ᤏᤣᤘᤠᤗᤠ / ᤏᤧᤐᤠᤗᤒᤠ ᤏᤠᤶᤒᤡᤴ ᤐᤡᤛᤠᤱᤒᤠ ᤐᤕᤶᤃᤧᤴ ᤛᤣᤘᤠ ᤋᤠᤰᤋᤧᤴ ᤔᤢᤰᤁᤢᤶᤗᤢᤱᤅᤠᤣ ᤁᤣᤒᤗᤁᤠᤖ ᤆᤠᤣᤁ᤻ᤔᤠᤖᤧ ᤑᤠ᤹ᤀᤠᤱ ᤕᤢᤰᤑᤠᤣᤒᤠ ᤑᤢᤱ ᤌᤠᤣᤁ᤻ᤑᤧ᤹ᤗᤠᤀᤡᤴ ᤔᤧᤴᤍᤱᤍᤱ ᤔᤧᤗᤧᤂᤢᤀᤠᤱ ᤘᤠ ॥
ᤔᤢᤰᤁᤢᤶᤗᤢᤱᤅᤠᤣ ᤛᤣᤘᤠ ᤋᤠᤰᤋᤧᤴᤖᤧ ᤏᤠᤘᤠᤀᤠᤣᤀᤣ ᤏᤧᤐᤠᤱᤔᤠᤐᤠᤣᤅ᤻ ᤗ᤹ᤖᤡᤰ ᤋᤧᤴᤏᤡᤒᤠ ᤏᤢ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠ ᤆᤢᤶᤓᤠᤣᤜᤠ᤹ᤖᤧ ᤐᤠᤏ᤻ᤓᤠᤣᤅ᤻ ᤔᤧᤈᤠᤣᤃᤢᤀᤠᤱ ᤘᤠ ॥ ᤁᤖ ᤐᤠᤔ᤻ᤏᤠᤖᤧ ᤔᤧᤕᤢᤰᤋᤢᤒᤠ ᤗᤠᤈᤣ᤹ᤀᤠᤣ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤖᤧ ᤀᤡᤁ᤻ᤗᤠᤀᤡᤴ ᤕᤢᤰᤑᤠᤣᤖᤧ ᤔᤧᤄᤧᤵᤛᤢᤴ ॥
ᤔᤢᤰᤁᤢᤶᤗᤢᤱᤅᤠᤣ ᤁᤣᤒᤗᤁᤠᤖ ᤆᤠᤣᤁ᤻ᤔᤠ ᤔᤧᤏᤢ᤹ᤏᤧᤴ ᤗ᤹ᤖᤡᤰ ᤋᤧᤴᤏᤡᤒᤠ ᤏᤢ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠ ᤆᤡᤶᤔᤠᤣᤜᤠ᤹ᤖᤧ ᤐᤠᤏ᤻ᤓᤠᤣᤅ᤻ ᤏᤢ ᤛᤠᤣᤛᤠᤣᤖᤡᤰ ᤛᤷᤒᤠᤆ ᤀᤍᤠᤗᤋᤀᤠᤣ ᤔᤢᤍ᤻ᤍᤠ ᤂᤠᤛᤧᤴ ᤔᤧᤶᤒᤠᤣᤅ᤻ᤅᤣ ᤀᤰᤂᤣᤗ᤹ᤖᤡᤰ ᤗᤠᤈᤣ᤹ᤒᤠ ᤑᤢᤱ ᤌᤠᤣᤁ᤻ᤑᤧ᤹ᤗᤠ ᤀᤡᤴ ᤁᤣᤒᤗᤁᤠᤖ ᤁᤧᤈᤠᤣᤁ᤻ᤐᤠ ᤗᤧᤶᤈᤠᤱᤒᤠ ᤕᤠᤵᤔᤡᤖᤧ ᤛᤢᤗᤗᤡᤛᤠ ᤛᤧᤴᤍᤡᤰ ᤔᤧᤍᤠᤩᤀᤠᤱ ᤗᤧᤅ᤻ᤔᤠ ᤔᤧᤜᤣᤁ᤻ᤋᤢᤀᤠᤱ ᤘᤠ ॥ ᤌᤠᤣᤁ᤻ᤑᤧ᤹ᤗᤠ ᤋᤠᤶᤓᤢᤱ ᤗᤧᤅ᤻ᤔᤠ ᤔᤧᤜᤣᤁ᤻ᤋᤢᤒᤠᤀᤠᤣ ᤕᤖᤡᤰᤁᤣ ᤏᤡᤛᤢᤶᤌᤡᤶᤒᤠ ᤆᤢᤶᤓᤠᤣᤖᤧ ᤁᤣᤒᤗᤁᤠᤖ ᤆᤠᤣᤁ᤻ᤔᤠᤔᤧᤏᤢ᤹ᤏᤧᤴ ᤗ᤹ᤖᤡᤰ ᤀᤡᤱᤛᤣᤆᤢᤶ ᤙᤰ (ᤐᤪᤣᤛ ᤒᤡᤃᤩᤵᤋᤡ ) ᤔᤧᤗᤋᤢᤀᤠᤱ ᤔᤧᤴᤍᤡᤱᤒᤠ ᤐᤠᤏ᤻ ᤕᤠᤶᤔᤠᤣ ᤔᤧᤓᤠᤣᤂᤢᤀᤠᤱ ᤘᤠ ॥
ᤁᤣᤒᤗᤁᤠᤖ ᤆᤠᤣᤁ᤻ᤔᤠᤸᤗᤧ ᤂᤧᤴ ᤋᤧᤴᤏᤠᤣ᤹ᤒᤠ ᤋᤧᤴᤇᤠᤒᤠᤜᤠ᤹ᤖᤧ ᤜᤢᤴᤇᤡ᤹ ᤕᤠᤔ᤻ᤒᤰ ᤆᤠᤣᤁ᤻ᤔᤠ ᤏᤢ ᤆᤩᤈᤡ ᤕᤠᤱ ᤌᤠᤰᤔᤠ ᤗᤠᤶ ᤀᤰᤁᤠᤱᤐᤣᤁ᤻ ॥ ᤔᤢᤰᤁᤢᤶᤗᤢᤅᤠᤣ ᤔᤠᤱᤛᤣᤘᤠ ᤁᤧᤈᤠᤣᤁ᤻ᤐᤠᤖᤰ ᤔᤧᤴᤏᤠᤱ ᤛᤠᤛᤠᤣᤋ᤻ᤛᤖᤠᤱ ᤁᤧᤈᤠᤣᤁ᤻ᤐᤠ ᤁᤧᤖᤧᤰ ᤏᤠᤘᤠᤒᤠ ᤕᤠᤵᤔᤡ ᤌᤠᤣ ᤔᤧᤒᤣᤁ᤻ᤁᤠᤱ ᤛᤣᤘᤠ ᤋᤠᤰᤋᤧᤴᤏᤡᤴ ᤆᤡᤏ᤻ᤔᤧᤈᤠᤋᤢ᤹ ॥ ᤁᤣᤒᤗᤁᤠᤖᤖᤧ ᤔᤡᤱᤛᤠᤣᤀᤠᤣ ᤋᤠᤶᤓᤢᤱᤔᤠᤴ ᤔᤧᤗᤧᤂᤢᤀᤠᤱ ᤘᤠ ॥ ᤋᤠᤶᤓᤢᤱᤔᤠᤀᤠᤣ ᤂᤠᤣᤁᤧᤍᤧᤵᤐᤠ ᤛᤡᤍᤠ᤹ ᤐᤠᤱᤍᤠ ᤁᤧᤖᤧᤰ ᤀᤠᤸᤗ ᤂᤷᤔᤧᤰ ᤔᤧᤰᤐᤠ ᤐᤠᤣᤂᤠ ᤏᤢ ᤕᤠᤶᤔᤠᤣ ᤔᤧᤗᤡᤱᤅᤡᤴ ॥ ᤔᤢᤰᤁᤢᤶᤗᤢᤱ ᤕᤡ᤺ᤔᤠ ᤔᤠᤱᤅᤡᤴ ᤛᤡᤳᤇᤡᤱᤏᤧᤓᤃᤖ ᤕᤶᤒᤠ ᤔᤡᤴᤎᤣ ᤐᤠᤣᤁ᤻ ॥
ᤔᤢᤰᤁᤢᤶᤗᤢᤱᤅᤠᤣ ᤁᤣᤒᤗᤁᤠᤖ ᤆᤠᤣᤁ᤻ᤔᤠᤖᤧ ᤗᤰᤗᤠᤣᤒᤠ ᤆᤴᤍᤪ ᤎᤁᤠᤗ ᤘᤠ ॥ ᤜᤢᤏᤧ ᤕᤠᤱᤘᤠᤖᤧ ᤏᤠᤶᤓᤣᤀᤠᤣ ᤋᤧᤴᤏᤡᤒᤠ ᤕᤠᤵᤔᤡᤜᤠ᤹ ᤀᤡᤱᤅᤢᤛᤡᤀᤠᤱ ᤁᤴ ᤕᤠᤔ᤻ᤒᤰᤁᤡᤴ ᤋᤃᤡ ᤑᤠᤣᤛᤢᤖ ᤘᤠᤒᤠ ॥ ᤀᤰᤂᤣᤗ᤹ᤖᤡᤰ ᤕᤠᤔ᤻ᤒᤰᤁᤡᤴ ᤋᤃᤡ ᤐᤠᤣᤖ ᤘᤠᤀᤡᤸᤗᤧ ᤁᤴ ᤋᤧᤴᤀᤠᤣ ᤁᤧᤕᤢᤱᤒᤠ ᤂᤠᤶᤒᤠᤣᤅ᤻ᤒᤠ ᤗᤢᤅᤒᤠᤣᤅᤒᤠᤜᤠ᤹ ᤁᤡᤓᤠ᤹ ᤕᤠᤱᤈᤠᤔᤠᤗᤧᤶᤈᤠᤱ ᤔᤧᤗᤠᤛᤠᤀᤠᤱ ᤔᤧᤕᤠᤰ ᤁᤖ ᤁᤢᤓᤠ᤹ ᤔᤢᤰᤁᤢᤶᤗᤢᤱᤅᤡᤴ ᤋᤠᤱᤛᤧᤐ᤻ ᤆᤠᤣᤁ᤻ᤔᤠᤐᤠᤣᤅ᤻ ᤁᤧᤖ᤹ᤒᤠᤀᤠᤣ ᤔᤧᤘᤠ ॥
ᤁ᤹ᤕᤠᤣ ᤋᤧᤴᤇᤠᤒᤠᤜᤠ᤹ᤀᤣ ᤏᤧᤳ ᤐᤖᤢᤵᤐᤠᤣ ᤏᤡᤔᤧᤎᤠᤐ᤻ ॥ ᤐᤠᤔ᤻ᤏᤠᤖᤧ ᤛᤡᤃᤠᤱ ᤛᤡᤃᤠᤱᤅᤣ ᤏᤧᤳᤐᤖᤢᤵᤐᤠᤣ ᤐᤠᤣᤅ᤻ᤔᤠ ᤏᤢ ᤌᤡᤰᤜᤢᤵ ᤔᤧᤶᤒᤠᤣᤅ᤻ᤏᤠ ᤏᤠᤘᤠᤀᤠᤣ ᤕᤠᤔ᤻ᤒᤰ ᤔᤧᤈᤠᤣᤃᤢᤀᤠᤱ ᤘᤠ ॥ ᤁᤴ ᤐᤠᤏ᤻ᤏᤡᤴ ᤁᤢᤛᤡᤱ ᤔᤧᤴᤏᤡᤐ᤻ᤐᤠ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠ ᤕᤠ ᤏᤡᤛᤢᤶ ᤌᤡᤶᤒᤠᤖᤧ ᤛᤧᤰᤂᤠᤀᤣ ᤐᤕᤶ ᤔᤡᤰ ᤔᤧᤴᤜᤶᤔᤠᤖᤣᤠ ॥ ᤁᤴ ᤏᤡᤕᤠᤖᤠᤸᤗᤧ ᤁᤢᤏᤠᤣ ᤁᤢᤓᤧᤴ ᤀᤠᤸᤗᤠᤣ ᤆᤩᤈᤡ ᤋᤠᤏᤍᤡ ᤁᤡᤍᤡᤶᤒᤠ ᤐᤠᤣᤅ᤻ᤅᤡᤸᤗᤣ ᤌᤣᤁ᤻ᤔᤠᤴ ᤌᤰᤔᤠᤀᤠᤱ ᤕᤢᤱᤔᤠᤖᤰ ᤛᤢᤰᤋᤧᤵᤐᤠ ᤕᤧᤶ ᤋᤠᤖᤠᤣ ॥
ᤐᤠᤔ᤻ᤏᤠᤖᤧ ᤔᤧᤈᤠᤣᤃᤢᤒᤠ ᤕᤠᤔ᤻ᤒᤰᤁᤠᤣ ᤜᤢᤴᤇᤡ᤹ ᤐᤠᤋᤐᤠᤋ᤻ ᤔᤧᤈᤠᤣᤃᤢᤛᤠᤱ ᤐᤠᤣᤅ᤻ ॥ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤖᤧ ᤜᤢᤴᤇᤡ᤹ ᤛᤠᤰᤌᤡᤶ ᤀᤡᤛᤡᤰ ᤐᤡᤳ ᤔᤧᤛᤧᤖᤢᤀᤠᤱ ᤔᤧᤈᤀᤡᤸᤗᤣ ᤕᤢᤰᤑᤠᤣᤖᤧ ᤋᤧᤶᤛᤢᤛᤡᤀᤠᤱ ᤛᤠᤰᤋᤢᤛᤡ ॥ ᤁᤠᤏᤢᤏ ᤗᤠᤒ᤻ᤆᤠᤣᤁ᤻ ᤁᤖ ᤐᤠᤔ᤻ᤏᤠᤖᤧ ᤕᤢᤰᤑᤠᤣ ᤑᤢᤱ ᤌᤠᤣᤁ᤻ᤑᤧ᤹ᤗᤠ ᤋᤠᤶᤓᤢᤱᤅᤣ ᤔᤧᤗᤧᤂᤢᤛᤠᤱ ᤌᤣᤀᤠᤱ ᤔᤧᤒᤠᤣᤅ᤻ᤅᤡᤴ ॥ ᤜᤢᤴᤇᤡ᤹ ᤁᤠᤏᤢᤏ᤻ᤀᤠᤱ ᤗᤠᤒ᤻ᤔᤧᤴᤈᤠᤣᤁᤡᤴ ॥ ᤁᤴ ᤐᤠᤏ᤻ᤖᤧ ᤗᤌᤡᤰ ᤁᤢᤒᤠᤏ᤻ᤎᤡᤰ ᤘᤠ ॥ ( ᤏᤣᤐᤠᤗᤁᤠᤣ ᤁᤠᤏᤢᤏ. ᤍᤤᤒᤏᤤ ᤈᤠᤏᤢᤏ ॥) ᤔᤢᤰᤁᤢᤶᤗᤢᤱ ᤁᤣᤒᤗᤁᤠᤖ ᤆᤠᤣᤁ᤻ᤔᤠᤖᤧ ᤏᤠᤔ᤺ᤓᤣᤀᤠᤣ ᤌᤣᤠᤁ᤻ᤑᤧ᤹ᤗᤠ ᤋᤠᤶᤓᤢᤱ ᤗᤧᤅ᤻ᤔᤠᤖᤧ ᤒᤠ ᤀᤰᤋᤶᤒᤠ ᤏᤡᤕᤠᤖᤠ ᤏᤡᤎᤠᤐ᤻ ॥
ᤔᤢᤰᤁᤢᤶᤗᤢᤱᤅᤡᤴ ᤐᤎᤠᤐ᤻ᤐᤠ ᤏᤠᤘᤠᤀᤠᤣ ᤁᤡᤖᤠᤋ᤻ ᤐᤕᤶᤃᤧᤴ ᤂᤠᤛᤠᤶ ᤛᤡᤃᤠᤱᤒᤠ ᤕᤠᤰᤌᤢᤱ ᤔᤢᤴᤎᤢᤶᤗᤧ ᤁᤢᤒᤠᤣᤁ᤻ᤛᤠᤶᤖᤧ ᤏᤠᤘᤠᤀᤠᤣ ᤏᤠᤈᤶ ᤘᤠ ॥ ᤁᤖ ᤕᤖᤡᤰ ᤕᤠᤰᤌᤢᤱᤒᤠᤜᤠ᤹ ᤔᤧᤴᤍᤱᤔᤠᤖᤧᤀᤠᤱ ᤀᤰᤋᤶᤒᤠ ᤐᤠᤣᤂᤠᤀᤠᤱ ᤘᤠ ॥ ᤀᤠᤸᤗᤠᤣᤒᤠ ᤕᤧᤶᤔᤠᤣ ᤛᤢᤸᤗᤡᤰᤖᤰ ᤕᤠᤱᤈᤡᤰᤁᤠᤣᤀᤠᤱ ᤀᤠᤒᤠᤱᤅᤣ ᤛᤠᤰᤌᤡᤶ᤹ ᤔᤢᤴᤎᤢᤶᤔᤡᤒᤠ ᤋᤧᤴ ᤕᤠ ᤏᤡᤛᤢᤶ ᤌᤡᤶ ᤁᤧᤛᤱᤒᤠᤖᤧ ᤏᤠᤘᤠᤀᤠᤣ ᤏᤡᤛᤢᤶ ᤌᤡᤶ ᤕᤢᤱᤛᤡᤱᤔᤠ ᤕᤠ ᤁᤢᤛᤡᤱᤏᤡᤳᤋᤧᤵᤔᤠ ᤜᤣᤁ᤻ᤋᤠᤒᤠ ᤐᤠᤏ᤻ᤈᤠᤱ ᤀᤡᤱᤈᤠᤱ ᤘᤠ ॥
