ᤏᤣᤘᤠᤗᤠ / ᤁᤡᤖᤠᤋ᤻ ᤛᤠᤵᤐᤠᤏ᤻ ᤛᤡᤃᤠᤱᤒᤠ -᥏, ᤛᤢᤜᤠᤱᤒᤠ – ᥉᥉, ᤐᤠᤏ᤻ᤍᤠᤱᤜᤠ᤹ ᤛᤠᤵᤔᤠᤀᤠᤣ ᤗᤳᤌᤡᤰ ᤁᤡᤖᤠᤋ᤻ ᤛᤡᤖᤡᤈᤱᤃᤠ ᤙᤰᤙᤰ(ᤗᤡᤐᤡ ) ᤁᤡᤴ ᤀᤠᤣᤃᤵ ᤆᤠᤣᤁ᤻ᤔᤠ ᤁᤧᤍᤱᤒᤠᤖᤧ ᤏᤠᤘᤠᤀᤠᤣ ᤁᤡᤖᤠᤋ᤻ ᤛᤔᤴᤘᤕ ᤛᤔᤡᤋᤡᤖᤧ ᤗᤌᤡᤰ ᤆᤡᤈᤧᤵᤐᤡᤒᤠ ᤛᤠᤵᤗᤠᤔᤢᤴᤎᤣ ᤋᤠᤣᤏ᤻ᤍᤢᤀᤠᤱ ᤘᤠ ॥
ᤁᤡᤖᤠᤋ᤻ ᤛᤠᤵᤐᤠᤏ᤻ ᤛᤕᤅ᤻ ᤛᤡᤃᤠᤱᤒᤠ ᤐᤠᤏ᤻ᤜᤠ᤹ ᤛᤠᤵᤔᤠᤀᤠᤣ ᤀᤠᤳᤋᤡᤴ ᤙᤰᤙᤰᤁᤡᤴ ᤀᤠᤣᤃᤵ ᤆᤠᤣᤁ᤻ᤔᤠ ᤁᤧᤗ᤹ᤒᤠ ᤕᤖᤡᤰᤁᤣ ᤜᤶᤓᤠᤣ ᤏᤢ ᤛᤠᤵᤛᤣᤁ᤻ ᤔᤧᤴᤒᤠᤣᤅ᤻ᤅᤣ ᤘᤕᤠ ॥ ᤀᤠᤸᤗᤠᤱᤎᤠᤣ ᤗᤌᤡᤰ ᤙᤰᤙᤰᤁᤡᤴ ᤀᤠᤣᤃᤵ ᤆᤠᤣᤁ᤻ᤔᤠᤖᤧ ᤑᤠ᤹ᤀᤠᤱ ᤛᤠᤵᤔᤢᤴᤎᤢᤶᤔᤠᤒᤠ ᤕᤠᤔ᤻ᤒᤰ ᤋᤃᤡ ᤐᤠᤣᤖᤠᤀᤠᤱ ᤘᤠ ॥ ᤀᤰᤁᤣᤖᤡᤰ ᤐᤏᤠᤣᤒᤠ ᤀᤡᤱᤍᤱ ᤁᤧᤈᤠᤣᤁ᤻ᤒᤠ ᤛᤢᤘᤠᤱᤜᤠ᤹ᤀᤠᤣ ᥇, ᤕᤠᤰᤌᤢᤱ ᥈, ᤖᤠᤀᤡ ᥉, ᤁᤠᤣ᤺ᤀᤡᤆ ᤛᤢᤏᤢᤘᤠᤖ ᥊, ᤕᤠᤰᤂᤠ ᥋, ᤔᤠᤖᤣᤁ᤻ ᤕᤠᤰᤂᤠ ᥌, ᤈᤡᤖᤣᤗ ᥍, ᤜᤠᤕᤢ ᥎, ᤛᤢᤖᤣᤗ ᥏, ᤌᤠᤔᤡ ᤛᤢᤘᤠᤱᤗᤧ ᤗᤌᤡᤰ ᤙᤰᤙᤰᤁᤡᤴ ᤛᤠᤵᤔᤠ ᤕᤠᤔ᤻ᤒᤰᤁᤠᤣ ᤀᤠᤣᤃᤠᤵ ᤔᤧᤈᤠᤣᤃᤢᤒᤠ ᤘᤠ ॥ ᤖᤠᤀᤡ ᤛᤡᤃᤠᤱᤗᤰ ᥈᥊ ᤐᤠᤏ᤻ ᤔᤣᤘᤠᤒᤠᤸᤗᤧ ᤁᤧᤖᤧᤰᤁᤠᤣ -᥉᥉, ᤐᤠᤏ᤻ᤜᤠ᤹ ᥏ ᤛᤢᤘᤠᤱᤖᤧ ᤛᤠᤵᤔᤠᤀᤠᤣ ᤁᤡᤖᤠᤋ᤻ ᤛᤡᤖᤡᤈᤱᤃᤠ ᤙᤰᤙᤰᤁᤡᤴ ᤀᤠᤣᤃᤵ ᤔᤧᤈᤠᤣᤃᤢᤒᤠ ᤆᤢᤶᤓᤠᤣᤔᤡᤒᤠ ᤐᤠᤏ᤻ ᤘᤠ ॥
ᤁᤡᤖᤠᤋ᤻ ᤛᤡᤖᤡᤈᤱᤃᤠ ᤛᤰᤛᤰᤁᤡᤴ ᤋᤃᤡᤀᤠᤱᤎᤠᤣᤛᤠ ᤁᤡᤖᤠᤋ᤻ ᤙᤰᤙᤰ ᤗ᤹ᤖᤡᤰ ᤌᤠᤣᤒᤠᤣ ᤐᤠᤣᤂᤠᤖ ᤘᤕᤠ ॥ ᤁᤖ ᤁᤢᤓᤠ᤹ ᤕᤧᤶᤜᤠ᤹ᤀᤠᤣ ᤛᤡᤖᤡᤈᤱᤃᤠ ᤙᤰᤙᤰ ᤕᤠ ᤕᤠᤰᤌᤢᤱ ᤙᤰᤙᤰᤗᤰᤁᤠᤱ ᤔᤧᤔᤧᤳᤋᤢᤖᤀᤠᤱ ᤔᤧᤘᤕᤠ ॥ ᤐᤠᤜᤧᤴ ᤕᤧᤶᤀᤠᤣ ᤖᤠᤀᤡ ᤛᤢᤘᤠᤱ ᤛᤡᤃᤠᤱᤒᤠ ᤛᤠᤵᤐᤠᤏ᤻ ᤛᤠᤵᤔᤠᤖᤧ ᤑᤠ᤹ᤀᤠᤱ ᤘᤣ᤹ ᤙᤰᤙᤰᤁᤠᤱ ᤔᤧᤈᤠᤣᤃᤢᤀᤠᤱ ᤘᤠ ॥ ᤁᤖ ᤜᤧᤴ ᤙᤰᤙᤰᤁᤡᤴ ᤛᤱᤈᤢᤶ ᤏᤢ ᤛᤢᤘᤠᤱᤗᤣ ᤋᤧᤴᤍᤡᤱ ᤔᤧᤒᤡᤖᤢᤴ ॥ ᤀᤠᤸᤗ ᤓᤃᤖ ᤁᤡᤖᤠᤋ᤻ ᤐᤕᤶᤃᤧᤴ ᤛᤢᤘᤠᤱ ᤛᤡᤃᤠᤱᤒᤠ ᤕᤖᤡᤰᤗᤧ ᤁᤴ ᤁᤡᤖᤠᤋ᤻ ᤛᤡᤖᤡᤈᤱᤃᤠ ᤙᤰᤙᤰᤁᤡᤴ ᤀᤠᤣᤃᤠᤵ ᤔᤧᤈᤠᤣᤃᤢᤒᤠ ᤘᤠ ॥
ᤀᤠᤣᤃᤵᤐᤠᤣ ᤁᤧᤘᤠᤒᤠ ᤁᤡᤖᤠᤋ᤻ ᤙᤰᤙᤰᤁᤡᤴ ᤌᤠᤣ ᤛᤠᤵᤛᤡᤱ ᤁᤧᤒᤠᤣᤅ᤻ᤒᤠ ᤁᤧᤖᤧᤰᤗᤧ ᤀᤠᤣᤃᤠᤵ ᤆᤠᤣᤁ᤻ᤔᤠᤸᤗᤧ ᤁᤢᤍᤡᤶ ᤔᤧᤒᤠᤣᤅ᤻ᤅᤡᤶᤒᤠ ᤁᤢᤛᤡᤰᤐᤠ ᤘᤠ ॥ ᤁᤧᤖᤧᤰ ᤐᤠᤏ᤻ᤜᤠ᤹ ᤛᤠᤵᤔᤠᤀᤠᤣ ᤆᤠᤜᤠᤁᤧᤈᤠᤣᤁ᤻ᤐᤠᤖᤧ ᤏᤠᤘᤠᤀᤠᤣ ᤙᤰᤛᤣᤜᤠ᤹ ᤕᤠᤣᤔᤠ ᤏᤢ ᤁᤢᤛᤣᤁ᤻ᤙᤰᤂᤠ᤹ ᤆᤠᤣᤁ᤻ᤔᤠᤀᤠᤣ ᤐᤠᤏ᤻ᤍᤠᤱᤅᤡᤒᤠ ᤗᤰᤗᤠᤣᤒᤠᤖᤧ ᤐᤖᤢᤵᤜᤠ᤹ᤖᤧ ᤗᤌᤡᤰ ᤆᤢᤶᤓᤠᤣ ᤁᤡᤖᤠᤋ᤻ ᤛᤔᤴᤘᤕ ᤛᤔᤡᤋᤡ ᤕᤠᤖᤡᤵ ᤐᤠᤣᤂᤠᤀᤠᤱ ᤘᤕᤠ ॥ ᤐᤠᤜᤧᤴ ᤁᤡᤖᤠᤋ᤻ ᤛᤔᤴᤘᤕ ᤛᤔᤡᤋᤡᤖᤧ ᤁᤧᤖᤧᤰ ᤐᤠᤏ᤻ᤍᤠᤱᤅᤠᤣ ᤀᤠᤣᤃᤵ ᤆᤠᤣᤁ᤻ᤔᤠᤸᤗᤧ ᤜᤶᤓᤠᤣ ᤔᤧᤶᤒᤠᤣᤅ᤻ᤴ ᤐᤖᤡᤰᤗᤧᤴ ᤁᤢᤜᤣᤁ᤻ᤛᤡᤱᤒᤠ ᤛᤠᤵᤗᤠ ᤔᤢᤴᤎᤣ ᤔᤧᤍᤠᤣᤏ᤻ᤍᤢᤀᤠᤱ ᤘᤠ ॥
ᤁᤡᤖᤠᤋ᤻ ᤛᤔᤴᤘᤕ ᤛᤔᤡᤋᤡᤗᤠᤶᤒᤠ ᤔᤧᤕᤠᤣ᤹ᤖᤢᤒᤠ ᤏᤢ ᤔᤧᤈᤠᤣᤃᤢᤒᤠ ᤙᤰᤛᤣ ᤏᤢ ᤁᤢᤛᤣᤁ᤻ᤙᤰᤂᤠ᤹ ᤋᤃᤡᤒᤠ ᤙᤰᤙᤰ ᤏᤢ ᤁᤵᤗᤠᤈᤣ᤹ᤔᤡᤒᤠ ᤛᤠᤵᤐᤠᤏ᤻ᤒᤠ ᤓᤠᤣᤀᤡᤛ᤻ ᤀᤡᤒᤢᤖᤧ ᤏᤠᤶᤓᤣᤀᤠᤣ ᤋᤠᤏᤍᤡ ᤌᤠᤖᤡᤰ ᤀᤠᤵᤑᤠ᤹ᤗᤠᤱ ᤕᤠᤣᤎᤠᤣ ᤔᤧᤶᤒᤠᤣᤅ᤻ᤏᤠ ᤏᤠᤘᤠᤀᤠᤣ ᤁᤢᤈᤠᤣᤁ᤻ ᤐᤠᤣᤂᤠᤀᤠᤱ ᤘᤠᤒᤠ ॥ ᤁᤴ ᤀᤠᤸᤗᤠᤣ ᤋᤠᤣᤏ᤻ᤇᤡᤱ ᤁᤧᤒᤠᤣᤅ᤻ᤒᤠ ᤛᤠᤵᤗᤠᤔᤢᤴᤎᤣᤜᤠ᤹ᤀᤠᤱ ᤁᤢᤍᤡᤶᤒᤠ ᤔᤧᤶᤒᤠ ॥ ᤁᤴᤜᤠ᤹ᤕᤠᤣ ᤀᤠᤸᤛᤠᤱ ᤕᤠᤣᤎᤠᤣ ᤔᤧᤵᤔᤠ ᤛᤢᤰᤋᤧᤵᤐᤠ ᤁᤡᤖᤠᤋ᤻ ᤛᤔᤴᤘᤕ ᤛᤔᤡᤋᤡ ᤒᤡᤃ᤻ᤕ ᤁᤠᤷᤕᤍᤗ ᤐᤠᤛᤡᤱ ᤐᤪᤠᤃᤩ ᤀᤶᤔᤖ ᤋᤢᤶᤔᤠᤩᤜᤠᤱᤗᤣ ᤐᤠᤋᤢᤀᤠᤱ ᤘᤠ ॥
ᤁᤧᤖᤧᤰ ᤁᤡᤖᤠᤋ᤻ᤖᤧ ᤗᤌᤡᤰ ᤙᤰᤙᤰᤁᤡᤴ ᤀᤠᤣᤃᤵ ᤆᤠᤣᤁ᤻ᤔᤠ ᤐᤏᤠᤣᤒᤠ ᤏᤢ ᤛᤠᤵᤔᤢᤴᤎᤢᤶᤔᤡᤒᤠ ᤕᤠᤔ᤻ᤒᤰ ᤐᤠᤣᤂᤠᤀᤠᤱ ᤘᤠ ॥ ᤁᤴ ᤕᤠᤔ᤻ᤒᤰᤗᤣ ᤁᤧᤖᤧᤰ ᤁᤡᤖᤠᤋ᤻ ᤛᤢᤘᤠᤱ ᤏᤢ ᤐᤠᤏ᤻ᤜᤠ᤹ ᤌᤡᤰ ᤐᤠᤣᤅ᤻ᤔᤠᤖᤧ ᤔᤠᤖᤠᤶᤔᤠᤣ ᤐᤠᤣᤖ ᤘᤠᤒᤠ ᤏᤡᤎᤠᤐ᤻ ॥
ᤁᤢᤜᤣᤁ᤻ᤛᤡᤱᤒᤠ ᤁᤡᤖᤠᤋ᤻ ᤛᤔᤴᤘᤕ ᤛᤔᤡᤋᤡ ᤗᤠᤶᤒᤠ ᤋᤠᤣᤏ᤻ᤇᤡᤱ ᤁᤧᤒᤠᤣᤅ᤻ᤒᤠ ᤛᤠᤵᤗᤠᤔᤢᤴᤎᤣ ᤕᤠᤣ ᤁᤢᤀᤡᤛᤡᤰᤘᤠᤖᤠᤣ ॥
