ᤔᤠᤱᤛᤣᤒᤢᤱ; ᤛᤠᤵᤑᤧᤰᤘᤠ ᥇᥍/ ᤈᤠᤜ᤻ᤐᤠ ᤌᤢᤶᤗᤧᤴ ᤍᤔᤰ ᤐᤠᤱᤕᤁ᤻ᤗᤢᤱᤅᤠᤣ ᤋᤠᤏ᤻ᤍᤡᤰ ᤛᤠᤵᤑᤧᤰᤘᤠ ᥇᥎ ᤕᤧᤴᤍᤣᤀᤠᤱᤎᤠᤣ ᥇᥏ ᤕᤧᤴᤍᤣᤎᤠᤖᤡᤰ ᤑᤰᤋᤠᤱᤗᤢᤱ ᤛᤠᤰᤌᤡᤶᤃᤧᤴ ᤛᤕᤅ᤻ᤗᤧᤴ ᤋᤱᤜᤡᤀᤠᤣ ᤕᤠᤰᤌᤢᤱ ᤛᤠᤶᤗᤠᤣ ᤔᤠᤍᤱᤏᤠᤶ ᤔᤧᤴᤍᤱᤍᤱ ᤌᤡᤶᤒᤣᤏᤢᤛᤠᤣᤖᤡ ᤐᤠᤣᤅ᤻ᤗ ᤐᤳ ॥
“ᤕᤠᤰᤌᤢᤱ ᤛᤠᤶᤗᤠᤣ ᤛᤠᤶᤗᤠᤣᤖᤡ ᤖᤠᤣ ᥄ ᤛᤠᤶᤗᤠᤣᤀᤡ ᤗᤠᤣᤀᤡ ᤗᤠᤶᤗᤠᤣᤖᤡ ᤖᤠᤣ ᥄᥄” ᤁᤧᤖ᤹ᤒᤠ ᤀᤡᤰᤆᤢᤶᤏᤢᤛᤠᤣᤖᤡ ᤌᤡᤶᤒᤣᤀᤠᤣ ᤜᤠᤰᤏᤠᤔ᤻ᤒᤠ ᤔᤡᤱᤙᤠᤣᤍᤡᤱᤒᤠ ᤕᤠᤰᤌᤢᤱ ᤛᤠᤶᤔᤧᤵᤐᤠ-ᤛᤠᤶᤔᤧᤵᤔᤠᤜᤠ᤹ᤖᤧ ᤐᤠᤗᤠᤶ. ᤜᤠᤰᤐᤠᤖᤠᤩ. ᤂᤠᤩᤗᤡ. ᤔᤠᤱᤄ. ᤛᤡᤘᤠᤂᤠᤜᤢᤴ. ᤋᤠᤶᤁᤠᤩ ᤜᤧᤰᤋᤶᤒᤠ ᤁᤢᤄᤧᤶᤒᤏᤢ ᤕᤠᤰᤌᤢᤱ ᤛᤠᤶᤗᤠᤣᤜᤠ᤹ ᤛᤢᤏᤠᤍᤠᤣᤏ᤻ ᤐᤠᤣᤅ᤻ᤒᤠ ᤐᤠᤣᤅ᤻ᤒᤠᤘᤠ ॥ ᤁ᤹ᤏᤠ ᤐᤠᤃᤴ ᤛᤠᤶᤗᤠᤣᤜᤠ᤹ ᤕᤠᤰᤌᤢᤱ ᤛᤠᤵᤙᤰᤁᤠᤣ ᤐᤧᤴᤕᤢᤰᤗᤧ ᤏᤠᤘᤠᤀᤠᤣ ᤙᤰᤏᤡᤔ᤻ ᤔᤧᤒᤠᤣᤅ᤻ ॥
ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤆᤢᤶᤓᤠᤣᤍᤡᤱ ᤌᤠᤣᤛᤢᤎᤡᤶᤒᤠ ᤐᤪᤧᤔ᤻ ᤕᤧᤁ᤻ᤋᤧᤴᤗᤧᤴ ᤋᤢᤶ ᤋᤖᤣᤀᤠᤣ ᤁᤴ ᤔᤠᤍᤱᤏᤠᤶᤔᤡᤴ ᤔᤧᤴᤍᤱᤍᤱ ᤛᤠᤣᤛᤠᤣᤋ᤻ᤛᤖᤠᤅ᤻ᤏᤢ ᤛᤠᤣᤖᤡ ᤐᤠᤣᤅ᤻ᤒᤠ ᤐᤠᤣᤁ᤻ᤂᤧᤀᤠᤱ ᤘᤠ ॥ ᤁᤴ ᤌᤡᤶᤒᤣᤀᤠᤣ ᤏᤧᤐᤠᤗ᤻ ᤂᤠᤶᤒᤠᤣᤅ᤻-ᤗᤢᤱᤒᤠᤣᤅ᤻ᤒᤠ ᤔᤠᤈᤢᤶᤓᤠᤣ. ᤂᤠᤶᤒᤠᤣᤅ᤻-ᤗᤢᤱᤒᤠᤣᤒᤠ ᤛᤢᤘᤠᤱᤃᤧᤴ ᤆᤢᤶᤓᤠᤣᤜᤠ᤹ ᤀᤠᤱ ᤐᤎᤠᤐ᤻ᤐᤠ ᤋᤖᤣ ᤔᤧᤍᤠᤀᤠᤱ ᤀᤠᤒᤠᤱᤅᤣ ᤕᤠᤶᤏᤡᤱᤘᤠ᤹ ᤏᤢ ᤏᤠᤣᤏᤡᤱᤘᤠ᤹ ᤐᤡ᤹ᤛᤡᤱᤍᤠᤁ᤻ ᤌᤡᤶᤒᤣ ᤐᤠᤣᤅ᤻ᤒᤠᤘᤠ ᤃᤪ ᤕᤢᤏ᤻ᤇᤡᤰ ᤛᤠᤰᤌᤡᤶᤃᤧᤴ ᤛᤠᤶᤗᤠᤣ-ᤗᤠᤅ᤻ ᤌᤡᤶᤒᤣᤜᤠ᤹ ᤛᤢᤏᤠᤍᤠᤣᤏ᤻ ᤐᤠᤣᤅ᤻ᤗ ᤐᤳ ॥
ᤜᤧᤰᤁᤣᤖᤡᤰᤁᤣ ᤁᤢᤍᤠᤏ᤻ᤍᤡᤰᤐᤠ ᤕᤧᤴ (ᤛᤠᤵᤑᤧᤰᤘᤠ ᥇᥏ ᤕᤧᤴᤍᤣ) ᤕᤠᤰᤌᤢᤱ ᤜᤠᤰᤏᤠᤔ᤻ᤓᤣᤒᤠ ᤛᤠᤶᤗᤠᤣ ᤔᤠᤱᤛᤡᤘᤠᤂᤠᤜᤢᤴ ᤏᤢ ᤋᤠᤶᤁᤠᤩ ᤐᤧᤴᤕᤢᤰᤐᤠ ᤛᤠᤶᤗᤠᤣᤜᤠ᤹ᤖᤧᤴ ᤆᤠᤣᤁ᤻ᤙᤰᤂᤠ᤹ ᤛᤢᤏᤠᤍᤠᤣᤏ᤻ ᤐᤠᤣᤅ᤻ᤒᤠ ᤐᤠᤣᤁ᤻ᤂᤧᤀᤠᤱ ᤘᤠ ॥ ᤂᤧ᤹ᤀᤠᤣ ᤔᤠᤱᤛᤡᤘᤠᤂᤠᤜᤢᤴ ᤛᤠᤶᤗᤠᤣᤖᤧᤴ ᤆᤠᤣᤁ᤻ᤙᤰ ᤁᤡᤖᤠᤋ᤻ ᤛᤠᤶᤕᤠᤣ-ᤛᤠᤰᤌᤡᤶ ᤁᤠᤣᤶᤓᤠᤣᤛᤠᤒᤠ/ᤛᤠᤵᤆᤧᤱᤛᤠ ᤖᤔᤧᤛ᤻ ᤋᤢᤶᤒᤠᤐᤠᤣᤖᤧ ᤜᤧᤰᤁᤠᤩᤱ ᤋᤠᤶᤔᤠᤩ ᤛᤠᤶᤗᤠᤣᤖᤧᤴ ᤆᤠᤣᤁ᤻ᤙᤰ ᤕᤁ᤻ᤁᤧᤴ ᤛᤠᤶᤔᤢᤰᤐᤠ ᤛᤠᤃᤖ᤻ ᤁᤣᤖᤢᤱᤗᤧᤴ ᤛᤢᤏᤠᤍᤠᤣᤏ᤻ ᤆᤠᤣᤃᤢᤖ ᤐᤳ ॥ ᤛᤠᤶᤏᤡᤒᤠ ᤏᤧᤵᤑᤠᤱᤗᤧᤴ ᤆᤠᤣᤁ᤻ ᤙᤰᤛᤶᤎᤠᤱ ᤆᤰᤛᤠᤵᤛᤠᤒᤠ ᤗᤇᤠᤔᤡ ᤛᤣᤖ᤻ᤔᤠ ᤐᤠᤐᤠᤣᤖᤧ ᤔᤠᤱᤛᤡᤘᤠᤂᤠᤜᤢᤴ ᤛᤠᤶᤗᤠᤣ ᤏᤢ ᤕᤠᤛᤣᤗᤡ ᤕᤠᤣᤱᤜᤠᤱᤗᤧ ᤋᤠᤶᤁᤠᤩ ᤛᤠᤶᤗᤠᤣᤖᤧᤴ ᤆᤰᤛᤠᤵ ᤆᤠᤣᤁ᤻ᤛᤢᤛᤡᤖ ᤐᤳᤇᤡ ॥ ᤁᤴ ᤌᤡᤶᤒᤣᤸᤗᤧ ᤔᤠᤍᤱᤏᤠᤶᤔᤡᤴ ᤕᤠᤱᤘᤠᤃᤧᤴ ᤏᤠᤘᤠᤀᤠᤣ ᤁᤢᤏᤢᤶ ᤆᤠᤣᤃᤢᤒᤠ ᤘᤠ ᤃᤪ ᤕᤢᤏ᤻ᤇᤡᤰ ᤕᤠᤶᤔᤠᤣ ᤔᤡᤱᤙᤠᤣᤍᤡᤱᤒᤠ ᤛᤠᤶᤔᤧᤵᤐᤠ-ᤛᤠᤶᤔᤧᤵᤔᤠᤜᤠ᤹ᤖᤧ ᤛᤠᤶᤗᤠᤣ-ᤗᤠᤅ᤻ᤜᤠ᤹ ᤔᤧᤛᤁ᤻ᤂᤢᤒᤠ ᤐᤠᤣᤁ᤻ᤂᤧᤀᤠᤱ ᤘᤠ ॥
ᤁᤴ ᤆᤠᤣᤁ᤻ ᤙᤰ ᤌᤡᤶᤒᤣᤖᤧᤴ ᤋᤱᤜᤡᤒᤠ ᤛᤠᤵᤆᤧᤱᤛᤠ ᤀᤠᤱᤒᤢᤜᤠᤱ ᤀᤒᤠᤣᤎ᤻ ᤀᤒᤡᤖᤗ᤻ ᤕᤢᤱ ᤃᤪ ᤑᤖᤰ ᤀᤠᤕᤠᤶᤒᤠ ᤛᤠᤶᤒᤠ ᤈᤡᤋᤧᤴ ᤐᤴᤎᤠᤁ᤻ ᤛᤠᤱᤛᤣᤏ᤻ᤗᤧ ᤀᤡᤈᤠᤃᤢᤒᤠ ᤐᤠᤣᤁ᤻ᤂᤧᤀᤠᤱ ᤘᤠ ॥
ᤏᤧᤳᤇᤧᤴ ᤐᤠᤣᤅ᤻ᤒᤠ ᤁᤴ ᤑᤰᤋᤠᤱᤗᤢᤱ ᤛᤠᤰᤌᤡᤶᤃᤧᤴ ᤐᤠᤱᤃᤢᤍᤧᤴ ᤌᤠᤣᤛᤢᤎᤡᤶᤒᤠ ᤐᤢᤷᤏ ᤁᤢᤔᤠᤖ᤻ ᤛᤣᤖ᤻ᤔᤠ ᤕᤠᤍᤴ ᤏᤢᤏᤠᤶᤗᤧᤴ ᤆᤢᤶᤗᤢᤱᤍᤠᤱᤅᤠᤣ ᤐᤠᤣᤅ᤻ᤗ ᤐᤳ ॥
