ᤔᤠᤱᤛᤣᤒᤢᤱ / ᤕᤠᤰᤌᤢᤱ ᤛᤢᤜᤠᤱᤖᤧ ᤏᤠᤔ᤻ᤓᤣ᤹ ᤋᤧᤴ ᤗᤡᤶᤒᤢᤘᤠᤏ᤻ᤀᤠᤣ ᤐᤠᤔ᤻ᤏᤠᤒᤠ ᤐᤠᤏ᤻ ᤏᤢ ᤛᤠᤰᤌᤡᤶᤔᤡᤒᤠ ᤀᤡᤁ᤻ᤗᤠ ᤁᤢᤃᤠᤵᤐᤠ ᤜᤡᤱᤔᤴ ᤀᤠᤣᤏ᤻ᤎᤠᤰ ᤁᤧᤒᤠᤣᤅ᤻ᤒᤠ ᤛᤡᤪᤔᤠᤏ᤻ ᤂᤈᤢᤶᤗᤧᤴ ᤛᤠᤶᤔᤡᤗᤠ ᤛᤢᤱ ( ᤋᤰᤛᤱ ᤔᤠᤀᤡᤗᤡ ) ᤖᤧᤴ ᤛᤢᤏᤠᤜᤴ ᤐᤠᤣᤂᤠᤀᤠᤱ ᤘᤠ ॥
ᤔᤡᤐ᤻ᤔᤠ ᤈᤣᤑᤠᤗᤣᤀᤠᤣ ᤛᤢᤏᤠᤜᤴ ᤁᤧᤒᤠᤣᤅ᤻ᤒᤠ ᤛᤠᤶᤔᤡᤗᤠ ᤛᤢᤱ ᤋᤰᤛᤱ ᤔᤠᤀᤡᤗᤡ ᤋᤠᤐ᤻ᤔᤠᤏᤢ ᥇᥋ ᤋᤱᤒᤣ ᤋᤃᤡᤀᤠᤱᤎᤠᤣ ᤕᤁ᤻ᤘᤠᤍᤱ ᤏᤠᤘᤠᤀᤠᤣ ᤏᤠᤁ᤻ᤆᤠ ᤜᤡᤰᤂᤢᤖ ᤘᤠᤕᤠ ॥ ᤛᤠᤵᤙᤰᤁᤡᤒᤠ ᤑᤡᤋᤠ᤹ ᤛᤠᤵ ᤁᤢᤓᤠ᤹ ᤜᤘᤠᤀᤡ ᤛᤰᤐᤧᤰᤘᤠ ᤗᤠᤶᤒᤠ ᤏᤠᤁ᤻ᤆᤠ᤹ ᤜᤡᤰᤂᤢᤖ ᤘᤕᤠ ॥ ᤁᤴ ᤕᤧᤶ ᤂᤈᤢᤶᤗᤧ ᤜᤢᤏᤧ᤹ᤖᤧ ᤕᤢᤰᤐᤢᤱ ᤎᤴᤁᤢᤋᤠ ᤆᤠᤤᤒᤡᤛ ᤂᤡᤖᤡᤘᤖᤡᤒᤠ ᤘᤠᤏᤠᤶ ᤏᤢ ᤜᤡᤱᤔᤴ ᤀᤠᤣᤏ᤻ᤎᤠᤰᤁᤡᤒᤠ ᤆᤧᤛᤢᤱ ᤋᤰᤛᤱ ᤔᤠᤀᤡᤗᤡ ᤛᤠᤵᤗᤴ ᤆᤠᤣᤃᤢᤀᤠᤱ ᤘᤠ ॥
ᤔᤠᤣᤖᤅ᤻ᤒᤠ ᤈᤣᤑᤠᤗᤣ ᤋᤠᤰᤁᤴᤏᤡᤒᤠ ᤋᤧᤴᤏᤠᤣ ᤋᤰᤛᤱ ᤔᤠᤀᤡᤗᤡ ᤛᤢᤏᤠᤜᤴ ᤌᤡᤶᤒᤣ᤹ᤀᤠᤣ ᤋᤢᤶᤋᤖᤧᤒᤠᤖᤧ ᤏᤠᤘᤠᤀᤠᤣ ᤛᤠᤵᤛᤰᤁᤡᤒᤠ ᤔᤢᤁᤢᤴᤍ ᤐᤪᤕᤠᤛᤖᤧ ᤆᤠᤣᤃᤢ ॥ ᤛᤠᤵᤙᤰᤁᤡᤒᤠ ᤆᤧᤛᤢᤱᤀᤠᤣ ᤐᤠᤏ᤻ᤓᤠᤣᤅ᤻ᤔᤠ ᤏᤠᤘᤠᤀᤠᤣ ᤖᤠᤈ ᤔᤠᤱᤗᤠᤁ᤻. ᤁᤣ ᤈᤡ ᤛᤢᤒ᤻ᤒᤠ ᤏᤢ ᤍᤡᤘᤠ ᤆᤧᤶᤈᤠᤣᤅ᤻ᤗᤧ ᤏᤠᤣᤏᤡᤱᤘᤠ ᤏᤢ ᤜᤠᤱᤛᤧᤓᤠᤣᤏᤠ ᤔᤧᤒᤡᤖᤢᤀᤠᤱ ᤘᤕᤠ ॥ ᤛᤠᤵᤙᤰᤁᤡᤒᤠ ᤛᤢᤱᤗᤧ ᤏᤣᤐᤠᤗᤡ ᤛᤠᤵᤙᤰᤁᤠᤣ ᤁᤢᤛᤱ ᤗᤠᤱᤕᤠᤣᤁ᤻ᤌᤡᤰ ᤑᤠᤣᤔᤠᤀᤠᤣ ᤑᤠ᤹ᤛᤡᤱ ᤆᤠᤣᤃᤢᤒᤠ ॥ ᤋᤧᤴᤏᤡᤒᤠ ᤛᤠᤵᤐᤠᤏ᤻ ᤏᤢ ᤛᤠᤰᤌᤡᤶ ᤌᤠᤣᤒᤠᤣᤀᤠᤣ ᤐᤕᤶᤃᤧᤴ ᤐᤠᤏ᤻ᤓᤠᤣᤅ᤻ ᤏᤢ ᤛᤠᤶᤒᤡᤪᤐᤠ ᤀᤠᤣᤃᤠᤵ ᤆᤠᤣᤃᤢᤒᤠ ᤐᤠᤏ᤻ᤓᤠᤣᤅ᤻ᤛᤠᤒᤠᤖᤧ ᤔᤧᤈᤧᤰᤂᤢ ॥
ᤛᤢᤱᤀᤠᤣ ᤜᤠᤰᤏᤠᤶᤓᤣ ᤀᤡᤋ᤻ᤗᤠᤒᤠ ᥈᥉ ᤛᤠᤶᤔᤡᤗᤠ ᤌᤠᤐ᤻ᤔᤡᤱᤜᤠ᤹ᤀᤠᤣ ᤕᤠᤶᤏᤡᤱᤘᤠ ᤀᤠᤣᤏ᤻ᤎᤠᤰ ᤐᤠᤣᤂᤠᤀᤠᤱ ᤘᤠ ॥ ᤛᤠᤵᤐᤴ ᤛᤢᤏᤠᤜᤴ ᤌᤡᤶᤒᤣᤀᤠᤣ ᤔᤠᤵᤔᤠ ᤕᤖᤡᤰ ᤕᤠᤵᤔᤡ ᤔᤧᤈᤢᤵᤛᤧᤀᤠᤱ ᤔᤧᤘᤕᤠ ॥ ᤏᤴ ᤛᤢᤏᤠᤜᤴ ᤌᤡᤶᤒᤣᤖᤧ ᤋᤱᤜᤡᤒᤠ ᤕᤠᤰᤌᤢᤅ ᤗᤣᤂᤰ ᤛᤱ ᤎᤴᤁᤢᤋᤠᤖᤧ ᤆᤠᤣᤃᤢᤀᤠᤱ ᤘᤕᤠᤒᤠ ᤌᤠᤣᤛᤢᤍᤡᤶᤒᤠ ᤁᤒᤡᤴ ᤋᤢᤶᤒᤠᤐᤠᤣᤖᤧ ᤐᤠᤋᤢ ॥
