ᤑᤗᤠᤶᤛᤡᤱ ᤛᤠᤘᤠᤏ᤻ ᤐᤠᤣᤂᤠᤒᤠ ᤋᤧᤴ ᤆᤢᤰᤆᤡᤏᤠᤶᤒᤠᤛ᤻ᤔᤠ ᤕᤠᤔ᤻ᤗᤰ ᤗᤠᤶᤒᤠ ᤁᤧᤒᤵᤐᤠ ᤆᤠᤖᤧ ᤜᤢᤴᤇᤡ ᤜᤡᤶᤛᤕᤅ᤻ᤅᤠᤣ ᤋᤱᤒᤣᤗᤠᤘᤠ ᤆᤠᤔᤠ ᤌᤢᤱᤔᤠ ᤔᤧᤴᤕᤠᤣᤔ᤻ᤏᤠ ᤘᤕᤠ ॥ ᤜᤧᤴ ᤕᤧᤶᤔᤠᤣ ᤕᤁ᤻ᤋᤱᤒᤠ ᤐᤠᤱᤓᤣ᤹ ᤌᤠᤅ᤻ᤒᤣ᤹ᤀᤠᤣ ᤆᤠᤜᤠ᤹ ᤌᤡ᤺ ᤏᤢ ᤗᤠᤰᤛᤡ ᤆᤠᤣᤁ᤻ᤔᤠᤀᤠᤣ ᤀᤠᤣᤃᤵ ᤔᤧᤆᤠᤣᤃᤢ ॥ ᤑᤗᤠᤶᤛᤡᤱ ᤛᤠᤘᤠᤏ᤻ ᤐᤠᤣᤂᤠᤒᤠ ᤋᤧᤴᤏᤠᤣ᤹ᤏᤢ ᤌᤠᤣ ᤀᤠᤣᤔᤵᤔᤠᤸᤗᤧ ᤌᤠᤗᤠ᤹ᤆᤧᤵᤐᤠ ᤐᤕᤶ ᤁᤠᤣᤁ᤻ᤔᤠ ᤋᤠᤶᤓᤢᤱ. ᤕᤠᤣ ᤀᤠᤣᤔᤵᤔᤠᤸᤗᤧ ᤑᤧᤰᤘᤠ ᤕᤱᤄᤱ ᤛᤁ᤻ᤁᤠᤱ ᤏᤧᤒᤠ ᤁᤢᤓᤣᤛᤠᤱ ᤏᤡᤱᤘᤠ᤹ᤔᤠᤖ ᤁᤣᤔ᤻ᤒᤠ ᤄᤖ᤻ᤗᤣ ᤓᤡᤖ᤻ᤀᤡᤴ ᤕᤧᤵᤐᤠ ॥ ᤀᤠᤰᤂᤧᤴ ᤕᤖᤡᤰ ᤕᤧᤶᤔᤠᤱᤎᤠᤣ ᤋᤢᤰᤂᤣ ᤗᤠᤰᤂᤣᤏᤢ ᤐᤠᤱᤘᤠᤀᤡ ᤋᤣᤅ᤻ᤈᤢᤶ. ᤑᤢ᤹ᤏᤢᤛᤠ. ᤐᤠᤱᤓᤣ᤹ᤛᤠᤒᤠ ᤗ᤹ᤀᤡ ᤘᤠᤔ᤻ᤏᤠᤒᤠ ᤐᤏᤠᤣᤒᤠ ᤐᤠᤱᤓᤣ᤹ ᤘᤕᤠ ॥ ᤀᤢᤴᤇᤠᤣᤏ᤻ ᤛᤠᤘᤠᤏ᤻ᤏᤢ ᤛᤠᤣᤖᤡᤰ ᤁᤢᤛᤡᤱ ᤏᤡᤇᤡᤱᤏᤠ ᤁᤧᤖᤧᤰ ᤁᤠ᤹ᤀᤡ ᤀᤡᤛᤡᤰᤐᤠ ᤐᤠᤱᤓᤣ᤹ᤛᤠᤒᤠᤜᤠ᤹ ᤁᤧᤖᤧᤰ ᤗᤧᤵᤔᤠᤌᤠᤔᤠᤛᤡᤀᤠᤱ ᤕᤢᤔᤠ ᤐᤔ᤻ᤔᤠ ᤐᤣᤜ᤻ᤔᤠ ᤏᤡᤏ᤻ᤎᤠᤣ ᤔᤧᤈᤠᤣᤃᤢ ᤜᤢᤴᤇᤡ ᤹ ᤜᤡᤱᤛᤕᤅ᤻ᤗᤧ ॥
ᤀᤡᤗᤠᤶ ᤌᤢᤶᤛ᤻ᤔᤠ ᤈᤡᤋ᤻ᤐᤢᤖ ᤗᤡᤱᤍᤧᤴ ᤛᤅ᤻ᤒᤠᤜᤠ᤹ ᤔᤧᤕᤢᤱᤒᤠ ᤗᤡᤱᤍᤡᤴ ᤔᤧᤵᤏᤠᤒᤠ ᤋᤧᤴ ᤁᤧᤓᤧᤛᤡᤱᤒᤠ ᤋᤧᤴ ᤏᤧ ॥ ᤋᤃᤡᤃ ᤑᤸᤃᤢᤏᤴᤍᤛᤡ᤹ᤀᤠᤱ ᤌᤧᤒᤠ᤹ ᤋᤠᤰᤌᤧᤒᤠ᤹ᤖᤧ ᤕᤧᤶᤀᤠᤣ ᤈᤡᤋ᤻ᤐᤢᤖ ᤗᤠᤶᤒᤠᤀᤣ ᤆᤢᤰᤆᤡᤏᤠᤶᤒᤠ ᤔᤧᤓᤣᤖᤧᤒᤠ ॥ ᤒᤠ ᤜᤧᤴ ᤐᤠᤱᤓᤣ᤹ᤖᤧ ᤁᤢᤛᤡᤋᤠᤱ ᤔᤠᤀᤡ ᤘᤠᤜᤱᤗᤧ ᤁᤢᤎᤢᤱᤎᤠᤱ ᤎᤠᤣᤖᤧᤏᤡ ᤐᤠᤱᤓᤣ᤹ᤀᤠᤣ ᤁᤧᤖᤧᤰ ᤜᤡᤶᤛᤕᤅ᤻ ᤆᤢᤰᤆᤡᤏᤠᤶᤒᤠᤏᤢ ᤔᤣᤒᤏ᤻ᤍ᤻ ᤔᤣᤒᤣ ॥ ᤎᤠᤣᤖᤧᤏᤡ ᤆᤡᤈᤡ ᤂᤁ᤻ᤐᤠ ᤋᤧᤴ ᤏᤧ ॥ ᤆᤩᤖᤰ ᤐᤠᤱᤓᤣ᤹ᤛᤠᤒᤠ ᤔᤧᤕᤢᤱᤒᤠ. ᤜᤠᤸᤗᤧᤰᤁᤠᤣ ᤜᤠᤋ᤻ᤋᤠᤱ ᤔᤧᤴᤃᤧᤳᤏᤧᤴ ᤔᤧᤴᤍᤠᤏᤧᤶᤒᤠ ᤋᤧᤴ ᤏᤧ ॥ ᤁᤴ ᤋᤧᤴᤏᤠᤣ᤹ᤏᤢ ᤕᤠᤏᤡᤶᤖᤧ ᤏᤡᤕᤠᤖᤠ ᤛᤧᤰᤂᤠ ᤗᤢᤱᤔᤠᤜᤡᤔ᤻ᤗ ᤐᤏᤠᤣᤏᤠᤣᤒᤠ᤹ ᤏᤡᤎᤠᤐ᤻ᤗᤠᤣ ॥ ᤔᤠᤀᤡ ᤏᤢ ᤍᤣᤀᤢᤔᤠᤀᤡ ᤁᤧᤍᤢᤶᤒᤠ ᤋᤧᤴ ᤛᤠᤣᤛᤣᤖᤡᤰ ᤑᤢ᤹ᤗᤢᤱᤃᤡ ᤏᤧ ॥ ᤜᤧᤴᤏᤠᤱᤕᤠᤣ ᤔᤠᤀᤡ ᤕᤱᤄᤱ ᤀᤛᤣᤁ᤻ᤐᤠᤴ ᤜᤧᤰᤁᤣ ᤁᤰᤋᤠᤅ᤻ ᤁᤰᤋᤡᤅ᤻ ᤁᤠᤣᤁ᤻ᤔᤠ ᤑᤠᤱᤈᤱ ᤐᤠᤏᤠᤣ ᤏᤡᤕᤠᤖᤠ ᤏᤡᤎᤠᤵ ॥ ᤏᤡᤕᤠᤖᤠ ᤁᤢᤏᤢᤶᤔᤠᤣ ᤋᤠᤅ᤻ᤛᤠᤰᤐᤠᤴ ᤏᤢ ᤁᤠᤣᤁ᤻ᤔᤠᤜᤠ᤹ ᤋᤢᤔᤠᤀᤠᤱ ᤐᤵᤐᤠ ᤜᤣᤰᤁᤣ ᤏᤡᤎᤠᤵ ॥
ᤆᤢᤰᤆᤡᤏᤠᤶᤒᤠᤏᤢ ᤎᤠᤣᤍᤣᤏᤡ ᤗᤠᤱᤄᤣᤁ᤻ᤔᤠᤀᤠᤱ ᤐᤣᤁ᤻ᤔᤠᤸᤗᤧ ᥇, ᤕᤧᤴᤗᤧ ᤀᤠᤃᤧᤳ ॥ ᤗᤡᤱᤍᤡᤴ ᤏᤢ ᤕᤠᤣ ᥉᥆ ᤐᤣᤔᤢᤰᤕᤠᤣ ᤎᤠᤣᤍᤣᤏᤡ ᤜᤧᤴᤏᤠᤱᤕᤣ ᥉᥆ ᤐᤣᤔᤢᤰ ᤐᤣᤁ᤻ᤔᤠᤸᤗᤧ ᤔᤠᤀᤡ ᤘᤠᤜᤱ ᤘᤍᤧᤴᤇᤢᤱᤗ ᤏᤧ ॥ ᤛᤡᤱᤒᤢ ᤗᤢᤱᤒᤢᤱᤗᤧ ᤁᤢᤵᤋᤢᤒᤠ ᤋᤧᤴ ᤏᤧ ॥ ᤈᤃᤢᤴᤘᤠᤈᤖᤧ ᤜᤡᤶᤛᤕᤅ᤻ ᤆᤢᤰᤆᤡᤏᤠᤶᤒᤠᤏᤢ ᤔᤧᤒᤴᤍᤧᤀᤠᤱ ᤔᤧᤓᤧᤖᤠᤸᤗᤧ ᤑᤗᤠᤶᤛᤡᤱ ᥌ ᤋᤱᤒᤣ ᤁᤧᤖᤠᤀᤠᤱ ᤘᤕᤠ ॥ᤜᤢᤏᤧ᤹ᤖᤧ ᤜᤡᤴᤈᤠ᤹ᤕᤧᤶ ᤒᤠᤀᤰᤋᤶᤒᤠ ᤆᤡᤈᤡ ᤂ᤺ᤁ᤻ᤐᤠ ᤋᤧᤴᤏᤠᤣ᤹ ᤐᤡᤳ ᤔᤧᤴᤍᤠᤰ ᤁᤶᤔᤡ ॥ ᤐᤠᤱᤘᤠᤀᤡ ᤕᤠᤔ᤻ᤒᤰᤆᤠᤣᤁ᤻ᤁᤡ ᤐᤣ᤹ ॥
ᤀᤠᤳᤋᤠᤏ᤻ ᤐᤣᤁ᤻ᤔᤠᤛᤠᤱ ᤋᤢᤰᤂᤣᤏ᤻ᤃ ᤁᤢᤀᤡᤛᤡᤰ ॥ ᤎᤠᤣᤍᤣᤏᤡ ᤛᤠᤣᤁ᤻ᤛᤠᤣᤁ᤻ᤐᤠ᤹ ᤔᤠᤀᤡ ᤘᤠᤜᤱᤅᤡᤴ ᤑᤠᤣᤁ᤻ᤔᤠᤀᤠᤱ ᤗᤧᤵ ᤁᤧᤏᤧᤒᤠ ᤋᤧᤴᤏᤡᤴ ᤒᤠᤜᤪ ᤎᤠᤖᤏᤣ ᤔᤧᤔᤧᤳᤋᤢ᤹ ॥ ᤜᤧ᤹ᤕᤠᤣ ᤕᤁ᤻ᤋᤱᤒᤠ ᤀᤡᤒᤣᤁ᤻ ᤏᤢ ᤎᤠᤣᤍᤣᤏᤡᤒᤠᤖᤧ ᤜᤢᤴᤇᤡ᤹ ᤀᤡᤰᤋᤠᤵ ᤏᤢ ᤐᤩᤠᤱᤛᤡ ᤏᤧ᤺ ॥ ᤂᤡᤒᤣᤁ᤻ᤘᤠ ᤕᤧᤶᤔᤠᤣ ᤆᤠᤒᤠᤗᤡ ᤗᤐ᤻ᤔᤠ ᤛᤢᤐ᤻ᤔᤠᤀᤠᤱ ᤀᤡᤰᤋᤠᤵ ᤏᤢ ᤐᤩᤠᤱᤛᤡᤜᤠ᤹ᤀᤠᤣ ᤕᤠᤰᤛᤠ ᤕᤠᤰᤔᤠ ᤀᤡᤸᤗᤡᤶ ᤘᤠ ॥ ᤕᤁ᤻ᤘᤠᤍᤱ ᤕᤠᤰᤛᤠᤀᤠᤣ ᤜᤡᤶᤏᤢ ᤆᤠ ᤋᤣ᤹ᤔᤠᤀᤠᤱ ᤆᤠᤣᤁ᤻ᤔᤠ ᤆᤠᤔᤠ ᤐᤡᤳ ᤔᤧᤴᤍᤠᤱ ᤁᤵᤔᤠᤛᤡ ᤔᤠᤕᤢ ᤜᤠᤔ᤻ᤒᤠᤏᤢ ᤁᤶᤒᤪᤠᤱ ᤔᤧᤵᤔᤠᤛᤡ ᤕᤠᤔ᤻ᤒᤰ ॥
ᤒᤡᤁᤪᤶ ᤋᤱᤒᤣ ᥇᥏᥋᥆ ᤋᤱᤒᤣᤒᤠ ᤂᤡᤒᤣᤁ᤻ᤘᤠ ᤕᤧᤶᤔᤠᤣ ᤌᤡᤰᤕᤧᤴ ॥ ᥎ ᤋᤱᤒᤣ ᤁᤧᤃᤧᤵᤐᤠ ᤑᤗᤠᤶᤛᤡᤱ ᤁᤢᤶᤔᤠ ᤐᤠᤁ᤻ᤔᤠᤖᤧ ᤕᤰᤔᤠᤜᤡᤶ ᤁᤧᤕᤠᤰᤐᤠ ᤁᤢᤶᤒᤠ ᤆᤠ᤺ᤈᤡᤃᤰᤜᤠ᤹ ᤜᤢ᤹ᤖᤧ ᤗ᤹ᤖᤡᤰ ᤔᤢᤖᤠᤔᤧᤳᤋᤢ ॥ ᤐᤠᤱᤓᤣ᤹ᤛᤠᤒᤠᤖᤧᤀᤠᤱ ᤕᤰᤔᤠᤜᤡᤶ ᤜᤧ᤹ᤕᤠᤣᤀᤣ ᤔᤧᤕᤠᤃᤧᤒᤠᤸᤗᤧ ᤐᤠᤱᤓᤣ᤹ᤛᤠᤒᤠ ᤋᤣᤅ᤻ᤒᤠᤜᤠ᤹ᤏᤢ ᤛᤠᤣᤛᤠᤣᤖᤡᤰ ᤔᤣᤒᤣ ॥ ᤔᤠᤀᤡ ᤘᤠᤜᤱᤅᤡᤴ ᤕᤶᤒᤠᤏᤧᤛᤠᤱ ᤒᤠᤜᤪ ᤎᤠᤖᤏᤧ ᤁᤢᤓᤣᤛᤱ ᤘᤩᤠᤋᤡᤴ ᤛᤧᤛᤡᤱᤅᤠᤱ ᤕᤢᤒᤠᤸᤗᤧ ᤆᤠᤣᤃᤢᤸᤗᤧ ᤁᤢᤓᤠᤣᤁ᤻ᤁᤧᤏᤢ᤹ᤒᤠ ᤋᤧᤴ ᤏᤧᤛ᤻ᤛᤠ ॥ ᤋᤣᤅ᤻ᤒᤠᤜᤠ᤹ᤏᤢ ᤁᤢᤛᤠᤏᤢ᤹ᤖᤡᤰ ᤔᤣᤒᤣᤖ ᤔᤠᤀᤡ ᤘᤠᤜᤱᤅᤠᤣ ᤔᤧᤃᤧᤖᤠ ॥ ᤑᤗᤠᤶᤛᤡᤱ ᤁᤢᤴᤍᤣᤁ᤻ᤒᤠᤜᤠ᤹ᤖᤧ ᤘᤠᤜᤱᤅᤡᤴ ᤁᤢᤛᤠᤏᤢᤖᤡᤰ ᤔᤧᤓᤠᤣᤁ᤻ᤋᤢ ॥ ᤁᤖ ᤑᤗᤠᤶᤛᤡᤱᤗᤧ ᤆᤢᤘᤠᤋᤡᤴ ᤋᤠᤣ᤹ᤖᤢᤀᤠᤱ ᤘᤣ᤹ᤐᤖᤡᤰᤐᤠ ᤀᤡᤏᤠᤣ ᤐᤠᤣᤂᤠ ॥ ᤁᤢᤕᤠᤶᤒᤣ᤹ᤀᤠᤣ ᤑᤰᤘᤠ ᤗᤧᤱᤘᤠ ᤗᤴᤍᤧᤐᤣ ॥ ᤁᤢᤕᤠᤶᤒᤣ᤹ᤀᤡᤴ ᤕᤱᤔᤠ ᤜᤣᤁ᤻ᤋᤠ ॥ ᤁᤢᤶᤒᤠ ᤜᤢ᤹ᤖᤢᤒᤠ ᤆᤠᤈᤡᤃᤰᤘᤠᤀᤡᤴ ᤀᤠᤰᤂᤣᤀᤡ ᤀᤠᤰᤂᤣᤀᤡ ᤂᤐ᤻ᤔᤠ ᤔᤧᤕᤠᤏ᤻ᤍᤢᤶᤒᤠ ᤜᤣᤰᤁᤣ ᤗ᤹ᤖᤧᤐᤣ ॥ ᤜᤣᤰᤁᤣᤛᤠᤱ ᤐᤈᤠ᤹ ᤆᤠᤶᤖᤧᤖ ᤁᤢᤕᤠᤶᤒᤣ᤹ᤀᤡᤴ ᤕᤰᤂᤢᤖ ᤑᤰᤘᤠ ᤗᤧᤅ᤻ᤘᤠ ᤗᤴᤍᤣᤖᤛᤠᤱ ᤁᤢᤶᤒᤠ ᤘᤕᤧᤒᤠ ᤋᤧᤴ ᤌᤠᤖᤡᤰ ᤆᤠᤈᤡᤃᤰᤘᤠᤜᤠ᤹ ᤁᤧᤳᤋᤢ ॥
ᤕᤠᤰᤛᤠᤀᤠᤣ ᤑᤗᤠᤶᤛᤡᤱ ᤁᤧᤖᤠᤸᤗᤧ ᤕᤰᤂᤢᤖ ᤘᤕᤠ ॥ ᤁᤢᤏᤠᤖᤠᤀᤡᤴ ᤋᤡᤰᤋᤢᤀᤠᤱ ᤜᤠᤵᤐᤠ᤹ ᤜᤠᤵᤐᤠ᤹ ᤁᤧᤗ᤹ᤒᤠ ᤁᤢᤔᤡᤰᤁᤠᤣ᤹ ᤔᤡᤰᤘᤠᤗᤧ ᤋᤵᤐᤰᤘᤠ ᤁᤧᤗᤶᤒᤠᤖ ᤁᤧᤒᤵᤐᤠ ᤛᤠᤖᤡᤰ ᤗᤢᤔᤠ᤺ᤛᤩᤠ ᤁᤧᤗ᤹ᤒᤠ ᤏᤡᤛᤢ ᤁᤢᤶᤒᤠᤖᤧ ॥ ᤁᤢᤎᤰᤁᤡᤴ ᤐᤠᤃᤠᤣ ᤁᤧᤃᤠᤣᤒᤠ ᤑᤢ᤹ᤗᤢᤱᤗᤢᤱᤏᤠ ᤁᤧᤕᤱᤒᤠ ᤁᤢᤔᤡᤰᤘᤠ ᤆᤰᤆᤰᤐᤠ ᤑᤗᤠᤶᤛᤡᤱ ᤁᤢᤶᤒᤠ ᤀᤱᤛᤢᤘᤴᤋᤖᤧ ᤐᤠᤏ᤻ᤇᤠᤋᤢᤛᤠᤱ ᤔᤧᤶᤒᤠᤐ᤻ᤏᤠ ᤐᤠᤣᤂᤠᤀᤠᤱ ᤘᤕᤠ ॥ ᤁᤢᤶᤒᤠᤖᤧ ᤆᤠᤈᤡᤃᤰᤘᤠᤜᤠ᤹ ᤋᤧᤶᤛᤢᤀᤠᤱ ᤕᤢᤰᤂᤢ ᤜᤧᤰᤁᤩᤠᤱ ᤕᤠᤶᤔᤠᤣ ᤏᤢᤖᤡᤰᤁᤠᤱ ᤐᤠᤏ᤻ᤇᤠᤋᤢ ᤌᤣ ᤐᤠᤣᤂᤠ ᥅ ᤗ᤹ᤖᤡᤰ ᤐᤠᤏ᤻ᤇᤠᤋᤢᤛᤠᤱ ᤀᤠᤂᤧᤴᤇᤠᤱ ᤑᤗᤠᤔᤶᤛᤡᤱ ᤔᤧᤒᤠᤖᤠᤏ᤻ ॥ ᤁᤢᤶᤒᤠᤠᤖᤧ ᤏᤡᤱᤘᤠᤀᤡᤋ᤻ᤋᤢ ᤘᤣ᤹ᤕᤧᤶᤃ ᤀᤰᤋᤶᤒᤠ ᤔᤣᤏ᤻ ᤁᤢᤶᤔᤠᤖᤧ ᤁᤢᤕᤠᤶ ᤁᤧᤍᤢᤰᤐᤠᤀᤡᤴ ᤌᤩᤠᤱ ᤆᤠᤈᤡᤃᤰᤘᤠ ᤛᤠ᤺ᤛᤣ ᤐᤠᤱᤄᤢᤒᤣ ᤗ᤹ᤖᤡᤰ ᤛᤠᤖᤡᤰ ᤁᤢᤛᤡᤰᤄᤣᤱᤅᤠ ॥
ᤈᤃᤢᤴᤘᤠᤈᤖᤧ ᤀᤣᤛᤠ ᤑᤗᤠᤶᤛᤡᤱᤖᤧ ᤁᤢᤍᤢᤰᤔᤠᤴ ᤏᤡᤛᤢᤀᤠᤱ ᤁᤢᤗᤢᤱᤔᤠ᤹ ᤕᤠᤣᤏ᤻ᤎᤩᤠ ॥ ᤁᤢᤑᤰᤋᤢᤱᤅᤠᤣ ᤂᤧᤐ᤻ᤛᤢᤀᤠᤱ ᤐᤏᤠᤣᤖᤡᤰ ᤐᤠᤏ᤻ᤇᤠᤋᤢᤛᤠᤱ ᤜᤡᤴᤈᤠ᤹ᤀᤡᤴ ᤁᤢᤔᤡᤰᤘᤠᤖᤰ ᤌᤩᤠ ᤔᤧᤒᤠᤖᤠᤏ᤹ ᤛᤠᤖᤡᤰ ᤁᤢᤕᤠᤶᤍᤢᤰᤐᤠ ᤐᤠᤏ᤻ᤏᤡᤴ ᤏᤡᤋᤠᤱᤒᤠ ᤐᤠᤱᤓᤣ᤹ᤛᤠᤒᤠᤜᤠ᤹ ᤔᤧᤳᤋᤢᤛᤡ. ᤀᤠᤱᤃᤠ᤹ ᤀᤠᤒᤡᤳ ᤔᤧᤴᤍᤠᤰᤂᤠ᤹ᤀᤠᤱ ᤀᤠᤣᤔᤳᤋᤡ ᤁᤶᤒᤪᤠᤱ ᤔᤧᤳᤋᤧ ᤀᤠᤒᤡᤖᤣ ᤗ᤹ᤖᤡᤰ ᤑᤠ᤹ᤛᤡᤱ ᤏᤠᤁ᤻ᤋᤢᤛᤡ ॥ ᤜᤧᤰᤕᤩᤠ ᤁᤢᤕᤠᤶᤁᤧᤍᤢᤰᤐᤠ ᤑᤗᤠᤶᤛᤡᤱ ᤕᤠᤱᤛᤡᤱᤅᤠᤱ ᤜᤡᤶᤔᤠᤣ ᤌᤠᤛᤡᤱ ॥ ᤜᤡᤶᤔᤠᤣ᤹ ᤁᤧᤖᤠᤀᤠᤱ ᤆᤃᤢᤴᤘᤠᤈᤖᤧ ᤁᤢᤜᤡᤶᤛᤠᤔᤠᤴ ᤀᤰᤋᤶᤒᤠ ᤁᤧᤍᤢᤐᤠ ᤜᤡᤴᤈᤠ᤹ᤀᤡᤴ ᤌᤩᤠᤱ ᤆᤠᤈᤡᤃᤰᤘᤠ ᤛᤠᤛᤧ ᤁᤧᤒᤠᤱᤄᤢᤒᤠ ᤗ᤹ᤖᤡᤰ ᤛᤡᤰᤘᤧᤳᤋᤢ, ᤐᤠᤏ᤻ ᤔᤧᤳᤋᤢ ॥ ᤜᤡᤴᤈᤠᤀᤡᤴ ᤁᤢᤕᤠᤶᤍᤢᤰᤔᤠᤖᤧ ᤏᤠᤘᤠᤀᤡᤴ ᤏᤡᤛᤢᤀᤠᤱ ᤁᤢᤶᤔᤠᤀᤠᤱ ᤁᤢᤏᤡᤱᤘᤠ ᤔᤕᤠ ॥ ᤀᤠᤴᤍᤣᤏ ᤁᤢᤛᤠᤏᤢ᤹ᤖᤡᤰ ᤐᤠᤱᤘᤠᤀᤡ ᤔᤧᤘᤕᤠᤒᤠ ᤐᤠᤏ᤻ᤏᤡᤴ ᤁᤢᤶᤔᤠᤖᤧ ᤔᤧᤳᤋᤢ ॥ ᤑᤗᤠᤶᤛᤡᤱ ᤁᤢᤕᤠᤶᤍᤢᤰᤔᤠᤴ ᤐᤠᤱᤓᤣ᤹ᤒᤠᤖᤧᤀᤠᤱ ᤌᤠᤀᤡᤱ ᤔᤣᤄᤠᤣᤛᤢ ᤜᤧᤰᤁᤩᤠᤱ ᤀᤠᤣᤔᤳᤇᤧ ᤋᤠᤔᤠ ᤔᤧᤜᤣᤁ᤻ᤋᤠ ॥ ᤑᤗᤠᤶᤛᤡᤱᤖᤧ ᤁᤢᤴᤍᤣᤅ᤻ᤒᤠᤜᤠ᤹ᤀᤠᤱ ᤔᤧᤍᤩᤠᤀᤠᤱ ᤀᤠᤣᤔᤧᤔᤳᤋᤢ ॥ ᤀᤠᤴᤍᤣᤁ᤻ ᤛᤠᤣᤛᤠᤣᤖᤡᤰ ᤐᤣᤁ᤻ᤏᤠᤸᤗᤧ ᤔᤠᤀᤡ ᤘᤠᤜᤱ ᤔᤧᤶᤓᤠᤣᤁ᤻ᤌᤠᤖᤡᤰ ᤜᤧᤰᤋᤶᤒᤠ ᤁᤢᤕᤠᤶᤍᤢᤰᤔᤠ ᤌᤣᤀᤠᤱ ᤜᤠᤣᤐ᤻ᤋᤠᤒᤠ ᤐᤠᤏ᤻ᤏᤡᤴ ᤔᤧᤒᤠᤋᤢ ॥ ᤑᤗᤠᤶᤛᤡᤱᤖᤧ ᤁᤢᤴᤈᤢᤶᤜᤠ᤹ᤖᤧ ᤔᤧᤒᤠᤋᤢᤒᤠ ᤐᤠᤏ᤻ᤏᤡᤴ ᤂᤧᤵᤛᤢᤀᤠᤱ ᤁᤢᤶᤒᤠᤖᤧ ᤁᤢᤛᤡᤰᤁᤡᤴᤏᤠᤱ ᤏᤔ᤻ᤏᤔ᤻ ᤐᤠᤣᤂᤠ ॥
ᤑᤗᤠᤶᤛᤡᤱᤖᤧ ᤁᤢᤕᤠᤶᤍᤢᤰᤔᤠᤴ ᤔᤧᤏᤡᤛᤢᤀᤠᤱ ᤁᤧᤖᤧᤰ ᤜᤢᤴᤇᤡ᤹ ᤏᤡᤱᤘᤠ᤹ᤔᤕᤠᤀᤠᤱ ᤘᤕᤠ ॥ ᤌᤩᤠᤱ ᤀᤰᤋᤶᤒᤠ ᤕᤠᤶᤍᤢᤰᤔᤠᤖᤧ ᤋᤧᤶᤛᤢᤒᤣ ᥅ ᤐᤠᤱᤓᤣ᤹ᤛ᤻ᤔᤠ ᤛᤡᤍᤠ᤹ᤐᤠᤱᤍᤠ ᤔᤣᤔᤣᤳᤋᤢ ॥ ᤕᤧᤒᤠ. ᤛᤠᤶᤒᤠ. ᤑᤧᤍᤠᤱᤔᤠ. ᤔᤠᤱᤍᤣᤔ᤻ᤒᤠᤖᤧ ᤀᤠᤰᤂᤧᤴ ᤆᤠᤣ ᤔᤧᤔᤧᤳᤋᤢᤛᤠᤱ ᤆᤠᤣ ᤔᤧᤗᤠᤛᤠᤴ ॥ ᤁᤢᤕᤠᤶᤍᤢᤰᤔᤠᤖᤧ ᤏᤠᤠᤘᤠᤀᤠᤱ ᤌᤠᤀᤡᤱ ᤔᤧᤴᤄᤠᤣᤛᤢᤴ ॥ ᥊ ᤕᤧᤴᤏᤠᤱᤎᤠᤣ ᤆᤫᤠᤋᤠᤱ ᤔᤧᤴᤎᤢᤱᤅᤣ ᤁᤢᤛᤰᤔᤠ ᤗᤧᤶᤓᤣᤁ᤻ ᤏᤧ᤹ᤏᤠᤀᤠᤣᤖᤰ ᤁᤧᤏᤧᤒᤠ ᤑᤗᤠᤶᤛᤡᤱ ᤛᤡᤒᤠ ᤜᤡᤱᤒᤠ ᤌᤣᤀᤠᤱ ᤆᤡᤈᤣᤵᤔᤠ ᤔᤧᤴᤕᤠᤏ᤻ᤏᤠ ᤏᤠᤘᤠᤀᤠᤣ ᤏᤧᤛ᤻ᤛᤠ ॥ ᥊ ᤕᤧᤴᤒᤠ ᤛᤧᤴᤍᤡᤰ ᤔᤧᤴᤏᤡᤆᤄᤵ ᤔᤢᤳᤌᤪᤡᤰ ᤐᤠᤣᤃᤠᤀᤠᤱ ᤛᤱᤔᤠᤱᤅᤣ ᤛᤱᤔᤠᤱ ᤗᤠᤣᤁ᤻ᤋᤠ ॥ ᤁᤧᤏᤡᤒᤠᤜᤠ᤹ ᤜᤢᤴᤇᤡ᤹ ᤏᤡᤱᤘᤠ᤹ᤔᤕᤠ ᤁᤢᤓᤠ᤹ ᤏᤧᤵᤑᤢ᤹ ᤛᤢᤱᤒᤠᤱ ᤌᤠᤱᤒᤧᤴᤖᤧ ᤋᤧᤶᤔᤠ ᤔᤧᤃᤠᤣᤋᤢ ᤔᤧᤶᤔᤠᤀᤱ ᤔᤧᤴᤕᤠᤏ᤻ᤍᤢᤏ᤻ ॥ ᤏᤠᤐ᤻ᤔᤠ ᤔᤧᤃᤠᤣᤋᤢ ᤏᤠᤐ᤻ᤔᤠᤀᤠᤱ ᤔᤧᤴᤕᤠᤏ᤻ᤍᤢᤴ ᤜᤢᤴᤇᤡ᤹ ᤔᤡᤰᤌᤠᤔ᤻ᤒᤠᤣ᤹ᤏᤢ ᤔᤕᤠᤒᤣ ॥
ᤜᤡᤶᤛᤕᤅ᤻ ᤏᤢ ᤐᤠᤱᤓᤣ᤹ᤛᤠᤒᤠ᤹ ᤁᤧᤖᤧᤰ ᤏᤡᤱᤘᤠ᤹ᤔᤠᤔᤠᤏᤢ ᤛᤠᤣᤖᤡᤰ ᤏᤡᤱᤘᤠ᤹ ᤀᤡᤃᤣᤁ᤻ᤔᤠᤖᤧ ᤋᤧᤶᤛᤢᤛᤡ ॥ ᤀᤠᤰᤂᤩᤠᤱ ᤀᤰᤂᤣᤗ᤹ᤖᤡᤰ ᤁᤴᤍᤱ ᤁᤢᤕᤠᤶᤁᤧᤍᤢᤰᤐᤠ ᤕᤠᤵᤔᤡᤀᤡᤴ ᤐᤠᤣᤃᤠᤀᤱ ᤗᤠᤣᤁ᤻ᤋᤠ ᥅ ᤜᤣᤰᤁᤣᤛᤠᤱ ᤋᤧᤶᤔᤠᤀᤱ ᤀᤠᤴᤕᤠᤏ᤻ᤍᤢᤶᤔᤡᤴ ᤗ᤹ᤖᤡᤰ ᤐᤠᤏ᤻ᤗᤧ ᤁᤢᤒᤠᤏ᤻ ᤔᤧᤈᤧᤰᤂᤢᤖ ᤔᤧᤕᤢᤱᤅᤠ ᤜᤢᤴᤇᤡ᤹ ᤏᤡᤱᤘᤠ᤹ ᤔᤕᤠᤖ ॥ ᤀᤠᤸᤗ ᤀᤠᤰᤂᤣ ᤆᤠᤣᤁ᤻ᤔᤠ ᥅ ᤗ᤹ᤖᤡᤰ ᤀᤡᤱᤍᤱ ᤔᤧᤆᤠᤣᤃᤠᤖ ᤁᤢᤓᤠ᤹ ᤌᤠᤱᤒᤣᤴᤜᤠᤱ ᤑᤗᤠᤶᤛᤡᤱ ᤗᤠᤣᤁ᤻ᤋᤠ ᤐᤣᤒᤠ ᤐᤡᤛᤠᤱ ᤋᤡᤕᤠᤗᤠᤣ᤹ᤗᤢ ᤁᤢᤃᤠᤣᤇᤧ᤹ᤀᤠᤱ ᤔᤣᤒᤣ ॥ ᤔᤧᤴᤄᤠᤣᤛᤢᤴᤏᤠᤱ ᤐᤠᤖᤰ ᤔᤧᤏᤢᤂᤠ ᤔᤧᤍᤩᤠ ᤌᤠᤱᤒᤧᤴᤜᤠ᤹ ॥ ᤁᤧᤖᤧᤰ ᤜᤢᤴᤇᤡ᤹ ᤏᤡᤱᤘᤠ᤹ᤔᤕᤧᤖ ᤛᤧᤴᤍᤡᤰ ᤁᤢᤍᤡᤶ ᤔᤧᤕᤢᤱᤅᤣ ॥
ᤑᤗᤠᤶᤛᤡᤱᤖᤧ ᤁᤢᤏᤡᤕᤠᤖᤠᤀᤠᤣᤃ ᤗᤧᤴᤍᤡᤰ ᤜᤣᤁᤣᤀᤣ ᤂᤠᤀᤠᤣᤐᤠ ᤘᤏᤠᤶᤔᤢ ᤏᤡᤛᤢ ॥ ᤗᤌᤡᤶ ᤋᤢᤶᤓᤠᤰᤛᤠ (ᤜᤠᤱᤛᤠᤶ ᤌᤣᤒᤠ᤹) ᤀᤡᤴ ᤋᤩᤠᤀᤠᤱ ᤁ᤹ᤏᤠᤑᤧᤖᤧ ᤗ᤹ᤖᤡᤰᤔᤢ ᤜᤢᤏᤧ᤹ᤗᤧᤶᤈᤠᤱ ᤀᤢᤋᤢ ॥ ᤜᤧᤰᤁᤩᤠᤱ ᤔᤢᤳᤌ᤻᤹ᤖᤡᤰ ᤐᤠᤣᤃᤠᤀᤠᤱ ᤐᤣᤒᤠᤔᤢ ॥ ᤜᤧᤴᤕᤧᤶ ᤑᤗᤠᤶᤛᤡᤱᤖᤧ ᤁᤢᤕᤠᤶᤍᤢᤰᤔᤠᤴ ᤏᤡᤱᤘᤠ᤹ᤛᤢᤶᤔᤠᤣ ᤌᤠᤀᤡᤱ ᤜᤠᤣᤐ᤻ᤋᤠ ॥ ᤜᤠᤱᤛᤠᤶ ᤌᤣᤒᤠ᤹ᤖᤧ ᤗᤌᤡᤰ ᤕᤶᤒᤠ ᤛᤡᤱᤒᤢᤱᤅᤠᤣ ᤕᤧᤵᤛᤢᤔᤢ ᤜᤧᤰᤁᤩᤠᤱ ᤁᤢᤓᤣᤛᤠᤱ ᤆᤠᤕᤠ᤹ᤖᤡᤶᤒᤠ (ᤛᤡᤔ᤻ᤒᤡ ᤜᤧᤰᤋᤶᤒᤠ) ᤗᤣᤋᤢᤔᤢ ॥ ᤜᤧᤴ ᤕᤠ᤹ᤖᤡᤔ᤻ᤒᤠᤴ ᤀᤠᤸᤗᤠᤣᤏᤢ ᤁᤶᤓᤠ ᤗᤡᤱᤅᤠᤀᤠᤱ ᤐᤠᤣᤖ᤻ ᤌᤠᤅᤣᤒᤣ ॥ ᤑᤗᤠᤶᤛᤡᤱᤖᤣ ᤁᤢᤗᤠᤱ. ᤁᤢᤜᤢᤰ. ᤁᤢᤎᤰ ᤁᤧᤖᤧᤰ ᤀᤕᤠᤁ᤻ᤁᤠᤱ ᤔᤧᤳᤔᤧᤴᤕᤠᤔᤏᤠ ᤐᤠᤣᤂᤠᤖ ᤗᤜᤖᤠᤖᤧ ᤀᤡᤓᤢᤳᤋᤢᤔᤢ ॥ ᤜᤧᤰᤁᤩᤠᤱ ᤜᤠᤱᤛᤠᤶ ᤌᤣᤒᤠ᤹ᤔᤠᤱᤗᤣ ᤛᤣᤏ᤻ᤍᤠᤣ ᤆᤠᤣᤃᤢ ॥
ᤜᤠᤱᤛᤠᤶ ᤌᤣᤒᤠ᤹ – ᤀᤠᤱᤃᤠ᤹ ᤌᤩᤠᤱ ᤜᤡᤔᤣᤋ᤻ ᤁᤧᤔᤧᤳᤋᤠᤱ ᥅ ᤛᤣᤘᤠ ᤜᤧᤏᤠ ᤌᤩᤠᤱ ᤁᤧᤶᤔᤧᤳᤋᤱᤅᤡᤴ ᥅
ᤑᤗᤠᤶᤛᤡᤱ – ᤀᤠᤱᤃᤠ ᤔᤧᤸᤗᤧᤒᤠᤴ (ᤀᤰᤁᤣᤖᤡᤰ ᤐᤠᤋᤢ ᤁᤴ ᤛᤢᤳᤗᤠᤏᤢ ᤛᤠᤣᤛᤠᤣᤖᤡᤰ ᤑᤗᤠᤶᤛᤡᤱᤖᤧ ᤐᤠᤐ᤻ᤔᤠ ᤜᤣᤁ᤻ᤋᤢ )
ᤜᤠᤱᤛᤠᤶ ᤌᤣᤒᤠ᤹ – ᤁᤢᤛᤡᤱ ᤁᤧᤏᤡᤳᤋᤠᤱᤒᤡ ᤹ ᤔᤧᤔ᤻ᤒᤡ ᥅
ᤑᤗᤠᤶᤛᤡᤱ – ᤔᤧᤏ᤻ ᤁᤢᤛᤡᤱ ᤔᤧᤏᤡᤏᤧᤴ ॥
ᤜᤠᤱᤛᤠᤶ ᤌᤣᤒᤠ᤹ – ᤀᤢᤏ᤻ᤇᤣᤏ᤻ᤒᤠ ᤛᤠᤘᤠᤏ᤻ᤒᤠ ᤐᤠᤏ᤻ᤏᤡᤴ ᤏᤡᤱᤘᤠ᤹ ᤁᤧᤓᤣᤇᤢᤒᤡ ᥅
ᤑᤗᤠᤶᤛᤡᤱ – ᤏᤡᤱᤘᤠ᤹ ᤑᤣᤇᤢᤱ ᤌᤠᤀᤡᤱ ᤔᤧᤴᤄᤠᤣᤒᤠᤴ ॥
ᤜᤠᤱᤛᤠᤶ ᤌᤣᤒᤠ᤹ – ᤏᤢᤖᤡᤰ ᤏᤡᤱᤘᤠ᤹ ᤁᤣᤀᤡᤳᤋᤢᤸᤗᤧ ᤁᤧᤏᤡᤱᤘᤠ᤹ ᤋᤠᤒᤡ ᥅
ᤑᤗᤠᤶᤛᤡᤱ – ᤀ᤺ᤜ᤹᤺ ᤀᤠᤏᤡᤱᤘᤠ᤹ ᤔᤧᤍᤠᤏᤧᤴ ॥
ᤜᤠᤱᤛᤠᤶ ᤌᤣᤒᤠ᤹ – (ᤂᤠᤍᤠᤶᤛᤠᤶᤗᤧ ᤁᤧᤃᤵᤋᤠᤖᤇ ॥ ᤛᤠ᤺ᤀᤡᤴ ᤁᤧᤒᤰᤂᤢᤀᤠᤱ ᤌᤩᤠᤱ ᤕᤢᤔᤠ᤹ ᤔᤠᤀᤡ ᤘᤠᤜᤱᤅᤠᤣ ᤁᤧᤗᤠᤛᤠᤒᤠ ᥅ ᤜᤧᤴ ᤆᤠᤔᤠ ᤔᤧᤏᤢ᤹ᤏᤧᤴ ॥ ᤕᤠᤣ ᤔᤠᤀᤡᤴ ᤗᤧᤵᤔᤡ
ᤏᤠᤁ᤻ᤋᤧ ॥) ᤁᤶᤔᤩᤠᤁ᤻ ᤐᤠᤋᤢᤀᤠᤱ ᤕᤠᤣᤒᤡᤛᤠᤱ ᤛᤠᤣᤁ᤻ᤋᤢ ᤐᤡᤖᤢᤀᤠᤱ ᤜᤠᤱᤛᤠᤶ ᤌᤣᤒᤠ᤹ᤀᤡᤱ ᤔᤧᤴᤏᤡ ᤐᤠᤣᤂᤠᤒᤣ ॥ ᤔᤤᤏᤠ ᤛᤡᤱᤀᤠᤣ ᤗᤜᤖᤠᤖᤧ
ᤀᤡᤓᤢᤳᤋᤢᤀᤠᤱ ᤘᤕᤠᤒᤠᤴᤏᤠᤱ ᤀᤠᤴᤍᤣᤏ᤻ ᤗᤧᤳᤇᤡᤱ ᤐᤠᤣᤂᤠᤀᤠᤱ ᤘᤕᤠ ॥ ᤑᤗᤠᤶᤛᤡᤱᤖᤧ ᤕᤱᤔᤠ ᤏᤢ ᤑᤰᤘᤠ ᤗᤧᤅ᤻ᤘᤠ ᤗᤶᤔᤠ ᤁᤧᤖᤧᤰ ᤁᤢᤕᤠᤶᤍᤢᤔᤠᤴᤏᤠᤱ
ᤆᤵᤋᤢᤐᤣᤀᤠᤱ ᤜᤠᤣᤐ᤻ᤋᤠ ॥
ᤑᤗᤠᤶᤛᤡᤱᤖᤧ ᤜᤠᤱᤛᤠᤶ ᤌᤣᤒᤠ᤹ᤖᤧ ᤀᤠᤣᤏ᤻ᤎᤠᤰ ᤆᤠᤣᤃᤢᤒᤠ ᤕᤠᤣᤐᤡᤛᤠᤱ ᤐᤏᤠᤣᤖᤡᤰ ᤏᤡᤕᤠᤖ ᤋᤣᤛᤢ ॥ ᤑᤗᤠᤶᤛᤡᤱᤖᤧ ᤁᤢᤏᤧᤰᤂᤠᤣ᤹ᤒᤠᤀᤠᤣ ᤐᤏᤠᤣᤏᤢᤒᤠ. ᤗᤢᤱᤔᤠ᤹ ᤛᤡᤕᤠᤣᤏ᤻ ᤁᤧᤕᤠᤣᤔ᤻ᤒᤠ. ᤏᤡᤱᤘᤠ᤹ ᤛᤣᤛᤣ ᤁᤧᤈᤠᤣᤁ᤻ᤐᤠ ᤔᤢᤴᤎᤢᤶᤔᤡ ᤔᤢᤰᤐᤣᤜᤠ᤹ ᤔᤢᤰᤋᤠᤖ ᤘᤕᤠ ॥ ᤘᤠᤜᤱᤅᤠᤣᤏᤢ ᤑᤁᤧᤖ᤹ᤒᤠ ᤆᤠᤱᤘᤠ ᤁᤧᤈᤠᤱᤔᤠ (ᤜᤠᤱᤛᤠᤶ ᤕᤢᤔᤠ᤹ ) ᤔᤠᤱᤅᤡᤴ ᤐᤏᤠᤣᤔᤢᤕᤧᤱᤛᤠ ᤀᤣᤖᤠᤖ ᤌᤠᤱᤅᤠ ॥ ᤑᤠᤗᤠᤶᤛᤡᤱᤖᤧ ᤁᤢᤎᤣᤁ᤻ᤐᤠᤀᤠᤣ ᤜᤢᤰᤁᤡᤴ ᤏᤧᤛ᤻ᤛᤢᤀᤠᤱ (ᤋᤠᤏ᤻ᤍᤡ ᤕᤶᤒᤠ᤹ ᤔᤠᤱᤎᤰ ᤁᤧᤒᤠᤣᤅ᤻ ᤋᤃᤡᤒᤠ ᤏᤠᤣᤏᤧᤳᤀᤡᤴ ᤁᤢᤍᤡᤶᤒᤠ ᤆᤠᤣᤃᤧ ॥ ᤁᤧᤗᤠᤛᤧ ᤀᤠᤱᤃᤠ᤹ᤀᤣ ᤐᤠᤱᤄᤢᤱᤛᤡᤱᤒᤠ ॥) ᤐᤠᤋᤢᤀᤠᤱ ᤜᤠᤱᤛᤠᤶ ᤕᤢᤔᤠᤀᤡᤴ ᤕᤠᤣ ᤘᤠᤜᤱ ᤐᤡᤛᤠᤱ ᤐᤣᤖ ᤔᤧᤴᤏᤡ ᤐᤠᤣᤂᤠᤒᤣ ॥
ᤔᤢᤴᤎᤢᤶᤔᤡ ᤔᤢᤰᤐᤣᤜᤠ᤹ᤖᤧ ᤀᤡᤋ᤻ᤗᤠ ᤛᤅ᤻ᤗᤠᤜᤠ᤹ᤏᤢ ᤁᤢᤍᤱᤒᤠ ᤑᤗᤠᤶᤛᤡᤱᤖᤣ ᤜᤡᤴᤍᤠᤣᤁ᤻ ᤛᤡᤃᤠᤱ ᤏᤡᤕᤠᤖᤠ ᤍᤣᤛᤢ ॥ ᤕᤠᤣᤓᤠᤒᤠ ᤌᤰᤛᤠ ᤐᤢᤛᤠ. ᤕᤱᤄᤴ ᤁᤢᤛᤠᤀᤠᤣ ᤛᤠᤶᤕᤠᤣᤃᤧᤶ ᤕᤔᤡᤱᤍᤣᤛᤢ ॥ ᤘᤠᤜᤱᤅᤠᤣ ᤐᤣᤖ ᤑᤡᤖᤡᤱᤗᤡᤱᤏᤠ ᤏᤠᤶᤛᤧᤒᤠ ᤂᤠᤀᤠᤣᤐ᤻ᤐᤠ ᤋᤧᤴ ᤛᤧ᤹ᤔᤧᤸᤗᤠᤁ ᤘᤠᤔᤧᤶᤔᤡ . ᤏᤠᤶᤔᤧᤶᤒᤡᤴ ᤏᤠᤶᤔᤧᤴᤎᤠ. ᤁᤢᤛᤠᤐᤏᤢ᤹ ᤏᤢᤖᤡᤰ ᤔᤠ᤺ ᤑᤰᤋᤢᤱᤎᤠᤣ. ᤐᤠ᤺ᤑᤰᤋᤢᤱᤎᤠᤣ ᤘᤠᤔ᤻ᤏᤠᤒᤠ ᤁᤢᤛᤡᤱ ᤗ᤹ᤖᤧᤖ ᤘᤕᤧ ॥ ᤔᤧᤴᤏᤡ ᤃᤄᤵ ᤔᤠᤀᤡ ᤘᤠᤜᤱᤅᤠᤣ ᤆᤢᤖᤗᤢᤶᤔᤤ ᤏᤡᤒᤗᤠᤛᤣ ᤐᤣ ॥ ᤆᤢᤘᤠᤋ᤻ᤛᤡᤃᤠᤱᤏᤢ ᤗᤴᤍᤠᤸᤗᤃ ᤔᤡᤰᤗᤣ ᤋᤠᤛᤢᤖ ᤌᤠᤖᤡᤰ ᤂᤠᤀᤠᤣᤋᤠᤀᤠᤱ ᤘᤕᤠ ॥ ᤋᤠᤱᤛᤠᤰᤐᤠᤣ ᤏᤠᤶ. ᤗᤠᤒᤠ ᤏᤢ ᤂᤣᤛᤣ᤹ᤒᤠᤜᤠ. ᤑᤡᤖᤡᤱᤗᤡᤱᤏᤠ ᤔᤧᤀᤠᤣᤋᤧᤖ ᤔᤧᤒᤳᤇᤠ ॥
ᤋᤠᤅ᤻ᤛᤠᤰᤐᤠᤀᤠᤣᤏᤢ ᤁᤡᤖᤠᤋ᤻ ᤙᤰᤙᤰᤂᤠ᤹ ᤛᤠᤶᤔᤩᤠᤱ. ᤕᤢᤵᤐᤠ. ᤜᤡᤗ᤻ᤗᤡᤔᤢᤎᤢᤱ ᤁᤢᤛᤡᤱ ᤑᤡᤖᤡᤱᤗᤡᤱᤏᤠ ᤁᤧᤗᤧᤰᤐᤠ ᤛᤠᤶᤈᤡᤰ ᤔᤢᤴᤎᤢᤶᤜᤠ᤹ ᤔᤧᤎᤩᤠᤀᤱ ᤑᤗᤠᤶᤛᤡᤱᤗᤧ ᤀᤠᤒᤠᤱᤅᤣ ᤁᤢᤶᤖᤠᤀᤠᤣ ᤔᤧᤗᤠᤛᤣᤒᤠ ᤏᤡᤛᤢ ॥ ᤜᤣᤰᤁᤣᤗ᤹ᤖᤡᤰ ᤁᤧᤎᤠᤒᤠ ᤙᤰᤙᤰᤜᤠ᤹ᤀᤠᤣ ᤁᤧᤖᤧᤰ ᤛᤛᤡ ᤔᤢᤴᤎᤢᤶ. ᤛᤠᤶᤈᤡᤰ ᤔᤢᤴᤎᤢᤶᤒᤠ ᤔᤢᤰᤑᤠᤣᤜᤠ᤹ ᤌᤩᤠᤒᤠ ॥ ᤁᤧᤖᤧᤰ ᤑᤸᤃᤢᤏᤴᤍᤖᤧ ᤁᤢᤗᤢᤱᤔᤠ᤹ᤀᤠᤣ ᤀᤠᤵᤑᤠᤸᤗᤠᤱ ᤔᤧᤶᤒᤣᤁ᤻ᤏᤠ ᤏᤠᤘᤠᤀᤠᤣ ᤛᤠᤵᤕᤠᤣᤁ᤻ ᤛᤠᤵᤛᤡᤱᤅᤠᤱ.ᤗᤡᤱᤕᤠᤣᤁ᤻ ᤗᤡᤅᤅ᤻ᤛᤡᤱᤅᤠᤱ ᤕᤢᤱᤛᤡᤱ ॥ ᤜᤧᤴ ᤛᤠᤶᤈᤡᤰ ᤔᤢᤴᤎᤢᤶ ᤔᤢᤰᤑᤠᤣᤜᤠ᤹ᤖᤧ ᤛᤡᤰᤁᤢᤶᤖᤧ ᤑᤗᤠᤶᤛᤡᤱ ᤛᤣᤏᤡᤱᤘᤠ᤹ ᤛᤣᤛᤣ. ᤋᤠᤏᤡᤱᤘᤠ᤹ ᤋᤠᤶᤍᤠᤶ. ᤑᤠᤣᤏᤡᤱᤘᤠ᤹ ᤑᤠᤣᤓᤠᤣᤒᤠ ᤐᤠᤣᤂ᤻ᤒᤠ ᤕᤠᤶᤏᤡᤱᤘᤠ᤹ ᤀᤡᤋᤢ ॥
ᤑᤗᤠᤶᤛᤡᤱᤗᤧ ᤛᤠᤶᤈᤡᤰ ᤔᤢᤴᤎᤢᤶᤔᤡᤒᤠ ᤏᤡᤛᤠᤶ ᤂᤠᤣᤛᤢᤒᤠ ᤔᤠᤵᤔᤠ ᤀᤡᤍᤡᤁ᤻ᤁᤠᤱ ᤆᤰᤌᤩᤠ ॥ ᤏᤡᤱᤘᤠᤓᤢ ᤔᤠᤔᤠᤱ ᤑᤰᤋᤢᤱᤎᤠᤣ ᤐᤠᤔᤠᤱ ᤑᤰᤋᤢᤱᤎᤠᤣ ᤘᤠᤕᤠᤒᤠᤁᤢᤛᤡᤱᤒᤠ ᤕᤠᤶᤏᤡᤱᤘᤠ᤹ᤖᤧ ᤗᤧᤖᤢ ॥ ᤀᤠᤴᤍᤣᤏ ᤏᤡᤛᤢᤒᤠ ᤏᤡᤕᤠᤖᤠᤜᤠ᤹ ᤁᤧᤖᤧᤰ ᤆᤡᤈᤡᤐᤠᤣᤂᤠ ॥ ᤀᤠᤸᤗ ᤛᤧᤰᤂᤠᤒᤠ ᤂᤠᤍᤠᤶᤈᤩᤠᤁᤁᤠᤣ ᤘᤠᤕᤠ ॥ ᤐᤛᤧᤶ ᤛᤧᤶᤜᤣᤁ᤻ᤋᤠ ᤑᤢ᤹ᤗᤢᤱᤗᤢᤱᤏᤠ ᤕᤰᤂᤢ ॥ ᤐᤣᤁ᤻ᤔᤠᤑᤠ᤹ᤛᤠᤱ ᤀᤠᤋᤠᤏ᤻ ᤐᤣᤁ᤻ᤔᤠᤀᤠᤱ ᤀᤠᤳᤋᤠᤣᤀᤠᤣ ᤘᤠᤀᤠ ᤁᤧᤖ᤹ᤒᤠ ᤐᤠᤏ᤻ᤏᤡᤱᤅᤠᤱ ᤌᤠᤀᤡᤱ ᤔᤧᤄᤠᤣᤛᤢᤴ ॥ ᤛᤧᤵᤔᤠᤱᤎᤠᤣ ᤘᤠᤀᤠᤒᤡ ᤕᤠᤰᤌᤢᤱᤎᤠᤣ ᤘᤠᤀᤠᤒᤡ ᤁᤧᤖ᤹ᤒᤠ ᤐᤠᤏ᤻ᤏᤡᤴ ᤛᤧᤶᤔᤠ ᤔᤧᤛᤢᤰᤋᤢᤴ ॥ ᤀᤠᤴᤍᤣᤔ᤻ᤒᤠ ᤏᤡᤛᤢᤒᤠ ᤏᤡᤕᤠᤖᤠᤜᤠ᤹ ᤁᤢᤔᤡᤰᤌᤠᤔ᤻ᤒᤠᤣ᤹ ᤕᤧᤗᤧᤱ ᤕᤧᤗᤧᤱ ᤋᤩᤠ ॥ ᤜᤢᤏᤧ᤹ ᤀᤠᤒᤠᤱᤅᤣᤀᤠᤱ ᤁᤢᤏᤡᤱᤘᤠ ᤔᤕᤧᤀᤠᤱ ᤘᤕᤠ ॥ ᤀᤠᤸᤗ ᤀᤠᤰᤂᤣ ᤆᤠᤣᤁ᤻ᤁᤠ᤹ᤀᤡ ᤆᤠᤣᤁ᤻ᤁᤠ᤹ᤀᤡ ᤗ᤹ᤖᤠᤖ ᤋᤠᤱᤓᤢᤱᤒᤠ ᤌᤰᤛᤠ ᤐᤢᤛᤠᤜᤠ᤹ ᤐᤠᤐ᤻ᤔᤠ ᤔᤧᤜᤣᤁ᤻ᤋᤠ ॥ ᤘᤜᤠᤱᤅᤡᤴ ᤁᤢᤀᤡᤛᤡᤰ ᤛᤁ᤻ᤋᤠᤖ ᤏᤧᤛᤠ ॥ ᤜᤧᤰᤁᤩᤠᤱ ᤑᤢ ᤑᤢ ᤂᤠᤀᤠᤣᤐ᤻ᤔᤠ ᤜᤣᤁ᤻ᤋᤠ ॥ ᤂᤠᤀᤠᤣᤋ᤻ᤖ ᤐᤣᤀᤡᤸᤗ ᤀᤠᤸᤛᤠᤱ ᤁᤢᤗᤢᤱᤔᤠ᤹ᤒᤠᤴ ᤕᤰᤂᤢᤖ ᤛᤧᤐ᤻ᤛᤠ ॥ ᤀᤠᤰᤂᤠᤣ ᤑᤫᤠᤅ᤻ᤅᤤ ᤂᤠᤀᤠᤣᤋᤠᤸᤃ ᤁᤢᤶᤒᤠᤖᤧ ᤆᤠᤣᤃᤢᤒᤠ ᤕᤠᤰᤛᤠ᤹ᤖᤧ ᤁᤢᤓᤣᤛᤠᤱ ᤘᤕᤠ ॥
ᤑᤗᤠᤶᤛᤡᤱ ᤁᤢᤶᤒᤠᤖᤧ ᤁᤢᤕᤠᤰᤛᤠ ᤁᤢᤓᤣᤛᤠᤱ ᤕᤢᤱᤖᤘᤕᤧᤸᤗᤧ ᤁᤢᤃᤠᤣᤳᤇᤧ ᤁᤧᤕᤢᤒᤠᤜᤠ᤹ᤀᤠᤱ ᤏᤡᤛᤢᤛᤡ ᤜᤢᤴᤇᤡ᤹ᤀᤠᤱ ᤔᤧᤏᤡᤛᤢ ॥ ᤕᤠᤶᤔᤠᤣ ᤑᤗᤠᤶᤛᤡᤱ ᤗᤠᤣᤁ᤻ᤐᤣᤁ᤻ᤐᤡ ᤑᤠ᤹ᤀᤠᤱ ᤔᤧᤎᤣᤁ᤻ᤋᤢᤖ ᤏᤡᤋᤠᤱ ᤔᤧᤍᤩᤠ ॥ ᤑᤗᤠᤶᤛᤡᤱᤗᤧ ᤔᤧᤎᤣᤁ᤻ᤋᤢᤒᤠ ᤏᤡᤛᤢᤀᤠᤱ ᤁᤢᤀᤣᤐ᤻ᤔᤠ ᤕᤢᤛᤧᤖ᤻ ᤕᤢᤅᤠ॥ ᤑᤗᤠᤶᤛᤡᤱ ᤔᤧᤍᤧᤶᤛᤢ ᤜᤧᤰᤁᤩᤠᤱ ᤛᤧᤴᤍᤠᤣ ᤔᤧᤈᤠᤣᤃᤢ ॥ ᤜᤣᤏᤣ᤹ ᤀᤠᤰᤂᤣᤏᤢ ᤜᤧᤰᤋᤶᤒᤠ ᤁᤣᤕᤠᤶᤍᤢᤰᤔᤠᤴ ᤏᤢ᤹ᤖᤠ ᥅ ᤀᤠᤳᤋᤠᤣ ᤁᤣᤒᤣ ᥅ ᤌᤣ ᤁᤧᤈᤠᤣᤃᤢ ᥅ ᤀᤠᤳᤋᤠᤣ᤹ ᤕᤠᤱᤁᤧᤎᤠᤣᤁ᤻ᤋᤠ ᥅ ᤗ᤹ᤖᤡᤰ ᤛᤣᤏ᤻ᤔᤧᤍᤠᤣᤛᤢᤸᤗᤧ ᤑᤗᤠᤶᤛᤡᤱᤖᤧ ᤀᤠᤴᤍᤣᤔ᤻ᤒᤠ ᤏᤡᤛᤢᤒᤠ ᤏᤡᤕᤠᤖᤠᤜᤠ᤹ ᤁᤧᤖᤧᤰ ᤆᤧᤰᤋᤢᤛᤡᤡ ॥ ᤁᤢᤃᤠᤣᤇᤧ ᤁᤧᤕᤢᤒᤠᤖᤧ ᤌᤩᤠᤱ ᤁᤢᤕᤠᤶᤋᤢᤃᤧᤒᤠ ᤁᤧᤖ᤹ᤒᤠᤴᤏᤠᤱ ᤏᤠᤣᤖᤡᤰ ᤌᤠᤀᤡᤱ ᤔᤧᤈᤠᤣᤃᤢ ॥ ᤑᤗᤠᤶᤛᤡᤱ ᤋᤠᤏ᤻ᤍᤡ ᤕᤶᤒᤠ ᤔᤠᤱᤎᤰ (ᤀᤱᤛᤡ) ᤁᤧᤒᤠᤣᤅ᤻ᤒᤠᤖᤤᤇ ᤔᤧᤔᤧᤳᤋᤢ ॥ ᤜᤧᤰᤁᤩᤠᤱ ᤁᤧᤖᤧᤰ ᤎᤠᤣᤍᤣᤏᤡ ᤜᤢᤴᤇᤡ᤹ ᤜᤡᤶᤔᤣ ᤔᤣᤏᤢᤂᤠ ॥
ᤛᤠᤘᤠᤏ᤻ᤏᤢ ᤛᤠᤣᤖᤡᤰ ᤔᤧᤴᤈᤠᤖᤡᤖᤧ ᤏᤠᤘᤠᤀᤠᤣ ᤁᤧᤘᤠᤒᤠ ᤑᤗᤠᤶᤛᤡᤱ ᤁᤢᤜᤡᤴᤎᤠᤣᤁ᤻ᤁᤠᤣ᤹ ᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤔᤧᤍᤠᤛᤢᤶᤒᤠ ᤀᤠᤸᤌᤠᤖᤡᤰ ᤜᤠᤸᤗᤠᤱ ᤔᤧᤏᤡᤛᤢᤶᤒᤠ ᤔᤧᤄᤧᤵᤛᤢᤶᤒᤠ ᤏᤡᤛᤢ ᤋᤢᤔᤢᤀᤠᤱ ᤘᤕᤠ ॥ ᤔᤧᤃᤠᤣᤋᤢᤒᤠ ᤔᤏᤠ ᤏᤢ ᤁᤢᤃᤠᤣᤳᤇᤧ ᤁᤣᤒᤣᤁ᤻ᤐᤠᤜᤠ᤹ ᤁᤧᤖᤧᤰ ᤁᤢᤛᤠᤏᤢᤖᤡᤰ ᤜᤡᤶᤔᤠᤣ ᤜᤠᤸᤗᤧᤰ ᤔᤧᤍᤩᤠᤀᤠᤱ ᤑᤗᤠᤶᤛᤡᤱ ᤁᤢᤶᤒᤠ ᤁᤢᤶᤔᤠ ᤛᤠᤖᤡᤰ ᤜᤢᤴᤇᤡ ᤛᤡᤖᤠ᤹ᤐᤎᤠᤱᤌᤠᤱᤅᤠ ॥ ᤐᤠᤱᤓᤣ᤹ᤛᤠᤒᤠ ᤁᤧᤖᤧᤰᤗᤧ ᤌᤣ ᤐᤠᤣᤂᤠ ᥅ ᤀᤠᤰᤂᤣᤖᤡᤰ ᤁᤣᤕᤠᤶᤍᤢᤰᤔᤠᤴ ᤏᤢ᤹ᤖᤠ ᥅ ᤀᤠᤳᤋᤠᤣ ᤁᤣᤒᤣ ᥅ ᤌᤣ ᤁᤧᤈᤠᤣᤃᤢ ᥅ ᤀᤠᤳᤋᤠᤣ᤹ ᤕᤠᤱᤁᤧᤎᤠᤣᤁ᤻ᤋᤠ ᤗ᤹ᤖᤡᤰ ᤕᤠᤶᤔᤠᤣ ᤛᤧᤴᤍᤠᤣ ᤔᤣᤈᤠᤣᤃᤢ ॥ ᤑᤗᤠᤶᤛᤡᤱᤗᤧ ᤛᤠ᤺ᤀᤡᤴ ᤁᤢᤔᤠᤀᤠᤱ ᤕᤢᤔᤠ᤹ ᤔᤠᤀᤡ ᤘᤠᤜᤱᤅᤠᤣ ᤐᤣᤁ᤻ᤔᤠᤀᤡᤴ ᤑᤣᤏ᤻ᤍᤢᤖᤣᤇ᤻ ᤗ᤹ᤖᤡᤰ ᤀᤠᤴᤍᤣᤏ᤻ ᤛᤧᤴᤍᤡᤰᤐᤠ ᤐᤠᤏᤜᤠ᤹ ᤕᤠᤶᤔᤠᤣ ᤁᤧᤖᤧᤰ ᤆᤧᤰᤋᤢᤐᤛᤡ ॥ ᤜᤧᤰᤁᤩᤠᤱᤗᤰ ᤁᤢᤶᤔᤠᤐᤠᤁ᤻ᤔᤠᤸᤗᤧ ᤜᤡᤶᤍᤠᤱᤒᤠᤖᤧ ᤑᤠ᤹ᤀᤠᤱ ᤆᤠᤈᤡᤃᤰᤖᤧ ᤁᤢᤗᤢᤶᤔᤠᤣ ᤑᤠᤰᤛᤠᤀᤡᤴ ᤕᤠᤰᤋᤢᤀᤠᤱ ᤕᤠᤃᤠᤒᤠ ᤐᤏ᤻ᤏᤡᤴ ᤐᤠᤋᤢ ॥
ᤔᤧᤴᤈᤠᤖᤡ ᤑᤸᤃᤢᤏᤴᤍᤖᤧ ᤁᤢᤕᤠᤶᤍᤢᤰᤔᤠᤖᤧ ᤀᤡᤴᤎᤣᤀᤡᤴ ᤌᤠᤀᤡᤱ ᤐᤠᤣᤂᤠ ॥ ᤁᤧᤖᤧᤰ ᤐᤠᤱᤓᤣ᤹ᤛᤠᤒᤠᤜᤠ᤹ ᤜᤢᤴᤇᤡ᤹ ᤏᤡᤱᤘᤠ ᤔᤕᤠ ᤁᤰᤋᤶᤒᤠᤀᤠᤱ ᤐᤠᤣᤅ᤻ᤒᤠᤖᤇ ᤗ᤹ᤖᤡᤰ ॥ ᤌᤣ ᤋᤠᤵᤑᤧᤁ᤻ ᤆᤠᤣᤍᤠᤱ ᤆᤠᤣᤁ᤻ᤔᤠᤸᤗᤧ ᤘᤠ᤹ ᤏᤢ ᤑᤠᤰᤗᤰ ᤆᤠᤜᤠ ᤁᤧᤆᤠᤣᤁ᤻ᤐᤠ ᤕᤧᤒᤠ. ᤛᤠᤶᤒᤠᤖᤧ ᤁᤰᤋᤶᤒᤠ ᤛᤡᤃᤠᤱᤒᤠ ᤁᤢᤈᤠ᤹ᤀᤡ ᤐᤠᤏ᤻ᤜᤠ᤹ ᤌᤠᤀᤡᤱᤅᤠᤱ ᤔᤧᤴᤃᤳᤋᤢᤴ ॥ ᤔᤡᤐ᤻ᤔᤠᤒᤠ ᤑᤗᤠᤶᤛᤡᤱ ᤏᤢ ᤀᤤᤏ᤻ᤒᤠ ᤑᤗᤠᤶᤛᤡᤱᤅᤠᤣ ᤕᤖᤡᤰ ᤗᤠᤋ᤻ᤗᤠᤋ᤻ ᤘᤕᤠ ॥ ᤗᤠᤸᤗ ᤑᤗᤠᤶᤛᤡᤱ ᤔᤢᤰᤁᤣ ᤔᤢᤰᤗᤣ ᤔᤢ᤹ᤀᤡᤀᤣ ᤔᤢ᤹ᤀᤡᤖᤧ ᤁᤢᤵᤋᤢᤒᤠ ᤗᤢᤶᤗᤢᤶᤒᤠ ᤐᤠᤣᤂᤠᤀᤠᤱ ᤘᤕᤠ ॥
ᤜᤠᤱᤛᤠᤶ ᤕᤢᤔᤠ ᤏᤢ ᤜᤠᤱᤛᤠᤶ ᤌᤣᤒᤠ᤹ᤖᤧ ᤀᤰᤂᤣᤗᤰᤖᤡᤰᤁᤣ ᤛᤠᤶᤈᤡᤰ ᤔᤢᤴᤎᤢᤶᤔᤡᤒᤠ ᤏᤡᤛᤠᤶ ᤆᤰ ᤔᤧᤶᤒᤢ᤹ᤒᤠ ᤂᤠᤣᤛᤢᤖᤘᤕᤠ ॥ ᤂᤠᤍᤠᤶᤗᤢᤶᤔᤠᤣ ᤜᤠᤱᤛᤠᤶ ᤕᤢᤔᤠ ᤏᤢ ᤌᤣᤒᤠ᤹ ᤔᤠᤱᤗᤣ ᤜᤡᤶᤔᤠᤣ᤹ᤏᤢ ᤁᤢᤓᤠ ᤕᤧᤶ ᤕᤠᤰᤛᤠᤀᤠᤣᤏᤢ ᤁᤢᤶᤒᤠᤏᤢ ᤀᤡᤶᤛᤡᤀᤠᤱ ᤏᤧᤛᤡᤸᤗᤧ ᤑᤠᤣᤅ᤻ᤛᤢᤀᤠᤱ ᤋᤣ᤹ᤛᤢᤒᤠ ᤏᤡᤛᤠᤶ ᤐᤡ᤹ᤛᤢᤒᤠ ॥ ᤁᤴ ᤔᤢᤴᤎᤢᤶᤔᤡᤴ ᤁᤴ ᤕᤠᤔ᤻ᤒᤰᤗᤣ ᤑᤠ᤹ᤀᤠᤱ ᤜᤢᤛᤢᤒᤠ ॥ ᤏᤡᤛᤠᤶ ᤐᤡ᤹ᤔᤠ ᤕᤠᤔ᤻ᤒᤰ ᤆᤢᤳᤋᤠᤱ ᤀᤡᤅ᤻ᤘᤠ ᤁᤠᤔᤠ ᤋᤃᤡ ᤕᤠᤶᤔᤠᤣ ᤜᤡᤶᤔᤠᤣ ᤕᤠ ᤕᤠᤰᤛᤠᤀᤠᤣ ᤛᤠᤛᤢᤎᤠᤛᤢᤒᤠᤠ ᤀᤰᤋᤶᤒᤠ ᤀᤡᤍᤡᤁ᤻ᤁᤣ ᤀᤡᤈᤠᤁ᤻ ᤐᤠᤣᤂᤠᤖ ᤘᤕᤠ ॥
ᤑᤗᤠᤶᤛᤡᤱᤅᤡᤴ ᤜᤠᤱᤛᤠᤶ ᤕᤢᤔᤠ᤹ ᤏᤢ ᤜᤠᤱᤛᤠᤶ ᤌᤣᤒᤠ᤹ᤖᤧ ᤏᤡᤛᤠᤶ ᤐᤡᤖᤧᤇᤢᤒᤠ ᤕᤧᤶᤔᤠᤣ ᤁᤢᤓᤠ᤹ ᤕᤧᤶᤃ ᤛᤠᤖᤡᤰᤁᤣ ᤋᤢᤰᤂᤣ ᤐᤠᤣᤂᤠ ॥ ᤁᤢᤓᤠ᤹ ᤕᤧᤶ ᤜᤡᤶᤔᤠᤣ ᤔᤧᤴᤃᤧᤳᤋᤣ ᤁᤢᤄᤧᤅ᤻ ᤗᤠᤶᤔᤠᤣ ᤗᤧᤳᤇᤢ ᤌᤠᤛᤢᤸᤀᤠᤱ ᤀᤠᤳᤋᤠᤣ ᤐᤣᤁ᤻ᤔᤠ ᤌᤣᤈᤠᤣᤁ᤻ᤔᤠ ᤐᤠᤣᤅ᤻ᤒᤠ ॥ ᤂᤠᤍᤠᤶᤈᤕᤩᤁᤁᤠᤣ ᤋᤠᤱᤓᤢᤱᤅᤠᤣᤏᤢ ᤀᤢᤅ᤻ᤛᤡᤱᤗ ᤜᤠᤐ᤻ᤗ ᤜᤡᤶᤔᤠᤣ ᤋᤠᤒᤠ ॥ ᤀᤁ᤻ᤁᤣᤖᤡᤰᤁᤣ ᤛᤠᤶᤈᤡᤰ ᤔᤢᤴᤎᤢᤶᤔᤡᤒᤠ ᤏᤡᤛᤠᤶ ᤐᤡ᤹ᤔᤠᤀᤡᤴ ᥌, ᤗᤠ ᤌᤠᤖᤡᤰ ᤔᤧᤸᤗᤧᤗᤧᤵᤐᤠ ᤀᤡᤈᤠᤁ᤻ ᤐᤠᤣᤂᤠᤖ ᤘᤕᤠᤔᤢ ॥ ᤕᤧᤴᤌᤵᤔᤠ ᤔᤠᤀᤡ ᤘᤠᤜᤱᤅᤠᤣ ᤑᤗᤠᤶᤛᤡᤱᤗᤧ ᤁᤢᤎᤣᤁ᤻ᤐᤠᤴᤗᤰ ᤏᤡᤌᤠᤐ᤻ᤗ ᤆᤢᤘᤠᤋᤀᤠᤣ ᤕᤢᤰᤂᤧᤇᤢᤀᤠᤱ ᤏᤡᤛᤠᤶ ᤐᤡᤖᤧᤇᤢᤸᤗᤧᤃ ᤋᤠᤏ᤻ᤍᤡ ᤋᤠᤏ᤻ᤍᤡ ᤁᤴ ᤛᤡᤔᤡᤰᤗᤢᤱᤅᤡᤴᤏᤣ ᤆᤢᤁ᤻ᤛᤠ ᤀᤢᤳᤖᤠᤇᤣ᤹ ᤁᤩᤠᤐᤠ ᤐᤠᤣᤂᤧᤐᤣᤒᤠᤔᤢ ᤏᤡᤛᤢ ॥
ᤀᤰᤂᤣᤗ᤹ᤖᤡᤰ ᤑᤗᤠᤶᤛᤡᤱᤗᤧ ᤔᤠᤜᤠ ᤋᤢᤰᤂᤣᤏᤢ ᤛᤠᤣᤛᤠᤣᤖᤡᤰ ᤂᤠᤣᤛᤢᤒᤠ ᤛᤠᤶᤈᤡᤰ ᤔᤢᤴᤎᤢᤶ ᤔᤢᤰᤑᤠᤣᤜᤠ᤹ᤖᤧ ᤛᤡᤔᤡᤁ᤻ᤗᤢᤱ ᤔᤠᤌᤱ ᤏᤢ ᤕᤶᤕᤶᤒᤠ ᤀᤡᤏ᤻ᤎᤣ. ᤔᤠᤜᤠᤔᤠᤖᤡᤜᤠ᤹ ᤗᤠᤕᤠᤣ ᤗᤠᤛᤠᤣᤋ᤻ᤜᤠ᤹ ᤀᤣᤐ᤻ᤋᤢᤋᤣᤛᤢ ॥ ᤁᤴ ᤕᤠᤣᤓᤠᤀᤠᤣ ᤏᤡᤛ᤻ᤛᤣᤖᤧ ᤔᤠᤖᤠᤶᤔᤡᤴ ᤏᤧᤛ᤻ᤛᤢᤀᤠᤱ ᤏᤧ ॥ ᤐᤠᤜᤧᤴ ᤋᤢᤰᤂᤣᤖᤧ ᤆᤠᤣᤃᤢᤸᤗᤧ ᤀᤠᤸᤗᤠᤣ ᤁᤴ ᤏᤡᤛ᤻ᤛᤣᤜᤠᤱᤔᤠ ᤔᤡᤱᤘᤠᤏ᤻ᤇᤡᤱ ॥ ᤂᤢᤏᤧ᤹ ᤏᤧᤛᤢᤒᤠ ᤔᤠᤗᤠᤶᤔᤡᤴ ᤋᤧᤴᤏᤡᤒᤠᤏᤢ ᤕᤢᤰᤑᤠᤣᤒᤠ ᤐᤠᤣᤅ᤻ᤗ ᤛᤡᤔᤡᤁ᤻ᤗᤢ ᤁᤢᤍᤡᤶ ᤐᤠᤣᤖ ᤐᤣᤁ᤻ᤗᤘᤠ ॥
