤵᤔᤢᤴᤎᤢᤶᤗᤧ ᤁᤧᤵᤋᤢᤒᤠ / ᤕᤢᤰᤋᤢᤒᤠ ᤋᤧᤴᤗᤠᤣ ॥
ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤀᤠᤳᤔᤠᤏᤴᤍ ᤛᤣᤀᤡᤱ ᤏᤢ ᤛᤣᤘᤠ ᤏᤢ ᤋᤢᤶᤔᤠ ᤛᤠᤵᤑᤧᤰᤘᤠ ᥈᥆ / ᥈᥆᥎᥆ ᤔᤠᤱᤛᤣᤒᤢᤱ. ᤀᤡᤗᤠᤶ
