ᤘᤠᤏᤧᤶ
ᤒᤡᤁᤪᤶ ᤑᤠᤃᤠᤣ / ᤔᤠᤱᤛᤣᤒᤢᤱ -᥋, ᤀᤡᤗᤠᤶ
ᤕᤠᤶᤏᤡᤱᤘᤠ᤹ ᤐᤠᤏᤗᤧᤱ ᤁᤧᤈᤠᤣᤁ᤻ᤐᤠ – ᤛᤢᤏᤡᤗ ᤛᤣᤖ᤻ᤔᤠ (ᤏᤠᤣᤛᤠᤅ᤻)
ᤏ᤻ᤕᤢᤈᤡᤗᤩᤠᤏᤍᤒᤠ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤜᤠ᤹ᤀᤠᤣ ᤐᤠᤱᤅᤣᤒᤠ ᤔᤠᤀᤠᤣᤖᤡ ᤛᤢᤘᤠᤱᤖᤧ ᤛᤠᤰᤌᤡᤶ.ᤂᤠᤛᤠᤶ ᤏᤢ ᤂᤠᤶᤄᤢᤀᤠᤣ ᤕᤢᤰᤑᤠᤣᤖᤧ ᤆᤠᤣᤃᤢᤒᤠ ᤔᤧᤴᤍᤱ ᤏᤢ ᤐᤀᤡᤰᤌᤡᤶᤖᤧ ᤐᤠᤏ᤻ᤍᤠᤣᤀᤠᤣ ᤂᤠᤶᤒᤠᤣᤅ᤻ᤒᤠ ᤗᤧᤶᤈᤠᤱᤏᤢ ᤛᤣᤁ᤻ᤛᤡᤱ ᤁᤧᤒᤠᤣᤅ᤻ᤔᤠ ᤕᤧᤓᤠᤱ ᤐᤠᤛᤡᤱ ᤜᤠᤏᤠᤖᤧ ᤕᤧᤓᤠᤱᤗᤢᤱᤅᤠᤣ ᤔᤡᤀᤛ᤻ᤛᤢᤀᤠᤱ ᤘᤕᤠ ॥ ᤛᤠᤰᤌᤡᤶᤔᤡᤒᤠ ᤐᤕᤶ ᤒᤔ᤻ ᤑᤰᤋᤒᤠ ᤜᤧᤴ (᥌ ᤈᤏᤘᤖᤡ ᥈᥆᥈᥊) ᤒᤠ ᤏ᤻ᤕᤢᤈᤡᤗᤩᤠᤏ᤻ᤒᤠ ᤕᤧᤓᤠᤱᤗᤢ ᤐᤠᤛᤡᤱᤖᤧ ᤁᤢᤈᤠᤣᤁ᤻ᤌᤡᤶᤔᤡᤴ ᤛᤡᤔᤡᤁ᤻ᤗᤢᤱ ᤁᤢᤍᤡᤶᤒᤠ ᤔᤡᤰᤛᤣᤏ᤻ᤌᤡᤶᤒᤠᤖᤧ ᤜᤢ᤹ᤛᤡᤱ ᤆᤠᤣᤁ᤻ᤔᤠ ᤐᤠᤣᤅ᤻ ॥ ᤜᤢᤏᤧ᤹ ᤁᤢᤀᤡᤗᤠᤖᤧ ᤕᤧᤓᤠᤱᤗᤢᤱᤅᤠᤣ ᥇᥆ ᤖᤧᤰᤋᤳ ᤒᤠ ᤗᤢᤵᤗᤡ ᤐᤣᤀᤠᤱ ᤘᤠ ॥ ᤁᤴ ᤗᤢᤵᤗᤡᤀᤡᤴ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤖᤧ ᤛᤠᤰᤌᤡᤶᤔᤡᤒᤠ ᤀᤢᤴᤏᤡᤱᤖᤧ ᤏᤠᤘᤠᤀᤠᤣ ᤁᤢᤛᤡᤱᤏᤡᤐ᤻ᤔᤠ ᤐᤠᤣᤅ᤻ ॥
ᤏ᤻ᤕᤢᤈᤡᤗᤩᤠᤏ᤻ᤍᤒᤠ ᤕᤧᤓᤠᤱᤗᤢᤱᤅᤠᤣ ᤁᤧᤎᤠᤱᤒᤠ ᤜᤧᤴ ᤗᤢᤵᤗᤡᤖᤧ ᤁᤢᤕᤱᤔᤠᤴ ᤀᤠᤸᤗᤠᤣ ᤛᤡᤔᤡᤁ᤻ᤗᤢ ᤁᤢᤍᤡᤶ ᤕᤰᤂᤢᤖ ᤏᤧ ॥ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤖᤧ ᤛᤅ᤻ ᤛᤢᤘᤠᤱᤗᤣ ᤛᤠᤰᤌᤡᤶ ᤏᤢ ᤂᤠᤶᤄᤢᤀᤠᤣ ᤕᤢᤰᤑᤠᤣᤖᤧ ᤜᤡᤔᤣᤋ᤻ ᤆᤠᤣᤃᤢᤒᤠᤀᤠᤣ ᤜᤢᤴᤇᤡ᤹ ᤛᤢᤘᤠᤱᤒᤠ ᤗᤌᤡᤶ ᤔᤧᤴᤇᤢ᤹ᤔᤠ ᤕᤧᤓᤠᤱ ᤐᤠᤛᤡᤱᤗᤧ ᤔᤧᤴᤃᤡᤀᤣ ᤔᤧᤴᤏᤢᤴᤏᤣ ᤀᤠᤒᤠᤱᤅᤣ ᤂᤠᤛᤠᤶ ᤏᤢ ᤛᤠᤰᤌᤡᤶᤔᤡᤴ ᤋᤠᤱᤛᤣᤐ᤻ᤔᤠᤖᤧ ᤑᤠ᤹᤹ᤀᤠᤱ ᤑᤠᤣᤂᤢᤒᤠ ᤀᤡᤗᤠᤀᤡᤴ ᤀᤠᤠᤸᤗᤠᤣ ᤕᤰᤐᤠᤱᤃᤧᤴ ᤐᤠᤏ᤻ᤓᤠᤣᤅ᤻ᤖᤧ ᤏᤠᤘᤠ ᤐᤠᤣᤂᤠᤀᤠᤱ ᤘᤠ ॥
ᤕᤧᤓᤠᤱ ᤐᤠᤛᤡᤱᤗᤣ ᤀᤢᤘᤠᤍᤧᤴᤏᤠᤣ᤹ ᤕᤧᤶᤛᤡᤱᤅᤠᤱ ᤀᤠᤒᤠᤱᤅᤣ ᤔᤠᤐᤠᤏ᤻ᤒᤠ ᤛᤠᤶᤗᤠᤣᤗᤠᤶᤒᤠ ᤀᤡᤱᤐᤡᤖᤢᤛᤡᤒᤠᤀᤠᤣ ᤕᤢᤰᤑᤠᤣᤒᤠ ᤜᤠᤱᤕᤢᤰᤐᤠᤖᤧ ᤜᤢᤴᤇᤡ ᤔᤡᤰᤕᤢᤔᤠ ᤔᤕᤠᤀᤠᤱ ᤘᤠ ॥ ᤀᤢᤏᤧ ᤀᤠᤣᤏ᤻ᤎᤠᤰ ᤆᤠᤣᤃᤢᤒᤠ ᤛᤠᤶᤗᤠᤣᤀᤠᤣ ᤛᤡᤰᤂᤧᤱᤔᤠ ᤏᤢ ᤛᤡᤰᤛᤶᤒᤠ ᤌᤡᤰᤗᤧᤱᤔᤠᤸᤗᤧ ᤏᤡᤍᤧᤳ ॥ ᤜᤣᤏ ᤜᤧᤰᤁᤣᤀᤣ ᤁᤧᤖᤧᤰ ᤂᤠᤶᤒᤠᤣᤅ᤻ᤒᤠᤜᤠ᤹ ᤔᤣᤒᤠᤣᤁᤡᤸᤗᤃ ᤕᤢᤰᤑᤠᤣᤖᤧ ᤜᤠᤱᤕᤢᤰ ᤆᤠᤣᤁ᤻ᤔᤠ ᤛᤢᤰᤔᤧᤍᤧᤴᤏᤧᤴ ᤁᤧᤖ᤹ᤒᤠ ᤆᤡᤈᤣᤵ ᤔᤧᤆᤠᤣᤃᤢᤀᤠᤱ ᤘᤠ ॥
ᤛᤠᤰᤌᤡᤶᤔᤡᤒᤠ ᤁᤣᤈᤡᤖᤧ ᤛᤅ᤻ᤗᤠᤀᤡᤴ ᤁᤢᤒᤠᤣᤁ᤻ᤔᤠᤀᤠᤣ ॥ ᤂᤠᤏᤡᤴᤖᤧ ᤏᤠᤘᤠᤀᤠᤣ ᤔᤠᤀᤠᤣᤖᤡ ᤛᤢᤘᤠᤱᤜᤠ᤹ ᤆᤩᤖᤰ ᤔᤧᤘᤠᤒᤠ ᤑᤠ᤹ᤀᤠᤱ ᤕᤢᤰᤑᤠᤣᤖᤧ ᤜᤡᤔᤣᤋ᤻ ᤐᤡᤖᤢᤛᤡᤀᤠᤱ ᤘᤕᤠ ॥ ᤕᤢᤰᤑᤠᤣᤖᤧ ᤜᤢᤴᤇᤡ ᤛᤠᤰᤌᤡᤶ ᤏᤢ ᤂᤠᤛᤠᤶᤀᤠᤣ ᤜᤡᤔᤣᤋ᤻ ᤔᤧᤋᤢᤀᤠᤱ ᤘᤕᤠᤒᤠᤀᤠᤣ ᤀᤠᤸᤗᤠᤣ ᤕᤢᤰᤑᤠᤣᤀᤡᤴᤏᤣ ᤕᤧᤱᤄᤡᤁ᤻ᤐᤠ ᤐᤠᤣᤂᤠᤒᤠ ᤏᤡᤎᤠᤐ᤻ ॥ ᤀᤠᤸᤗ ᤕᤢᤰᤑᤠᤣᤖᤧ ᤜᤢᤴᤇᤡ᤹ ᤛᤠᤰᤌᤡᤶ ᤏᤢ ᤂᤠᤛᤠᤶ ᤋᤠᤱᤛᤧᤵᤐᤠ ᤏᤢ ᤛᤢᤘᤠᤱᤒᤠ ᤕᤠᤵᤔᤡᤜᤠ᤹ ᤌᤠᤣᤒᤠᤣ ᤆᤠᤣᤁ᤻ᤔᤠᤛᤡᤀᤠᤣ ᤕᤢᤰᤑᤠᤣᤛᤠᤒᤠᤖᤧ ᤋᤱᤃᤠᤶ ᤔᤧᤴᤈᤠᤣᤃᤢᤴᤏᤧᤓᤃᤖ ᤜᤢᤴᤇᤡ᤹ ᤜᤠᤱᤕᤢᤰᤁᤡᤴᤏᤣ ᤏᤢᤵᤐᤠ ᤀᤡᤒᤢ ᤘᤠ ॥
ᤁ᤹ᤏᤠ ᤀᤠᤏᤡ᤹ ᤗᤠᤈᤣᤀᤠᤣᤃᤖ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠ ᤔᤧᤵᤏᤠᤒᤠᤜᤠ᤹ ᤜᤧᤴ ᤏ᤻ᤕᤢᤈᤡᤗᤩᤠᤏ᤻ᤍᤒᤠ ᤜᤠᤏᤠ ᤁᤢᤛᤡᤱ ᤐᤠᤣᤅ᤻ᤔᤠ ᤀᤠᤰᤂᤧᤴ ᤛᤠᤘᤠᤏ᤻ ᤐᤠᤣᤅ᤻ᤔᤠᤀᤠᤱ ᤋᤠᤔᤠᤐᤠᤣᤅ᤻ᤅᤡ ॥ ᤀᤠᤱᤃᤠ᤹ ᤜᤠᤏᤠᤖᤧ ᤛᤠᤰᤌᤡᤶᤔᤡᤒᤠ ᤜᤠᤁᤠ ᤛᤠᤶᤗᤠᤣᤗᤠᤶᤒᤠ ᤕᤢᤰᤑᤠᤣᤒᤠ ᤜᤠᤱᤕᤢᤰᤑᤠ᤹ᤀᤠᤣ ᤐᤡᤖᤢᤛᤡᤒᤠ ᤛᤡᤰᤁᤢᤍᤡᤶᤒᤠ ᤀᤡᤱᤅᤡᤴ ᤀᤠᤣᤔᤧᤳᤋᤢᤱ ॥ ᤜᤡᤴᤈᤠ᤹ᤀᤡᤸᤗᤧ ᤕᤧᤓᤠᤱ ᤐᤠᤛᤡᤱ ᤁᤧᤒᤠᤣᤅ᤻ᤔᤠᤖᤧ ᤛᤠᤰᤌᤡᤶᤔᤡᤒᤠ ᤁᤣᤈᤡ ᤀᤢᤴᤏᤡᤱ ᤐᤠᤣᤎᤰᤖᤧ ᤛᤧᤰᤂᤠᤀᤣ ᤏᤡᤱᤘᤠ᤹ᤁᤧᤔᤠᤒᤠ ᤆᤠᤣᤁ ॥
ᤋᤠᤣᤁ᤻ᤘᤠ ᤑᤧ᤹ᤔᤠᤖᤧ ᤀᤠᤏᤡᤃᤩᤠ ᤕᤧᤓᤠᤱᤛᤠᤜᤠ᤹ ᤗᤰᤗᤠᤣᤒᤠᤜᤠᤥᤖᤧ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤜᤠ᤹ ᤜᤢᤴᤇᤡ ᤏᤠᤖᤠ ᤀᤠᤣᤔᤵᤔᤠᤸᤗᤧ ᤋᤣᤋ ᤛᤱᤏᤠᤍᤧᤴᤏᤠᤣ ᤀᤠᤣᤏ᤻ᤎᤠᤰ ᤕᤢᤱᤏᤒᤠᤁᤢᤛᤡᤱ ᤆᤠᤣᤁ᤻ᤑᤢᤱᤗᤰ ᤏᤡᤔᤣᤎᤠᤐ᤻ ॥ ᤁᤢᤛᤰᤔᤠᤖᤰ ᤁᤧᤕᤠᤰᤐᤠ ᤛᤠᤣᤛᤠᤶ ᤁᤧᤜᤠᤣᤐ᤻ᤐᤠ ᤁᤢᤛᤡᤱ ᤏᤡᤔᤣᤎᤠᤐ ॥ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ ᤏ᤻ᤕᤢᤈᤡᤗᤩᤠᤏ᤻ᤒᤠ ᤜᤠᤠᤏᤠᤖᤧ ᤕᤠᤔ᤻ᤈᤠᤣᤁ ᤀᤠᤣᤔᤵᤔᤠᤀᤠᤱᤃ ᤀᤠᤏᤡ᤹ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤜᤠ᤹ᤃ ᤗᤰᤗᤠᤣᤒᤠᤛᤡ᤹ ᤐᤠᤐ᤻ᤔᤠᤀᤠᤠᤱ ᤀᤠᤏᤢᤀᤠᤛᤡᤒᤠᤖᤰ ᤆᤠᤣᤁ᤻ ॥
ᤀᤠᤒᤠᤱᤅᤣ ᤛᤠᤰᤌᤡᤶ ᤏᤢ ᤂᤠᤛᤠᤶ ᤋᤠᤱᤛᤣᤐ᤻ ᤏᤢ ᤎᤠᤣᤒᤠᤣᤀᤠᤣ ᤔᤧᤶᤒᤠᤋᤡᤶᤒᤠ ᤏᤡᤔᤠᤸᤗᤃ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠ ᤗᤰᤗᤠᤣᤒᤠᤠᤜᤠ᤹ ᤛᤠᤣᤛᤠᤶᤃ ᤔᤧᤴ ᤁᤢᤛᤰᤔᤠᤀᤣ ᤁᤧᤜᤠᤣᤐ᤻ᤐᤠ ᤁᤢᤛᤡᤱ ᤏᤡᤔᤧᤎᤠᤐ᤻ ॥
@ Full Name: (हाना-रविती माईपी क्लार्क)
