ᤛᤠᤵᤑᤧᤰᤘᤠ ᥍, ᤔᤠᤱᤛᤣᤒᤢᤱ / ᤛᤡᤔᤡᤁ᤻ᤗᤢᤱᤅᤠᤣ ᤁᤢᤛᤱ ᤌᤡᤶ ᤕᤢᤰᤂᤢᤱᤅᤠᤱ ᤐᤣᤁᤠᤖ ᤐᤳᤋᤠ᤹ᤀᤠ – ᤛᤠᤶᤕᤠᤣᤌᤠᤁᤢ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤀᤠᤳᤔᤠᤏᤴᤍ ᤛᤣᤀᤡᤱ
ᤋᤃᤡᤒᤠ ᤋᤱᤒᤣ ᤜᤣᤰᤁᤣᤀᤠᤣ ᤁᤴ ᤋᤱᤒᤣᤀᤠᤱ ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢᤔᤠᤔᤠᤱ ᤛᤠᤶᤒᤠ ᤐᤒᤡᤋᤪᤜᤠᤱᤔᤠ ᤗᤡᤱᤍᤧᤴᤖᤧ ᤛᤠᤘᤠᤏ᤻ ᤋᤱᤏᤠᤶ ᤋᤠᤣᤛᤡᤱᤅᤠᤱ ᤘᤠ ॥ ᤔᤠᤱᤛᤣᤒᤢᤱᤅᤠᤣ ᤁᤣᤍᤠᤣᤛᤡᤱᤒᤠ ᤁᤴ ᥌᥎ ᤛᤡᤃᤣᤁ᤻ᤐᤠ ᤐᤕᤶ ᤋᤱᤏᤠᤶᤀᤠᤣ ᤛᤡᤔᤡᤁ᤻ᤗᤢᤱ ᤁᤢᤍᤡᤶᤒᤠ ᤛᤠᤶᤕᤠᤣᤛᤠᤜᤠ᤹ ᤌᤡᤶᤒᤣ᤹ ᤋᤱᤏᤠᤶᤔᤠᤣ ᤔᤧᤍᤩᤠᤀᤠᤱ ᤔᤧᤘᤕᤠ ॥ ᤛᤠᤶᤕᤠᤣ ᤌᤠᤁᤢᤖᤣ ᤔᤢᤀᤡᤐᤠᤏ᤻ ᤌᤠᤛᤢᤸᤗᤧ ᤀᤠᤰᤂᤣᤏᤢ ᤛᤠᤶᤕᤠᤣ ᤛᤠᤰᤌᤡᤶ ᤏᤢᤖᤡᤰᤁᤠᤱ ᤆᤠᤣᤁ᤻ᤔᤠ ॥ ᤁᤡᤖᤠᤋ᤻ ᤛᤠᤶᤕᤠᤣᤀᤡᤴ ᤀᤠᤰᤁᤣᤍᤱᤒᤠ ᤔᤠᤖᤠᤶᤒᤣ ᤁᤖ᤹ᤒᤠ ᤏᤢ ᤀᤠᤰᤂᤣᤏᤢ ᤛᤠᤶᤕᤢᤰ ᤆᤠᤣᤁ᤻ᤔᤠ ᤔᤢᤖᤢᤶ ᤛᤣᤀᤡ ᤛᤠᤣᤔ᤻ᤔᤠ ᤛᤠᤣᤛᤠᤖᤡᤰ ᤁᤢᤛᤠ᤹ᤏᤢᤖ ᤛᤠᤱᤃᤠᤶ ᤐᤣᤍᤠᤶ ᤛᤠᤶᤔᤡᤴ ᤁᤧᤵᤔᤠᤖᤧ ᤏᤠᤣᤔᤢᤀᤡᤜᤠ᤹ ᤆᤧᤰᤂᤢᤀᤠᤱ ᤘᤕᤠ ॥
ᤛᤡᤔᤡᤁ᤻ᤗᤢᤱᤅᤠᤣ ᤁᤢᤛᤱ ᤌᤡᤶ ᤕᤢᤰᤂᤢᤱᤅᤠᤱ ᤐᤣᤁ᤻ᤁᤠ᤹ᤖ ᤐᤳᤋᤠ᤹ᤀᤠ ॥ ᤛᤠᤶᤕᤠᤣ ᤛᤠᤰᤌᤡᤶ ᤋᤠᤣᤏ᤻ᤍᤢᤱᤎᤠᤱᤅᤠᤱ ᤘᤠ ॥ ᤐᤏᤠᤣᤖᤡᤰ ᤋᤡᤁ᤻ᤋᤧᤶᤔᤧ ᤗ᤹ᤖᤡᤰ ᤛᤡᤔᤡᤁ᤻ᤗᤢᤱᤅᤠᤣ ᤀᤠᤳᤗ ᤁᤣᤍᤠᤒᤠᤖ ᤁᤧᤒᤵᤐᤠ ᤐᤕᤶ ᤋᤱ ᤏᤢ ᤐᤕᤶ ᤋᤢᤱᤜᤠ᤹ᤖᤧ ᤐᤠᤏ᤻ᤍᤠᤀᤠᤣ ᤏᤢᤖᤡᤰᤁᤠᤱ ᤛᤧᤐ᤻ᤛᤡᤱᤔᤠᤖᤧ ᤐᤠᤏ᤻ᤍᤠᤀᤠᤣ ᤛᤠᤣᤛᤠᤣᤰᤖᤰ ᤀᤠᤰᤂᤣᤖᤡᤰ ᤕᤠᤶᤈᤡᤰᤁᤡᤴ ᤛᤠᤱᤛᤣᤒᤠ ᤏᤢ ᤏᤠᤣᤖᤡᤰ ᤜᤡᤱᤔᤠ ᤛᤢᤰᤋᤧᤳ ᤁᤧᤖ᤹ᤒᤠ ᤐᤠᤏᤜᤠ᤹ ᤐᤠᤋᤢᤀᤠᤱ ᤘᤠᤕᤠ ॥
ᤋᤱᤒᤣᤌᤵᤔᤠ ᤁᤧᤒᤠᤣᤅ᤻ᤒᤠ ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢ ᤏᤢ ᤌᤠᤁᤢᤔᤠᤔᤠᤱᤗᤣ ᤏᤠᤣᤔᤠᤱᤃᤧᤴᤏᤠ ᤛᤣᤘᤠ ᤋᤱᤏᤠᤔ ᤌᤡᤶᤒᤣ ᤁᤡᤖᤠᤋ᤻ ᤆᤠᤣᤋ᤻ᤗᤢᤱ ᤀᤱᤛᤡᤔᤠᤱᤃᤧᤴᤏᤠ᤹ ᤛᤣᤘᤠ ᤐᤠᤏ᤻ᤈᤢᤶᤀᤠᤣᤖᤧ ᤋᤡᤶᤒᤣᤀ ᤋᤱᤃᤠᤶ ᤆᤠᤣᤃᤢᤖᤘᤠᤒᤠ ᤌᤠᤣᤛᤢᤍᤡᤶᤒᤠ ᤁᤣᤜᤣᤖᤛᤡᤱ ᤕᤠᤣᤅ᤻ᤜᤠᤱᤗᤧ ᤐᤠᤋᤢ ॥
ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢᤔᤠᤔᤠᤱᤖᤧ ᤔᤡᤱᤛᤠᤣᤀᤠᤣ ᥇᥊ ᤛᤡᤃᤣᤁ᤻ᤐᤠ ᤐᤒᤡᤋᤪᤜᤠᤱᤔᤠ ᤗᤠᤱᤑᤱᤃᤠ ᤁᤵ ᤀᤡᤈᤠᤁ᤻ ᤐᤠᤣᤂᤠᤀᤠᤱ ᤘᤠᤕ ॥ ᤛᤠᤶᤑᤧᤰᤘᤠ ᥆᥈ ᤏᤠᤶᤗᤧ ᤑᤠᤀᤡᤡᤏᤗ ᤁᤧᤒᤠᤣᤅ᤻ᤒᤠ ᤆᤠᤋ᤻ᤀᤠᤣ ᤁᤴᤁᤠᤀᤡ ᤏᤃᤖ ᤐᤠᤗᤡᤁᤠ ᤈᤠᤐᤠ ᤏᤢ ᤔᤠᤏᤣᤓᤴᤈᤕᤩᤠᤱ ᤍᤠᤖᤈᤡᤗᤡᤱᤖᤣ ᤔᤧᤈᤠᤋᤢᤀᤠᤱ ᤔᤧᤘᤕᤠ ॥ ᥉-᥇ ᤐᤠᤣᤅ᤻ᤅᤡ ᤔᤠᤏᤣᤓᤴᤈᤩᤠᤱᤗᤣ ᤋᤠᤣᤃᤢ ॥
ᤆᤠᤋ᤻ ᤁᤣᤍᤠᤣᤁ᤻ᤐᤠ ᤔᤠᤏᤓᤴᤈᤩᤠᤱᤗᤣ ᥉ ᤗᤠᤱᤅᤣᤴ ᥇ ᤁᤡᤵ ᤀᤠᤱ ᥌᥎ ᤕᤠᤱ ᤋᤪᤑᤡ, ᤔᤣᤍᤗ ᤏᤢ ᤛᤠᤰᤂᤣᤛᤰ ᤔᤣᤄᤠᤣᤛᤢ ॥ ᤑᤠ᤹ᤋᤠᤣᤁ᤻ᤛᤠᤒᤠ ᤁᤴᤁᤠᤀᤡᤖᤧ ᥈ ᤗᤠᤱᤅᤣᤴ ᥇ ᤁᤡᤵ ᥌᥎ ᤕᤠᤱ ᤏᤢ ᤋᤪᤑᤡ, ᤔᤣᤍᤗ ᤏᤢ ᤛᤠᤰᤂᤣᤛᤰ ᤔᤧᤄᤠᤣᤛᤢᤀᤠᤱ ᤘᤕᤠ ॥
