ᤆᤧᤖᤧᤱᤏᤠᤶ ᥍ ᤔᤠᤱᤛᤣᤒᤢᤱ / ᤛᤢᤴᤛᤖᤡ ᤎᤖᤠᤏ᤻ᤀᤠᤣ ᤕᤠᤰᤌᤢᤱ ᤏᤡᤇᤠᤶᤛᤠ ᤆᤢᤶᤓᤠᤣᤖᤧ ᤏᤡᤛᤡᤃᤣᤁ᤻ᤐᤠ ᤕᤰᤐᤠᤱᤃᤧᤴ ᤔᤠ᤺ᤈᤢᤶᤗᤢ ᤁᤢᤜᤣᤁ᤻ᤛᤡᤱ ᤐᤠᤣᤂᤠᤀᤠᤱ ᤘᤠ ॥
ᤁᤡᤖᤠᤋ᤻ ᤕᤠᤰᤌᤢᤱ ᤏᤡᤇᤠᤶᤛᤠ ᤆᤢᤶᤓᤠᤣᤖᤧ ᥈᥋ ᤛᤡᤃᤣᤁ᤻ᤐᤠ ᤕᤢᤰᤛᤡᤱ ᤋᤱᤏᤠᤶᤖᤧ ᤛᤢᤕᤧᤶᤏᤢ ᤛᤠᤣ-ᤛᤠᤣᤖᤡᤰ ᤔᤡᤰᤜᤠᤱᤒᤠ ᤕᤠᤰᤌᤢᤱ ᤏᤡᤇᤠᤶᤛᤠ ᤆᤢᤶᤓᤠᤣᤖᤣ ᤏᤡᤛᤡᤃᤣᤁ᤻ᤐᤠ ᤕᤰᤐᤠᤱᤃᤧᤴ ᤔᤠ᤺ᤈᤢᤶᤗᤢᤱᤖᤧ ᤁᤢᤜᤣᤁ᤻ᤛᤡᤱ ᤐᤠᤣᤂᤠᤀᤠᤱ ᤘᤠ ॥
ᤕᤠᤰᤌᤢᤱ ᤛᤠᤰᤌᤡᤶᤔᤡᤒᤠ ᤔᤠᤱᤗᤠᤅ᤻.ᤁᤣᤗᤠᤅ᤻. ᤕᤧᤒᤠᤗᤠᤅ᤻ᤒᤠ ᤗᤠᤱᤄᤣᤁ᤻ᤏᤢ ᤛᤠᤣ-ᤛᤠᤣᤖᤡᤰ ᤁᤢᤜᤣᤁ᤻ᤛᤡᤱ ᤁᤧᤒᤠᤣᤅ᤻ᤒᤠ ᤔᤠ᤺ᤈᤢᤶᤗᤢᤱᤅᤡᤴ ᥇ ᤂᤠᤏᤡᤴ ᤁᤵᤑᤢᤒᤠ ᤓᤠᤤᤋᤡᤁ᤻ ᤐᤢᤖ᤻ᤘᤎᤠᤖ ᤌᤠᤣᤒᤠᤣ ᤋᤢᤶᤔᤠᤩᤜᤠᤱ ᤁᤔᤗ ᤐᤪᤛᤠᤍ ᤈᤒᤣᤃᤢᤖᤧ ᤌᤡᤶᤒᤣ᤹ᤖᤧ ᤛᤢᤏᤠᤜᤴ ᤆᤠᤣᤃᤢᤀᤠᤱ ᤘᤕᤠ ॥
(ᤌᤡᤱᤃᤠ᤹ᤖᤧ ᤑᤠ᤹ᤀᤠᤱ ᤌᤡᤰᤜᤢᤵ) ᤀᤢᤴᤏᤡᤱᤒᤠ ᤐᤕᤶ ᤕᤰᤐᤠᤱᤃᤧᤴ ᤔᤠ᤺ᤈᤢᤶᤗᤢᤱᤅᤠᤣ ᤏᤧᤐᤠᤗ. ᤋᤧᤔᤧᤴ. ᤓᤢᤋᤠᤏ᤻. ᤀᤔᤣᤖᤡᤁᤠ. ᤒᤣᤗᤠᤕᤋ᤻. ᤀᤛ᤻ᤋᤣᤪᤗᤡᤕᤠ. ᤈᤠᤐᤠᤏ᤻. ᤈᤷᤔᤏᤡ. ᤑᤪᤠᤴᤛ᤻ ᤏᤢ ᤛᤠᤣᤖᤡᤰ ᥇᥍ ᤗᤠᤈᤣ᤹ᤒᤠ ᤏᤢ ᤏᤧᤐᤠᤗᤒᤠ ᥇᥊ ᤌᤢᤶᤗᤠᤶᤒᤠ ᤕᤠᤰᤌᤢᤱ ᤏᤡᤇᤠᤶᤛᤠ ᤔᤧᤍᤠᤩᤀᤠᤱ ᤔᤧᤘᤠ ॥
ᤛᤢᤏᤠᤜᤴ ᤌᤡᤶᤒᤣ᤹ᤀᤠᤣ ᤋᤃᤡᤒᤠ ᥇ ᤂᤠ, ᤁᤵᤑᤢ ᤋᤢᤶᤒᤠ ᤃᤠᤣᤒᤡᤴᤍ ᤀᤠᤱᤒᤢᤜᤠᤱ. ᤕᤠᤰᤌᤢᤱ ᤏᤡᤇᤠᤶᤛᤠ ᤁᤢᤜᤣᤁ᤻ᤛᤡᤱᤒᤠ ᤌᤠᤣᤛᤢᤍᤡᤶᤒᤠ ᤏᤖᤧᤴᤍᤪ ᤁᤣᤖᤢᤱ. ᤁᤵᤑᤢ ᤂᤠ ᥇, ᤐᤠ ᤋᤡᤸᤗᤡᤱᤃᤠ ᤋᤢᤶᤒᤠ ᤆᤴᤍᤪ ᤁᤡᤒᤣᤖ ᤂᤠᤐᤢᤅ᤻. ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱᤒᤠ ᤗᤢᤶᤔᤡᤒᤠ ᤌᤠᤣᤛᤢᤍᤡᤶᤒᤠ ᤐᤣᤪᤔ᤻ ᤕᤧᤁ᤻ᤋᤧᤴ. ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤣᤒᤠᤣ ᤆᤢᤶᤓᤠᤣᤒᤠ ᤌᤠᤣᤛᤢᤍᤡᤶᤒᤠ ᤍᤁᤧᤴᤍᤪᤛᤡᤱ ᤌᤣᤃᤡᤶ. ᤗᤠᤗᤡᤃᤢᤖᤠᤛ᤻ ᤐᤠᤱᤕᤰᤗᤢᤱᤒᤠ ᤋᤢᤶᤒᤠ ᤀᤷᤈᤢᤏ᤻ᤒᤠᤒᤢ ᤔᤠᤒᤠᤣᤜᤠᤱ . ᤋᤠᤈᤢᤒ ᤗᤠᤘᤋᤡ. ᤕᤠᤰᤌᤢᤱ ᤛᤠᤅ᤻ᤒᤠ ᤋᤱᤃᤠᤶ ᤌᤠᤣᤛᤢᤍᤡᤶᤒᤠ ᤏᤴᤍ ᤁᤴᤍᤱᤘᤠ ᤏᤢ ᤛᤣᤔᤡᤜᤠᤱ ᤗᤡᤱᤍᤧᤴᤛᤡᤖᤧ ᤏᤠᤣᤏᤡᤱᤘᤠ᤹ ᤐᤠᤏ᤻ ᤔᤧᤍᤠᤣᤏ᤻ᤍᤢᤀᤠᤱ ᤘᤕᤠ ॥
ᤕᤰᤐᤠᤱᤃᤧᤴ ᤐᤕᤶ ᤌᤡᤶᤒᤣ᤹ᤀᤠᤣ ᤆᤧᤖᤧᤱᤏᤠᤶ ᥌ ᤕᤧᤴᤎᤣ ᤛᤢᤏᤠᤜᤴ ᥍ ᤕᤧᤴᤎᤣᤀᤠᤱᤎᤠᤣ ᥏ ᤕᤧᤴᤎᤣᤌᤠᤖᤡᤰ ᥉᥎ ᤐᤠᤏ᤻ᤍᤠᤒᤠ ᤌᤠᤐ᤻ᤔᤡᤱᤜᤠᤀᤠᤣ ᤛᤠᤶᤏᤡᤃᤧᤶᤒᤠ ᤗᤠᤶᤒᤠ ᤁᤠᤷᤕᤐᤪ ᤀᤠᤣᤏ᤻ᤎᤠᤰ ᤐᤠᤣᤅᤡ ᤋᤠᤈᤧᤱ ᤀᤡᤱᤈᤠᤅ᤻ ᤐᤠᤣᤅ᤻ᤒᤠ ᤌᤠᤣᤛᤢᤍᤡᤶᤒᤠ ᤏᤡᤋᤣᤛ᤻ ᤕᤠᤰᤌᤢᤱᤒᤠᤖᤧ ᤐᤠᤋᤢᤀᤠᤱ ᤘᤠ ॥