ᤆᤧᤖᤧᤱᤏᤠᤶ ᥈᥉, ᤔᤠᤱᤛᤣᤒᤢᤱ / ᤀᤡᤗᤠᤶ ᤗᤰᤂᤠ ᥈ ᤀᤠᤣ ᤌᤧᤖᤧᤱᤏᤠᤶ ᥇᥋ ᤏᤠᤶᤗᤧ ᤕᤠᤶᤔᤠ ᤁᤧᤒᤠᤣᤅ᤻ᤒᤠᤖ ᤁᤧᤒᤵᤐᤠ ᤛᤣᤁ᤻ᤛᤡᤱᤗᤧ ᤑᤠ᤹ᤀᤠᤱ ᤛᤣᤁ᤻ᤛᤡᤱ ᤋᤠᤣᤏ᤻ᤇᤠᤵ ᤐᤠᤣᤂᤠᤀᤠᤱ ᤘᤠ ॥
ᤁᤧᤍᤠᤒᤠᤖ ᤁᤧᤒᤵᤐᤠ ᤛᤣᤁ᤻ᤛᤡᤱᤅᤠᤣ᤹ ᤜᤠᤰᤏᤠᤶ ᤏᤡᤛᤢᤶ ᤎᤡᤶᤒᤠᤖᤧ ᤗᤠᤶᤒᤠ ᤏᤢ ᤍᤁᤧᤴᤍᤪᤛᤡᤱ ᤌᤣᤃᤡᤶᤗᤣ ᤛᤠᤵᤋᤠᤣᤏ᤻ ᤆᤠᤣᤃᤢᤀᤠᤱ ᤘᤠ ॥ ᤜᤢᤏᤧ᤹ ᤁᤵᤑᤢ ᤂᤠᤏᤡᤴ ᤌᤡ ᤁᤡᤴ ᤕᤠᤶᤔᤠᤣ ᤏᤡᤛᤢᤶ ᤌᤡᤶᤖᤧ ᤏᤠᤔ᤻ᤓᤣᤀᤠᤣ ᤀᤢᤴᤏᤡᤱ ᤁᤧᤈᤠᤣᤁ᤻ᤐᤠ ᥊᥇ ᤄᤋᤁᤖᤧ ᤑᤠ᤹ᤛᤡᤱ ᤔᤧᤈᤠᤣᤃᤢᤒᤠ ᤐᤠᤏ᤻ ᤐᤠᤣᤂᤠᤱ ᤘᤠ ॥
ᤏᤣᤁᤐᤠ ᤀᤣᤔᤠᤗᤣ ᤗᤠᤶᤒᤠ ᤛᤢᤜᤠᤱ ᤏᤧᤶᤒᤠᤱᤗᤧ ᤛᤠᤵᤋᤠᤣᤏ᤻ ᤆᤠᤣᤃᤢᤀᤠᤱ ᤘᤠ ॥ ᤏᤣᤁᤐᤠ ᤀᤣᤔᤠᤗᤣᤒᤠ ᤌᤠᤣᤛᤢᤍᤡᤶᤒᤠ ᤁᤣᤐᤡ ᤛᤷᤔᤠ ᤀᤠᤣᤗᤡ ᤏᤢ ᤔᤠᤀᤠᤣᤒᤠᤍᤡ ᤁᤧᤴᤍᤪᤒᤠ ᤌᤠᤣᤛᤢᤍᤡᤶᤒᤠᤖᤧ ᤀᤡᤱᤍᤱ ᤀᤡᤛᤡᤰ ᤔᤠᤀᤠᤣᤒᤠᤍᤡᤖᤧ ᤀᤠᤱ ᤛᤢᤜᤠᤱ ᤏᤧᤶᤒᤠᤱᤅᤡᤴ ᤛᤣᤁ᤻ᤛᤡᤱ ᤔᤧᤒᤡᤖᤢᤒᤠ ᤐᤠᤣᤂᤠᤀᤠᤱ ᤘᤠ ॥
ᤏᤣᤐᤠᤗᤡ ᤁᤠᤱᤃᤣᤪᤛ ᤗᤠᤶᤒᤠ ᤍᤶᤒᤖ ᤂᤷᤁᤠᤖᤧ ᤛᤠᤵᤋᤠᤣᤏ᤻ ᤆᤠᤣᤃᤢᤀᤠᤱ ᤘᤠ ॥ ᤜᤢᤏᤧ᤹ ᤋᤃᤡᤒᤠ ᤛᤣᤁ᤻ᤛᤡᤱᤅᤠᤣ ᥇᥇᥊ ᤔᤋ᤻ᤖᤧ ᤛᤢᤒᤠᤛ᤻ ᤆᤴᤍᤪ ᤏᤧᤶᤒᤠᤱᤏᤢ ᤜᤠᤖᤡᤍᤩᤠᤀᤠᤱ ᤘᤠᤒᤠ ॥ ᤀᤠᤸᤗᤠᤣᤛ᤻ᤔᤠ ᤛᤣᤁ᤻ᤛᤡᤱᤅᤠᤣᤀᤠᤱ ᤛᤠᤵᤋᤠᤣᤏ᤻ ᤆᤠᤣᤃᤢᤀᤠᤱ ᤘᤠ ॥
ᤏᤡᤛᤢᤶ ᤌᤡᤶᤒᤠᤖᤠᤣ ᤗ᤹ᤖᤡᤰ ᤐᤣᤪᤔ᤻ᤍᤡᤐ᤻ ᤌᤠᤶᤛᤢᤜᤠᤱᤗᤣᤀᤠᤱ ᤛᤣᤁ᤻ᤛᤡᤱᤅᤠᤣ ᤛᤠᤵᤋᤠᤣᤏ᤻ ᤆᤠᤣᤃᤢᤀᤠᤱ ᤘᤠ ॥ ᤜᤢᤏᤧ᤹ ᥇ ᤂᤠᤏᤡ ᤁᤵᤑᤢᤖᤧ ᤔᤡᤱᤛᤠᤣ ᤁᤡᤖᤠᤋ᤻ ᤗᤡᤶᤒᤢᤘᤠᤏ ᤕᤢᤔᤠᤐᤠᤣᤅ᤻ ᤁᤧᤖ᤹ᤒᤠ ᤏᤠᤖᤠ ᤁᤳᤋᤢ ॥
ᤔᤡᤗᤏ᤻ ᤗᤡᤶᤒᤢ ᤖᤠᤛ᤻ᤋᤡᤕ ᤛ᤻ᤘᤋᤴᤋᤪ ᤐᤠᤋᤡ ᤗᤠᤶᤒᤠ ᤏᤢ ᤈᤡᤋ᤻ᤒᤜᤠᤍᤢᤖ ᤖᤠᤀᤡ ᤀᤣᤁᤡᤁᤡᤪᤋ ᤛᤔᤠᤈᤒᤠᤍᤡ ᤗᤠᤶᤒᤠ ᤏᤢ ᤗᤇ᤻ᤔᤡ ᤃᤢᤖᤢᤱᤗᤧ ᤖᤠᤐᤠᤪᤐᤠ ᤗᤠᤶᤒᤠ ᤏᤢ ᤛᤠᤵᤋᤠᤣᤏ ᤆᤠᤣᤃᤢᤀᤠᤱ ᤘᤠ ॥ ᤁᤴ ᤋᤧᤴᤏᤠᤣ᤹ᤏᤢ ᤛᤣᤁ᤻ᤛᤡᤱ ᤁᤧᤒᤠᤣᤅ᤻ᤒᤠ ᤛᤢᤒᤠᤛ ᤆᤴᤍᤪ ᤏᤧᤶᤒᤠᤱᤅᤡᤴ ᤔᤠᤛᤡᤱᤅᤠᤱ ᤁᤴ ᤋᤧᤴᤀᤠᤣ ᤕᤠᤶᤔᤠᤣ ᤛᤣᤁ᤻ᤛᤡᤱ ᤐᤠᤣᤅ᤻ᤗ ᤐᤵᤐᤠᤖᤠᤣ ॥
