ᤁᤡᤖᤠᤋ᤻ ᤛᤠᤶᤕᤠᤣ ᤌᤠᤁᤢ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤀᤠᤳᤔᤠᤏᤴᤍ ᤛᤣᤀᤡᤱᤗᤧ ᤒᤡᤁᤪᤶ ᤋᤱᤒᤣ ᥈᥆᥎᥆ ᤁᤁ᤻ᤗᤧᤰᤘᤠ ᥆᥌ ᤏᤠᤶᤗᤧ ᤕᤠᤶᤔᤠ ᤁᤡᤖᤠᤋ᤻ ᤛᤠᤶᤕᤠᤣᤖᤧ ᤔᤢᤖᤢᤶᤃᤧᤴ ᤋᤧᤏ᤻ ᤔᤠᤱᤛᤣᤒᤢᤱᤀᤠᤣ, ᤛᤠᤘᤠᤕᤧᤜᤠᤱ ᤁᤡᤖᤠᤋ᤻ ᤂᤡᤒᤣᤁ᤻ᤘᤠ ᤕᤠᤰᤘᤠ ᤛᤣᤘᤠ ᤏᤢ ᤔᤠᤱᤘᤠ ᤜᤠᤱᤘᤠ ᤜᤠᤔᤠ ᤐᤕᤶ ᤌᤡᤶᤒᤣᤖᤧ ᤛᤢᤕᤧᤶᤔᤠᤣ ᤌᤠᤛᤢᤒᤠ ᤏᤠᤣᤔᤢ᤹ᤀᤡ ᤐᤠᤏ᤻
ᤆᤢᤰᤔᤢᤰᤁᤠᤣ ᤐᤠᤏ᤻ᤗᤧᤱ ᤁᤧᤈᤠᤣᤁ᤻ᤐᤠ : ᤛᤢᤏᤡᤗ ᤛᤣᤖ᤻ᤔᤠ (ᤏᤠᤣᤛᤠᤅ᤻)
ᤀᤠᤣᤳ ᤋᤠᤃᤧᤖᤠ ᤏᤡᤱᤘᤠᤓᤢᤔᤠᤱᤅᤣ ᤛᤣᤘᤠᤖᤠᤣ ॥
ᤀᤤᤏ᤻ ᤀᤠᤏᤡ᤹ ᤐᤕᤶ ᤋᤱᤏᤠᤶ ᤂᤡᤒᤣᤁ᤻ᤘᤠ ᤕᤠᤰᤘᤠ ᤛᤣᤘᤠᤀᤠᤣ ᤀᤠᤈᤢᤵᤛᤠᤀᤠᤱ ᤀᤠᤘᤠ ॥ ᤕᤠᤰᤘᤠ ᤛᤣᤘᤠ ᤑᤠ᤹ᤀᤡᤴ ᤀᤠᤏᤡ ᤌᤠᤁ᤻ᤕᤢᤌᤡᤶᤏᤢ ᤛᤠᤣ ᤐᤠᤣᤂᤠᤖ ᤕᤠᤒᤠ ॥ ᤆᤠᤒᤠᤗᤡ ᤏᤢ᤹ᤖ ᤑᤠ᤹ᤀᤠᤱ ᤆᤠᤣᤁ᤻ᤏᤒᤠ ᤁᤴ ᤛᤣᤘᤠᤖᤧ ᤁᤢᤜᤣᤁ᤻ᤛᤡᤱ ᤐᤠᤣᤂᤠᤀᤠᤱᤎᤠᤣ ᤁᤴ ᤀᤠᤏᤡ᤹ ᤋᤧᤴᤀᤠᤣ ᤆᤠᤒᤠᤗᤡ ᤏᤢ᤹ᤠ ᤐᤵᤔᤠ ᤜᤣᤁ᤻ᤋᤠᤀᤠᤱ ᤘᤠ ॥ ᤁᤴ ᤛᤣᤘᤠᤏᤢ ᤀᤠᤸᤛᤠᤱ ᤐᤠᤏᤠᤣᤖᤡᤰ ᤆᤠᤣᤁ᤻ᤔᤠᤀᤠᤱ ᤋᤣ᤹ᤔᤠᤐᤠᤣᤅ᤻ ॥ ᤛᤡᤔᤡᤁ᤻ᤗᤢᤱᤒᤠ ᤕᤁ᤻ ᤗᤠᤈᤣ᤹ᤜᤠ᤹ᤀᤠᤣᤏᤢ ᤁᤧᤍᤧᤀᤡᤀᤠᤱ ᤁᤧᤘᤕᤡ ॥ ᤀᤠᤀᤡ᤹ ᤐᤠᤱᤓᤣ᤹ᤀᤠᤣ ᤛᤢᤖᤡᤋ᤻ᤖᤰ ᤜᤢᤛᤠᤱ. ᤏᤠᤶᤗᤰ ᤛᤧᤛᤠᤱ ᤕᤠ ᤘᤜᤡᤋ᤻ᤗᤰ ᤌᤠᤛᤠᤱ ᤔᤧᤏᤢ᤹ᤏᤧᤴ ᤜᤧᤸᤗᤧ ᤆᤠᤣᤃᤢᤸᤗᤧ ᤔᤠᤱᤀᤠᤣ ᤛᤣᤘᤠ ᤋᤠᤔ᤻ᤔᤠ ᤀᤡᤸᤗᤡᤶᤔᤡᤴ ᤏᤣ ᤕᤠᤰᤘᤠ ᤛᤣᤘᤠᤖᤠᤣ ॥
ᤅᤠᤖᤠᤔᤢᤰᤔᤠᤱ ᤁᤢᤍᤱᤒᤠ ᤐᤠᤣᤅ᤻ᤅᤡᤸᤗᤧ ᤔᤧᤴᤇᤠᤶᤃᤧᤴ ᤏᤠᤶᤕᤠᤵᤔᤡᤖᤧᤀᤠᤣ ᤁᤢᤍᤱᤒᤠ ᤌᤠᤣᤒᤠᤣ ᤀᤠᤒᤠᤣᤅ᤻ᤗ ॥ ᤁᤴ ᤋᤧᤴᤏᤡᤴ ᤑᤰᤋᤠᤱᤗᤢᤱᤏᤢ ᤆᤰᤔᤧᤴᤒᤢ᤹ᤀᤣ ᤏᤠᤶᤔᤧᤇᤡᤱᤅᤠᤱ ᤏᤧ ॥ ᤕᤠᤱᤏᤡᤶᤖᤧ ᤁᤠᤵᤔᤧᤳᤋᤢᤒᤠ ᤆᤠᤣᤁ᤻ ॥ ᤁᤧᤖᤧᤰ ᤏᤠᤶᤕᤠᤵᤔᤡᤛᤠᤀᤠᤣ ᤔᤠᤱᤘᤠ ᤜᤠᤱᤘᤠ ᤀᤠᤠᤃᤢᤱᤗ ॥ ᤛᤡᤔᤡᤁ᤻ᤗᤢᤅᤠᤣ ᤕᤶᤒᤠ ᤏᤠᤘᤠᤒᤠ ᤋᤢᤱᤜᤠ ᤔᤧᤍᤠᤏᤧᤸᤗ ᤛᤡᤔᤡᤁ᤻ᤗᤢᤱᤅᤠᤣ ᤛᤏᤠᤖᤢᤱ ᤐᤠᤣᤅ᤻ᤗ ᤗ᤹ᤖᤡᤰ ᤛᤣᤘᤠ ᤀᤠᤈᤠᤣᤃᤠᤀᤠᤱ ᤀᤠᤘᤠ ॥ ᤏᤡᤛ᤻ᤛᤣᤜᤠᤱᤔᤠ ᤑᤗᤠᤶᤛᤡᤱ ᤒᤠᤁᤴᤋᤧᤴᤏᤠᤣ ᤛᤠᤘᤠᤏ᤻ᤇᤡᤱᤒᤠ ॥ ᤜᤢᤏᤧ᤹ ᤁᤧᤖᤧᤰᤗᤧ ᤗᤠᤕᤠᤣ (ᤜᤡᤱᤛᤠ) ᤆᤠᤣᤁ᤻ᤔᤠᤔᤧᤏ᤻ ᤗ᤹ᤖᤡᤰ ᤐᤣᤗᤡ ᤋᤠᤣᤏ᤻ᤏᤡᤱ ॥
ᤁᤡᤖᤠᤋ᤻ ᤛᤠᤶᤕᤠᤣ ᤛᤠᤀᤠᤣ ᤕᤖᤡᤰᤁᤣ ᤏᤠᤣᤛᤠᤅ᤻ ᤕᤢᤱᤛᤡᤱᤅᤠᤱ ᤘᤠ ॥ ᤁᤴ ᤘᤠᤏᤠᤶᤀᤠᤱ ᥇᥆᥆ /᥈᥆᥆ ᤋᤱᤒᤣ ᤋᤃᤡᤒᤠ ᤕᤠᤵᤔᤡᤜᤠ᤹ ᤕᤁᤖᤡᤰ ᤔᤧᤜᤡᤱᤅᤠ ॥ ᤌᤠᤩᤱᤑᤠ᤹ᤀᤡᤸᤗᤧ ᤜᤧᤴ ᤕᤠᤶᤔᤠᤣ ᤅᤠᤖᤠᤔᤢᤰᤔᤠᤱ ᤛᤣᤛᤣᤒᤠ ᤘᤕᤠ ॥ ᤕᤖᤡᤰ ᤜᤡᤱᤔᤠᤖᤧ ᤛᤣᤛᤣᤒᤠᤀᤠᤱ ᤐᤠᤣᤅ᤻ᤔᤠ ᤐᤠᤣᤅ᤻ ॥ ᤆᤠᤔᤔᤠ ᤌᤡᤔᤔᤠ ᤆᤠᤜᤠ᤹ ᤆᤠᤔᤠ ᤌᤢᤱᤔᤠ ᤔᤧᤏᤢ᤹ᤏᤧᤴ ॥ ᤀᤠᤈᤠᤶᤗ ᤀᤠᤘᤠᤛᤠᤱ ᤕᤧ᤹ᤕᤠᤁᤠᤱ ᤆᤠᤔᤠ ᤌᤢᤱᤔᤠᤀᤠᤱ ᤗᤧᤔᤠ ᤐᤠᤣᤅ᤻ ᤁᤴᤜᤠ᤹ᤀᤠᤣ ᤏᤠᤣᤛᤠᤅ᤻ ᤁᤵᤔᤠᤐᤠᤣᤅ᤻ ॥
ᤀᤠᤱᤃᤠ᤹ ᤀᤠᤏᤠᤣᤛᤠᤅ᤻ᤀᤠᤣ ᤆᤠᤖᤧ ᤔᤢ᤹ᤀᤡ ᤐᤠᤏᤠᤣᤒᤠ ᤘᤠ ॥ ᤁᤖ ᤔᤧᤴᤇᤠᤶᤃᤧᤴ ᤏᤠᤶᤕᤠᤵᤐᤔᤡᤖᤧ ᤔᤢ᤹ᤀᤡ ᤜᤠᤣᤐ᤻ ॥ ᤔᤧᤴᤇᤠᤶᤃᤧᤴ ᤏᤠᤶᤕᤠᤵᤔᤡᤖᤧ ᤔᤢ᤹ᤀᤡᤀᤠᤠᤱ ᤔᤠᤱᤀᤠᤣ ᤏᤠᤁ᤻ᤏᤠᤀᤠᤱ ᤘᤠ ॥ ᤁᤖᤛᤠ ᤀᤠᤄᤠᤣᤛᤢᤶᤒᤠ ᤜᤠᤣᤐ᤻ ॥ ᤀᤠᤏᤡ᤹ ᤕᤁ᤻ ᤜᤡᤱᤔᤠᤀᤠᤣ ᤆᤠᤔᤠ ᤌᤢᤱᤔᤠᤀᤠᤣᤀᤣ ᤛᤧᤐ᤻ᤛᤡᤱᤔᤠ ᤐᤠᤣᤅ᤻ ॥ ᤕᤠᤱ ᤌᤰᤔᤠᤖᤧ ᤏᤠᤘᤠᤀᤠᤣ ᤕᤖᤡᤰ ᤗᤠᤈᤣ᤹ᤀᤠᤣ ᤀᤏᤡ᤹ ᤔᤏᤠ ᤔᤧᤘᤠ ᤁᤖ ᤜᤧᤴᤗᤧᤴᤏᤠᤱ ᤔᤢᤀᤡ ᤜᤠᤣᤐᤐᤡᤸᤗᤃ ᤀᤠᤂᤧᤴ ᤕᤠᤱ ᤌᤰᤔᤠᤛᤠᤱ ᤔᤢᤀᤡ ᤜᤠᤣᤐ᤻ᤐᤠᤱ ᤕᤠᤱᤛᤠ᤹ ᤔᤧᤓᤏᤧᤴ ॥ ᤔᤧᤴᤇᤠᤶᤃᤧᤴ ᤏᤠᤶᤕᤠᤵᤔᤡ ᤐᤠᤣᤅ᤻ᤔᤠᤖᤧ ᤁᤠ᤹ᤀᤡᤀᤠᤣ ᤛᤡᤔᤡᤁ᤻ᤗᤢᤱᤒᤠ ᤕᤁ᤻ ᤋᤧᤴᤀᤠᤣ ᤀᤠᤘᤠ ᤜᤧᤴ ᤗᤠᤈᤣ᤹ᤖᤧ ᤔᤡᤶ ᤀᤠᤔᤧᤳᤋᤠᤱᤘᤠ ॥ ᤛᤡᤔᤡᤁ᤻ᤗᤢᤱᤅᤠᤣ ᤛᤏᤠᤖᤢᤱ ᤐᤠᤣᤅ᤻ᤗ ᤗ᤹ᤖᤡᤰ ᤀᤠᤏᤡ᤹ ᤀᤠᤈᤢᤵᤛᤠᤀᤠᤱ ᤀᤠᤘᤠ ॥
ᤛᤠᤶᤕᤠᤣᤀᤡᤒᤠ ᤏᤠᤣᤛᤠᤱᤗᤧᤃ ᤕᤠᤣᤓᤠᤀᤡᤴ ᤁᤢᤏᤢᤵᤐᤔᤠ ᤕᤧᤶᤔᤠᤣ ᤁᤧᤖᤠᤀᤠᤱ ᤘᤠᤒᤠ ᤏᤠᤣᤛᤠᤱ ᤘᤠ ॥ ᤁᤴᤏᤡᤴ ᤔᤠᤱᤛᤣᤘᤠᤖᤧᤖᤰ ᤋᤰᤋᤢ᤹ ॥ ᤀᤠᤸᤗᤠᤣ ᤁᤡᤖᤠᤋ᤻ ᤛᤠᤶᤕᤠᤣᤛᤠᤜᤠ᤹ ᤛᤡᤔᤡᤁ᤻ᤗᤢᤱ ᤛᤠᤏᤠᤖᤢᤱ ᤏᤢ ᤔᤧᤴᤇᤠᤶᤃᤧᤴ ᤏᤠᤶᤕᤠᤵᤔᤡᤖᤧ ᤋᤠᤱᤛᤧᤐ᤻ᤖᤣ ᤔᤠᤖᤠᤶᤔᤠᤣ ᤀᤠᤘᤠ ॥ ᤀᤏᤡ᤹ ᤁᤧᤖᤧᤰ ᤐᤠᤏ᤻ᤏᤠᤣ ᤏᤠᤣᤛᤠᤅ᤻ ᤁᤧᤵᤔᤠᤐᤠᤣᤅ ॥ ᤀᤠᤸᤗ ᤛᤠᤶᤕᤠᤣᤛᤠᤜᤠ᤹ ᤁᤧᤖᤧᤰ ᤏᤠᤣᤛᤠᤅ᤻ᤒᤠ ᤁᤣᤒᤠᤣᤂᤡ ᤁᤧᤖ᤹ᤒᤠ ᤏᤡᤱᤛᤠᤱ ᤆᤠᤣᤃᤢᤱᤅᤠᤱ ᤘᤠ ॥ ᤛᤡᤔᤡᤁ᤻ᤗᤢᤱᤅᤠᤣ ᤀᤠᤱᤃᤠ᤹ ᤏᤠᤈᤶ ᤕᤠᤵᤔᤡ ᤁᤧᤔᤧᤵᤐᤠ ᤏᤢ ᤜᤡᤔᤧᤋ᤻ ᤕᤠᤵᤔᤡ ᤁᤧᤔᤧᤵᤐᤠᤀᤱ ᤔᤧᤘᤠ ॥
ᤏᤡᤛ᤻ᤛᤣᤜᤠᤱᤔᤠᤖᤧ ᤜᤡᤏᤡ᤹ ᤌᤡ᤺ ᤑᤠᤰᤛᤠ ᤔᤧᤈᤣᤶᤔᤧᤴᤏᤠᤣ ᤐᤠᤋᤢᤀᤠᤱ ᤘᤠ ॥ ᤌᤠᤩᤱ ᤑᤠ᤹ᤀᤡᤸᤗᤣ ᤐᤠᤱᤓᤣ᤹ᤀᤠᤣ ᤜᤡ ᤺ᤛᤣᤐ᤻ᤔᤠ ᤁᤧᤈᤠᤒᤠ ᤘᤠᤏᤠᤶ ᤘᤕᤠ ॥ ᤀᤠᤱᤃᤠ᤹ ᤀᤠᤕᤣᤶᤔᤠᤣ ᤆᤠᤔᤠ ᤃ ᤆᤧᤶᤔᤣ ᤁᤖ ᤏᤠᤣᤛᤠᤅ᤻ ᤏᤢ ᤆᤧᤶᤔᤧ ॥ ᤔᤠᤱᤀᤠᤣ ᤔᤧᤍᤠᤣᤏ᤻ᤍᤧᤶᤔᤧᤴᤏᤧ ᤔᤧᤳᤏᤡᤱᤗᤠ ᤘᤠ ॥ ᤁᤖ ᤀᤸᤗ ᤑᤠᤰᤛᤠ ᤘᤠ᤹ᤛᤠ ᤆᤔᤠᤠ ᤔᤧᤴᤏᤢ᤹ᤏᤠ ॥ ᤛᤢᤔᤠᤀᤣ ᤔᤧᤴᤏᤢᤏᤠ ᤋᤢᤱᤜᤠ᤹ ᤐᤠᤣᤀᤠᤱ ᤐᤣᤁ᤻ᤐᤠ ᤘᤠ ॥ ᤀᤠᤱᤃᤠ᤹ ᤀᤠᤛᤠᤶᤕᤠᤣᤛᤠ ᤕᤖᤡᤰ ᤁᤧᤒᤠᤣᤖᤡᤀᤠᤅ ᤘᤠ ॥ ᤛᤠ᤺ᤕᤖᤡᤰ ᤁᤧᤈᤠᤒᤠᤖᤧ ᤐᤪᤣᤛᤖ ᤐᤠᤣᤒ ᤕᤠᤶᤍᤢᤰᤔᤠᤜᤠ᤹ ᤐᤠᤣᤀᤠᤱ ᤐᤣᤁ᤻ ᤛᤢᤖ᤻ᤋᤡ ᤌᤢᤱᤔᤠᤖᤣ ᤗᤢᤱᤔᤠ᤹ᤛᤠᤣᤔ᤻ᤜᤠ᤹ ᤕᤏ᤻ᤍᤢ ॥ ᤜᤧᤸᤗᤧ ᤆᤠᤣᤃᤢᤸᤗᤧ ᤀᤠᤱᤃᤠ᤹ ᤏᤠᤣᤛᤠᤅ᤻ ᤁᤧᤳᤋᤧᤶᤔᤧᤀᤠᤱ ᤆᤧᤶᤔᤧ ᤔᤧᤳᤏᤡᤱᤅᤠᤱ ᤘᤠ ॥
ᤀᤠᤏᤡ᤹ ᤛᤠᤶᤕᤠᤣᤛᤠᤖᤧ ᤔᤠᤱᤘᤠ ᤀᤠᤄᤠᤣᤖ ᤜᤠᤱᤘᤠ ᤀᤠᤄᤠᤣᤖ ᤗ᤹ᤖᤡᤰ ᤔᤠᤱᤅᤠᤣ ᤀᤠᤏᤠᤁ᤻ᤋᤢᤶᤔᤠᤱ ᤘᤠ ॥ ᤜᤧᤴᤜᤠ᤹ ᤁᤧᤖᤧᤰ ᤁᤧ᤹ ॥ ᤁᤖ ᤜᤧᤴ ᤁᤧᤳᤋᤡᤸᤗᤧ ᤆᤠᤔᤠ ᤌᤢᤱᤔᤠ ᤆᤠᤖᤧ ᤀᤠᤏᤡ᤹ ᤜᤡᤱᤔᤢ᤹ᤀᤡ ᤛ᤹ᤛᤡᤱ ᤜᤧᤸᤗᤧ ᤆᤠᤣᤃᤢᤸᤗᤧ ᤏᤠᤣᤛᤠᤅ᤻ ᤁᤧᤵᤔᤠᤐᤠᤣᤅ᤻ ॥ ᤛᤠᤶᤕᤠᤣ ᤛᤠᤰᤌᤡᤶ ᤏᤢ ᤛᤠᤵᤙᤰᤖᤧ ᤐᤠᤏ᤻ᤜᤠ᤹ ᤐᤠᤏ᤻ᤜᤠ᤹ ᤀᤡᤱᤛᤣᤆᤠᤣᤁ᤻ᤁᤡ ᤑᤠᤣᤛᤢᤱᤗ ᤋᤣ᤹ᤖᤱᤗ ᤐᤣᤃᤠᤱᤅᤡᤸᤗᤣ ᤕᤖᤡᤰᤁᤣ ᤕᤢᤰᤑᤠᤣᤖᤧᤀᤠᤱ ᤜᤶᤓᤠᤣ ᤐᤡᤖᤠᤱᤅᤠᤱ ᤘᤠ ॥ ᤁᤖᤛᤠᤱ ᤀᤠᤱᤅᤃᤠ᤹ ᤁᤴ ᤏᤡᤛ᤻ᤛᤣᤜᤠᤱᤔᤠᤖᤧ ᤔᤠᤗᤠᤶᤔᤡᤴ ᤑᤠᤣᤛᤢᤱᤗᤀᤣ ᤋᤣ᤹ᤖᤢᤱ ᤀᤠᤸᤗᤠᤣ ᤀᤰᤋᤶᤒᤠ ᤋᤧᤴ ᤘᤠᤏᤠᤶᤀᤠᤣ ᤀᤠᤃᤧᤖᤠᤀᤱ ᤀᤠᤘᤠ ॥
ᤁᤴ ᤕᤠᤣᤓᤠᤀᤠᤣ ᤔᤧᤴᤏᤡ ᤆᤄᤵ ᤛᤡᤔᤡᤁ᤻ᤗᤢᤱ ᤌᤱᤏᤣ ᤐᤠᤣᤅ᤻ᤒᤡ ᤑᤠ᤹ᤀᤠᤱ ᤁᤡᤀᤠᤖ ᤘᤠᤀᤠ ॥ ᤔᤧᤴᤏᤧᤓᤃᤖ ᤀᤠᤏᤡ᤹ ᤜᤡᤴᤍᤠᤣᤁ᤻ ᤀᤡᤈᤠᤁ᤻ᤔᤠᤃ ᤐᤏᤠᤣᤒᤠ ᤘᤏᤠᤶ ᤘᤠ ॥ ᤗᤠᤃᤠᤵᤖᤧ ᤌᤠᤣᤒᤠᤣᤐᤠᤣᤅ᤻ᤗ ᤐᤣᤁ᤻ ॥ ᤀᤠᤸᤗᤠᤣ ᤕᤠᤱᤁᤧᤛᤠ᤹ᤒᤠ ᤜᤠ᤹ᤀᤠᤱ ᤁᤧᤃᤵᤐᤠ ᤁᤧᤈᤠᤒᤠ ᤔᤧᤒᤠᤣᤂᤠᤀᤠᤱ ᤔᤧᤘᤠ ॥ ᤕᤧᤶ ᤁᤢᤍᤱᤒᤠ ᤀᤠᤏᤡ᤹ ᤆᤠᤣᤁ᤻ᤔᤠ ᤐᤠᤐ᤻ᤔᤠᤸᤗᤧ ᤐᤠᤣᤅ᤻ ॥ ᤀᤠᤏᤡ᤹ ᤛᤠᤔᤧᤴᤇᤠ᤹ᤜᤠ᤹ ᤆᤠᤔᤠ ᤌᤢᤱᤔᤠ. ᤔᤧᤴᤈᤠᤔᤠ ᤆᤠᤜᤠ᤹ᤀᤠᤣᤏᤢ ᤛᤠᤖᤡᤰᤁᤣ ᤛᤧᤐ᤻ᤔᤠᤛᤡᤐᤠᤣᤅ᤻ ॥ ᤀᤠᤔᤒᤠ ᤆᤠᤜᤠ᤹ ᤕᤖᤡᤰ ᤐᤖᤡᤰᤐᤠ ᤘᤠ ॥ ᤛᤠᤔᤧᤴᤇᤠᤜᤠ᤹ ᤆᤠᤔᤔᤠ ᤌᤡᤔᤔᤠᤀᤠᤣ ᤑᤧ᤹ᤔᤧᤗᤠ᤹ᤏᤧᤓᤃᤖ ᤀᤠᤏᤡ᤹ ᤋᤠᤕᤧᤶ ᤔᤠᤰᤌᤔ᤻ᤒᤠ ᤐᤠᤣᤅ᤻ ॥ ᤏᤡᤛ᤻ᤛᤣᤜᤠᤱᤔᤠᤖᤧ ᥇᥏᥎᥎ ᤋᤱᤒᤣᤀᤠᤣ ᤗᤌᤡᤰ ᤏᤡᤛ᤻ᤛᤣ ᤛᤠᤶᤕᤠᤣ ᤙᤰ ᤀᤡᤓᤢᤋᤢᤀᤠᤱ ᤘᤕᤠ ॥ ᤛᤠᤈᤣᤗᤡ ᤛᤱᤔᤠ ᤆᤠᤔᤠᤛᤡᤔᤧᤴ ᤁᤧᤖ᤹ᤒᤠ ᤐᤠᤣᤂᤠᤛᤠᤱ ᤋᤠᤏ᤻ᤍᤡ ᤜᤁ᤻ᤋ᤹ᤒᤠ ᤀᤢᤅ᤻ᤔᤠ ᤆᤠᤔᤠ ᤔᤣᤜᤣᤁ᤻ᤋᤢᤀᤠᤱ ᤌᤡᤶᤔᤡᤴ ᤑᤧ᤹ᤗᤠᤖᤧᤖ ᤐᤣᤃᤠ ॥ ᤜᤧᤰᤋᤶᤒᤠ ᤌᤡᤶᤜᤠ᤹ ᤗᤧᤵᤔᤠᤖ ᤋᤠᤣᤏ᤻ᤈᤠᤣ ᤐᤠᤣᤅ᤻ᤔᤠᤖ ᤐᤣᤁ᤻ᤔᤠᤐᤠᤣᤅ᤻ ॥
ᤀᤤᤏ᤻ ᤛᤠᤖᤡᤰ ᤀᤠᤛᤡᤖᤠ᤹ ᤌᤠᤔᤠᤱᤀᤠᤱ ᤘᤠ ॥ ᤛᤠᤰᤌᤡᤶᤔᤡᤒᤠ ᤀᤠᤣᤏ᤻ᤎᤠᤱᤜᤠ᤹ᤖᤣ ᤛᤧᤰᤂᤠᤀᤣ ᤕᤖᤡᤰ ᤐᤠᤏ᤻ᤜᤠ᤹ ᤀᤠᤣᤏ᤻ᤎᤠᤰ ᤀᤠᤈᤠᤣᤃᤢᤶᤔᤠᤱ ᤘᤠ ॥ ᤕᤖᤡᤰ ᤁᤢᤛᤡᤱ ᤁᤧᤏᤡᤳᤋᤢᤶᤔᤠᤱ ᤘᤠᤒᤠ ᤆᤡᤈᤣᤵ ᤆᤠᤣᤃᤢᤱ ॥ ᤀᤠᤸᤗ ᤛᤠᤵᤑᤧᤰᤘᤠ ᥉, ᤒᤠ ᤋᤱᤏᤠᤶ ᤌᤡᤶᤒᤣᤀᤠᤣᤀᤠᤱ ᤀᤠᤸᤛᤠᤱ ᤕᤖᤡᤰ ᤕᤠᤵᤔᤡ ᤆᤢᤵᤛᤡ ॥
ᤁᤡᤖᤠᤋ᤻ ᤛᤠᤰᤌᤡᤶᤒᤠ ᤆᤢᤶᤓᤠᤣ ᤌᤡᤰᤁᤠᤱ ᤆᤠᤣᤁ᤻ᤔᤠ ᤏᤡᤱᤘᤠ᤹ ᤆᤠᤣᤃᤢᤱᤅᤠᤱ ᤘᤠ ॥ ᤁᤧᤖᤧᤰ ᤛᤢᤘᤠᤱᤜᤠ᤹ᤖᤧ ᤛᤠᤰᤌᤡᤶ ᤏᤢ ᤂᤠᤛᤠᤶᤒᤠ ᤀᤠᤣᤏ᤻ᤎᤠᤰᤂᤠ᤹ ᤔᤢᤰᤗᤠ᤹ ᤛᤠᤶᤗᤠᤣ ᤏᤢ ᤂᤠᤈᤠᤣᤁ᤻ ᤌᤡᤶᤜᤠ᤹ ᤛᤧᤐ᤻ᤔᤠᤖᤧ ᤑᤠ᤹ᤀᤠᤱ ॥ ᤕᤧᤶᤔᤡᤴ ᤗᤧᤰᤛᤡᤱᤗ ᤐᤣᤁ᤻ᤁᤡᤸᤗᤧ ᤋᤠᤏ᤻ᤍᤡ ᤒᤠ ᤕᤠ᤹ᤜᤠᤰᤔᤠ, ᤕᤠ᤹ᤕᤢᤐ᤻ᤔᤠᤀᤠᤱ ᤜᤡᤱᤛᤡᤱᤔᤠ ᤕᤧᤶᤜᤠ᤹ ᤕᤠᤶᤔᤠᤣ ᤏᤢᤅ᤻ ᤜᤧᤴᤜᤠ᤹ ᤏᤡᤱᤘᤠ᤹ ᤑᤣᤔ᤻ᤔᤠ ᤔᤧᤏᤢ᤹ᤏᤧᤴ ॥ ᤋᤠᤱᤛᤧᤐ᤻ ᤆᤠᤣᤁ᤻ᤔᤠ ᤁᤵᤔᤠᤐᤠᤣᤅ᤻ ॥
ᤔᤠᤱᤜᤡᤶᤜᤠ᤹ᤀᤠᤱ ᤆᤣᤁ᤻ᤔᤠᤖ ᤋᤣ᤹ᤔᤠ ᤘᤠ ॥ ᤀᤠᤏᤡ᤹ ᤌᤡᤰᤜᤢᤵ ᤐᤠᤣᤂᤡ ᤌᤡᤰᤜᤢᤵᤐᤠᤣ ᤔᤢᤛᤠᤶ ᤕᤠᤰ ॥ ᤁᤧᤖᤧᤁᤗᤧ ᤔᤠᤱᤘᤠ ᤜᤠᤱᤘᤠ ᤋᤠᤁᤧᤋᤧᤶᤔᤧᤀᤠᤱ ᤋᤣ᤹ᤖᤧᤶᤔᤧ ॥ ᤀᤠᤏᤡ᤹ᤀᤠᤣ ᤔᤢ᤹ᤀᤡ ᤀᤠᤄᤠᤣᤛᤢᤶᤔᤠᤱ ᤘᤠ ॥ ᤆᤠᤒᤠᤗᤡᤀᤠᤣ ᤀᤠᤔᤒᤠ ᤔᤗᤜᤠ᤹ ᤕᤠᤰᤔᤠᤔᤧᤴ ᤜᤧᤸᤗᤧ ᤀᤠᤏᤡ᤹ ᤜᤡᤱᤔᤢ᤹ᤀᤡ ᤛ᤹ᤛᤡᤡᤱ ॥ ᤔᤠᤱᤄᤠᤏᤢ ᤁᤧᤍᤧᤀᤡᤸᤗᤧ ᤐᤏᤠᤣᤖᤡᤰ ᤁᤧᤍᤣᤀᤡᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤢ᤹ᤀᤡ ᤏᤠᤁ᤻ᤋᤢᤱ ᤐᤡ᤹ᤏᤡᤱᤅᤠᤱ ᤘᤠ ॥ ᤔᤠᤱᤘᤠ ᤜᤠᤱᤘᤠ ᤁᤧᤄᤠᤣᤛᤡ᤹ ॥ ᤀᤠᤸᤗ ᤀᤠᤏᤡ᤹ ᤌᤠᤁᤢ ᤆᤠᤍᤧᤴ ᤀᤡᤈᤠᤁ᤻ ᤐᤠᤣᤂᤠᤀᤠᤱ ᤘᤠ ॥ ᤜᤧᤕᤠᤣ ᤁᤧᤖᤧᤰᤗᤧ ᤆᤠᤈᤠᤶ ॥ ᤀᤠᤸᤗ ᤀᤠᤏᤡ᤹ ᤐᤕᤶ ᤕᤠᤔ᤻ᤒᤁ᤻ ᤔᤢᤈᤠᤣᤗᤢᤱ ᤔᤠᤱᤜᤡᤶᤔᤡᤴ ᤆᤠᤣᤁ᤻ᤔᤠ ᤘᤠ ॥ ᤛᤠᤵᤔᤢᤴᤎᤢᤶᤔᤡᤒᤠ ᤐᤕᤶ ᤔᤠᤱᤜᤡᤶ ᤆᤠᤣᤁ᤻ᤔᤠᤀᤠᤣ ᤁᤧᤖᤧᤰ ᤌᤢᤰᤛᤡᤱᤅᤡᤀᤠᤱ ᤆᤠᤣᤃᤢᤶ ᤗ᤹ᤖᤡᤰ ᤁᤧᤖᤧᤰᤀᤠᤣ ᤔᤠᤱᤘᤠᤔᤢ᤹᤹ᤀᤡ ᤜᤠᤱᤘᤠᤔᤢ᤹ᤀᤡ ᤌᤠᤀᤡ ᤀᤠᤱᤃᤠ᤹ ᤀᤠᤒᤠᤏ᤻ᤜᤠ᤹ ᤏᤢᤵᤛᤢᤱᤗᤠᤣ ॥
॥ ᤏᤠᤣᤃᤧᤴ ॥
ᤆᤀᤡᤋ᤻ – ᤁᤡᤖᤠᤋ᤻ ᤛᤔᤠᤆᤠᤖ ᤗᤠᤶᤒᤠ
