ᤏᤡᤛ᤻ᤛᤣᤜᤠᤱᤔᤠ. ᤗᤠᤈᤣ᤹ ᤔᤡᤱᤛᤠᤣ ᤔᤧᤶᤔᤠ ᤀᤱᤛᤡᤔᤠᤱ ᤗᤡᤱᤍᤧᤴ ᤑᤸᤃᤢᤏᤴᤍ ᤜᤏᤧ ᤁᤴ ᤕᤠᤣᤓᤠᤣ ᤛᤠᤘᤠᤏ᤻ ᤐᤠᤣᤂᤠᤒᤠ ᤔᤧᤴ ॥ ᤛᤠᤶᤈᤡᤰ ᤔᤢᤢᤴᤎᤢᤶᤒᤠ ᤐᤠᤏᤗᤠᤣᤁ᤻ ᤂᤠᤜᤢᤏ᤻ᤜᤠ᤹ᤀᤠᤣ (ᤀᤠᤱᤃ᤹ ᤋᤱᤒᤣ ᤋᤢᤶᤒᤠᤖᤧ ᤏᤠᤖᤠ ᤗᤧᤰᤂᤢᤱᤗᤠᤣ ॥ ᤏᤡᤛ᤻ᤛᤣᤖᤣ ᤔᤠᤖᤠᤶᤔᤡᤴ ᤏᤧᤛ᤻ᤛᤢᤴᤎᤠᤱᤗᤠᤣ) ᤋᤠᤃᤧᤖᤠ ᤏᤡᤱᤘᤠᤓᤢᤔᤠᤱᤅᤠᤣ ᤔᤠᤱᤜᤧᤰᤛᤡᤱᤅᤠᤱ ᤘᤠ ॥
ᤁᤴ ᤕᤠᤣᤓᤠᤀᤠᤣ ᤕᤧᤶ-ᤕᤧᤶᤔᤠᤣ ᤔᤧᤴᤇᤠᤶᤃᤧᤴ ᤏᤠᤶᤕᤠᤶᤔᤡᤜᤠ᤹ ᤏᤡᤛᤠᤶ ᤐᤡ᤹ᤔᤠᤛᤡ ᤏᤢ ᤛᤱᤈᤢᤶᤔᤡᤴ ᤌᤠᤣᤒᤠᤣ ᤆᤠᤣᤁ᤻ᤔᤠᤖᤧ ᤑᤠ᤹ᤀᤠᤱ ᤀᤱᤛᤡᤜᤠ᤹ ᤛᤠᤘᤠᤏ᤻ ᤔᤧᤒᤠᤣᤅ᤻ ॥ ᤁᤡᤖᤠᤋ ᤂᤠᤛᤠᤶᤒᤠ ᤛᤠᤵᤔᤢᤴᤎᤢᤶᤔᤠᤣ᤹ᤀᤠᤱ ᤛᤠᤣᤎᤢᤱᤃᤧᤴ ᤗᤧᤵᤔᤢᤜᤠᤱ. ᤕᤣᤜᤠᤱ. ᤁᤠᤴᤍᤧᤴᤜᤠᤱ. ᤌᤠᤁ᤻ᤌᤠᤁᤢᤔ᤻ ᤔᤠᤒᤠᤣᤜᤠᤱ ᤏᤢ ᤛᤪᤡᤈᤱᤃᤠᤜᤠᤱ ᤜᤧᤰᤋᤶᤒᤠ ᤀᤱᤛᤡᤜᤠ᤹ᤖᤧ ᤔᤡᤱᤛᤠᤣᤜᤠ᤹ ᤐᤏᤠᤣ ᤏᤠᤈᤶᤏᤢᤘᤠ᤹ ॥ ᤀᤠᤰᤂᤧᤴ ᤀᤱᤛᤡ ᤕᤠ ᤛᤠᤱ ᤗᤒᤠ ᤕᤠᤶᤔᤡᤜᤠ᤹ᤖᤧ ᤜᤢᤴᤇᤡ᤹ ᤔᤡᤱᤜᤠ᤹ᤃ ᤁᤠᤣᤔ᤻ᤓᤠᤣ ᤆᤠᤣᤁ᤻ᤔᤠᤀᤣ ᤘᤠ ॥
ᤀᤱᤛᤡ ᤛᤠᤘᤠᤏ᤻ᤇᤡᤱᤔᤠᤖᤧ ᤀᤠᤒᤠᤱᤅᤣ ᤕᤧᤶ ᤏᤢ ᤜᤢᤴᤇᤡ᤹ ᤕᤠᤔ᤻ᤒᤰᤗᤰ ᤀᤠᤒᤠᤱᤅᤣ ᤘᤠ ॥ ᤀᤱᤛᤡ ᤛᤠᤘᤠᤏ᤻ ᤔᤣᤒᤠᤣᤅ᤻ᤅᤠᤱ ᤕᤠᤣᤓᤠᤀᤠᤣ ᤆᤡᤈᤧᤵᤏᤢᤌᤠᤣᤒᤠ ᤗᤧᤰᤛᤡᤱᤐᤠᤣᤅ᤻ ॥ ᤂᤢᤏᤧ᤹ ᤁᤢᤛᤱ ᤔᤠᤠᤗᤠᤶᤖᤧ ᤁᤢᤜᤣᤁ᤻ᤛᤡᤱ ᤆᤠᤣᤃᤢ᤹ ᤐᤠᤜᤧᤴᤏᤧ ᤕᤧᤶᤛᤠᤱᤗᤒᤠ ᤔᤠᤗᤠᤶᤔᤠᤱ ᤐᤠᤣᤅ᤻ ॥ ᤛᤡᤔᤡᤁ᤻ᤗᤢᤱ ᤛᤏᤠᤖᤢᤱ ᤏᤢ ᤔᤧᤴᤇᤠᤶᤃᤧᤴ ᤏᤠᤶᤕᤠᤵᤔᤡ ᤌᤡᤰᤜᤢᤵ ᤆᤠᤣᤁ᤻ᤔᤠᤛᤡ , ᤕᤠᤣᤓᤠᤒᤠ ᤁᤧᤖᤧᤰ ᤌᤰᤛᤠᤐᤢᤛᤠ ᤋᤠᤱᤛᤧᤵᤔᤠᤖᤧ ᤛᤛᤡ ᤔᤢᤴᤎᤢᤶᤖᤧ ᤑᤠ᤹ᤀᤠᤱ ᤏᤡᤛ᤻ᤛᤣᤜᤠᤱᤔᤠ. ᤗᤠᤈᤣ᤹ ᤔᤡᤱᤛᤠᤣᤔᤧᤶᤔᤠ ᤀᤱᤛᤡᤔᤠᤱ ᤗᤡᤱᤍᤧᤴ ᤑᤸᤃᤢᤏᤴᤍᤖᤧ ᤛᤠᤘᤠᤏ᤻ ᤐᤠᤣᤂᤠ ॥
ᤁᤣᤛᤡᤱᤃᤧᤴ ᤐᤠ: ᤗᤡᤱᤍᤧᤴ ᤀᤱᤛᤢᤘᤴᤋ᤻ (ᤈᤃᤢᤴᤘᤠᤈ) ᤏᤢ ᤌᤠᤔᤧᤴᤍᤡᤱ ᤔᤠ : ᤒᤣᤄᤠ ᤜᤱᤛᤔᤋᤡ ᤗᤡᤱᤏᤧᤴᤖᤧ ᤑᤰᤋᤢᤱ ᤗᤠᤶᤒᤠ ᤕᤠᤱᤛᤖᤢᤶᤒᤠ ᤛᤠ᤺ᤀᤣᤖᤧ ᤏᤠᤘᤠᤀᤠᤣ, ᤐᤏᤠᤣ ᤕᤧᤴᤏᤡᤋ᤻ ᤒᤡᤁᤪᤶ ᤋᤱᤒᤣ ᥇᥏᥊᥈ ᤋᤱᤒᤣ ᤌᤣᤛᤣᤁ᤻ᤖᤠᤣ ᤗᤠ ᥈᥋ ᤏᤠᤶᤗᤧ ᤕᤠᤶᤔᤠ ᤋᤧᤏᤧᤒᤠ ᤕᤧᤴ ᤛᤧᤴᤍᤡᤰ ᥏ : ᥊᥋ ᤕᤧᤶᤗᤧ ᤐᤏᤠᤣ ᤕᤧᤶᤔᤠᤣ ᤏᤧᤐᤠᤗ᤻ ᤗᤠᤈᤣ᤹ᤒᤠ ᤏᤠᤶᤒᤡᤴ ᤐᤡᤛᤠᤱᤒᤠ ᤗᤡᤶᤒᤢᤘᤠᤏ᤻ ᤂᤠᤶᤄᤢ ᤀᤡᤗᤠᤶ ᤌᤢᤶ ᤔᤠᤱᤛᤣᤒᤢᤱ ᤐᤠᤱᤓᤣ᤹ᤗᤢᤱ -᥈, ᤆᤢᤰᤆᤡᤗᤡᤶᤒᤠ ᤗᤌᤡᤰ ᤀᤅᤣᤁ᤻ᤘᤠ ᤛᤠᤘᤠᤏ᤻ ᤐᤠᤣᤅ᤻ ॥
ᤈᤃᤢᤴᤘᤠᤈ ᤏᤢ ᤜᤱᤛᤔᤋᤡᤖᤧ ᤜᤢᤴᤇᤡ᤹ ᤛᤠ᤺ ᤏᤧᤵᤑᤢ᤹ᤀᤠᤱ ᤕᤠᤣᤒᤠ ᤕᤖᤡᤰᤁᤣ ᤀᤅᤣᤁ᤻ᤘᤠᤛᤠ᤺ ᤛᤠᤘᤠᤏ᤻ ᤐᤠᤣᤅ᤻᤻ᤅᤡ ᤔᤧᤔᤠᤛᤡᤱᤒᤠ ᤋᤢᤰᤂᤣᤔᤡᤒᤠ ᤜᤡᤴᤍᤠᤣᤁ᤻ ᤕᤖᤡᤰ ᤘᤕᤠᤒᤠᤸᤗᤧ ᤆᤠᤣᤃᤢᤸᤗᤧ ᤁᤴ ᤕᤧᤶᤔᤠᤱ ᤜᤢᤴᤇᤡ᤹ᤏᤢ ᤕᤖᤡᤰ ᤀᤠᤛᤠ/ᤏᤛᤠᤏ᤻ ᤜᤠᤣᤵᤋᤠ ॥ ᤐᤠᤱᤓᤣ᤹ᤛᤠᤒᤠ ᤗᤠᤶᤒᤠ ᤀᤠᤱ ᤐᤠ-ᤀᤰᤋᤶᤒᤠ ᤐᤠᤏ᤻ ᤋᤃᤡ-ᤋᤃᤡᤒᤠ ᤀᤅᤣᤁ᤻ᤘᤠᤜᤠ᤹ ᤛᤠᤘᤠᤏ᤻ ᤔᤧᤒᤠᤣᤂᤠᤀᤠᤱ ᤗᤧᤵ ᤔᤧᤛᤧ᤺ᤒᤠ ᤁᤢᤛᤡᤱᤗᤰ ᤐᤠᤣᤅ᤻ᤅᤡᤗᤠ᤹ ᤗ᤹ᤖᤡᤰ ᤔᤣᤀᤡᤋᤢᤀᤠᤱ ᤘᤠᤕᤠ ॥
ᤏᤠᤣᤎᤡᤶᤔᤡᤒᤠ ᤜᤡᤴᤈᤠ᤹ᤀᤡᤴ ᤔᤠᤠᤵᤔᤠ ᤀᤡᤍᤡᤁ᤻ᤛᤠᤱ ᤌᤠᤣ-ᤕᤠᤣ ᤔᤧᤒᤠᤣᤂᤠᤶ. ᤔᤧᤜᤠᤒᤠᤴᤏᤠᤱ ᤛᤠᤘᤠᤏ᤻ ᤛᤠᤣᤖᤡᤰ ᤕᤠᤱᤏᤡᤶᤒᤠ ᤏᤠᤣᤎᤡᤶᤒᤠ ᤘᤕᤠ ॥ ᤀᤠᤛᤠ/ᤏᤛᤠᤏ᤻ ᤔᤧᤴᤈᤠᤣᤃᤢᤶᤒᤠ ᤀᤅᤣᤁ᤻ᤘᤠᤀᤡᤴ ᤔᤠᤱᤔᤠ ᤀᤡᤍᤡᤁ᤻ ᤜᤡᤱᤅᤠ ᤏᤢ ᤀᤅᤣᤁ᤻ᤘᤠᤖᤧ ᤐᤏᤠᤣᤎᤡᤶ ᤏᤡᤛᤢᤀᤠᤱ ᤁᤢᤶᤔᤠ ᤜᤱᤛᤔᤋᤡᤖᤧ ᤁᤢᤗᤱᤔᤠᤀᤠᤣ ᤔᤡᤶᤗᤡᤅ᤻ᤛᤡᤱ ᤆᤩᤈᤡ ᤀᤠᤛᤠ᤺ᤀᤡᤴ ᤜᤡᤱᤒᤡ ᤁᤧᤗ᤹ᤒᤠ ᤀᤠᤛᤠ ᤏᤢ ᤏᤛᤠᤏ᤻ ᤐᤠᤣᤖᤠᤀᤠᤱ ᤀᤅᤣᤁ᤻ᤘᤠᤀᤡᤴ ᤁᤢᤶᤔᤠᤖᤧ ᤑᤰᤋᤢᤱᤅᤠᤣ ᤂᤧᤐ᤻ᤛᤢᤀᤠᤱ ᤔᤡᤶᤔᤧᤴᤋᤢ ᤏᤢ ᤀᤠᤈᤢᤏᤡ ᤐᤠᤣᤂᤧᤀᤠᤣ ᤗ᤹ᤖᤡᤰ ᤔᤢ᤹ᤀᤡ ᤐᤡᤖᤢ ॥
ᤀᤅᤣᤁ᤻ᤘᤠ ᤛᤠᤀᤡᤴ ᤀᤠᤰᤂᤧᤴ ᤔᤡᤶ ᤔᤧᤳᤋᤢᤛᤠᤱ ᤁᤢᤶᤔᤠᤖᤧ ᤏᤢᤎᤢᤱᤔᤠ ᤔᤧᤕᤠᤴᤍᤢᤴ ᤌᤩᤠᤱ ᤑᤠ᤹ᤀᤡᤸᤗᤧ ᤜᤱᤛᤔᤋᤡᤖᤧ ᤁᤢᤏᤢᤀᤠᤣ ᤕᤠᤅ᤻ᤄᤣᤁ᤻ ᤗᤴᤍᤠᤀᤠᤱ ᤘᤠᤕ ॥ ᤋᤠᤃᤧᤖᤠ ᤏᤡᤱᤘᤠᤓᤢᤔᤠᤱᤗᤧ ᤁᤢᤈᤠᤣᤁ᤻ ᤕᤠ ᤀᤅᤣᤁ᤻ᤗᤧ ᤂᤠᤣᤗᤰᤐᤡ ॥ ᤜᤱᤛᤔᤋᤡ ᤌᤡᤶᤎᤠᤶ ᤛᤠᤍᤠᤶ ᤐᤠᤣᤂᤠᤀᤠᤱᤎᤠᤣᤛᤠ ᤛᤠ᤺. ᤌᤡ᤺ ᤆᤠᤔᤠ ᤌᤢᤱᤔᤠ ᤔᤧᤴᤏᤢ᤹ᤏᤠ ᤐᤠᤣᤂᤠᤀᤠᤱ ᤘᤠᤕᤠ ॥ ᤜᤧᤴ ᤕᤧᤶᤔᤠᤣ ᤁᤢᤈᤠᤁᤧᤏᤢᤒᤠ ᤆᤠᤖᤧ ᤏᤠᤘᤠᤀᤠᤣ ᤌᤰᤛᤠᤖᤧ ᤛᤠ᤺ ᤏᤢ ᤌᤢᤱᤏᤠᤒᤠᤖᤧ ᤏᤠᤘᤠᤀᤠᤣ ᤌᤡ᤺ ᤏᤢ ᤗᤠᤰᤛᤡ᤺ ᤖᤧ ᤁᤢᤗᤧᤰᤘᤠᤀᤠᤣ ᤌᤣᤀᤠᤱ ᤀᤡᤸᤗᤡᤶ ᤜᤠᤣᤐ᤻ᤋᤠ ॥
ᤀᤅᤣᤁ᤻ᤘᤠᤀᤡᤴ ᤌᤡᤰ-ᤏᤡ ᤕᤧᤴ ᤋᤃᤡ ᤒᤠ᤺ᤜᤢᤴᤇᤡ ᤜᤡᤶᤔᤠᤣ ᤁᤧᤎᤠᤵᤔᤠ ᤔᤧᤴᤍᤠᤰᤔᤠᤖᤧ ᤁᤢᤏᤢ ᤔᤧᤎᤢᤱᤄᤢᤀᤠᤱ ᤔᤧᤜᤡᤱᤄᤢ ॥ ᤀᤅᤣᤁ᤻ᤘᤠᤀᤡᤴ ᤏᤢᤎᤢᤱᤔᤠᤀᤠᤣ ᤆᤡᤜᤠᤵ ᤔᤧᤒᤠᤣᤅ᤻ᤏᤧᤸᤗ ᤑᤠ᤹ᤀᤠᤱ ᤋᤠᤃᤧᤖᤠ ᤏᤡᤱᤘᤠᤓᤢᤔᤠᤱᤗᤧᤀᤣ ᤁᤠᤶᤛᤢᤒᤠ ᤁᤢᤛᤡᤱ ᤘᤠᤏᤠᤶ ᤋᤱᤅᤠᤀᤠᤱ ᤘᤠᤕᤠ ॥ ᤔᤧᤴᤍᤠᤰ ᤏᤢ᤺ ᤌᤢᤱᤅᤢᤀᤠᤱ ᤏᤧᤳ ᤛᤢᤶ ᤕᤧᤴ ᤜᤡᤅᤠᤀᤠᤱᤃ ᤀᤠᤸᤗ ᤜᤡᤴᤈᤠ᤹ᤀᤡᤴ ᤜᤡᤱ ᤁᤧᤖ᤹ᤒᤠ ᤆᤡᤈᤣᤵ ᤔᤧᤈᤠᤣᤃᤢ ᤁᤧᤖᤧᤰ ᤐᤠᤱᤓᤣ᤹ᤛᤠᤒᤠᤜᤠ᤹ᤖᤧ ॥
ᤁᤡᤖᤠᤋ᤻ ᤕᤠᤰᤌᤢᤱ ᤛᤢᤘᤠᤱᤅᤠᤣ ᤕᤠᤱᤍᤠᤱ ᤑᤠᤣᤅ᤻ᤔᤠ ᤂᤠᤈᤠᤣᤅ᤻ ᤘᤠ ॥ ᤁᤴ ᤂᤠᤈᤠᤣᤅ᤻ᤅᤠᤣ ᤕᤠᤶᤒᤡᤇᤠ᤹ᤀᤡᤴ ᥊ ᤕᤧ ᤏᤢ ᤔᤧᤴᤇᤢᤔᤠᤀᤡᤴ ᥉ ᤕᤧᤴᤏᤠᤣ ᤋᤢᤶᤓᤠᤰᤛᤠ, ᤋᤢᤶᤓᤠᤰᤔᤠᤖᤧ ᤕᤠᤱᤍᤠᤱ ᤔᤣᤓᤠᤣᤂᤢ᤹ ॥ ᤋᤃᤡᤒᤠ ᤀᤡᤸᤗᤡᤶ ᤀᤡᤛᤡᤰ ᤕᤠᤱᤍᤠᤱ ᤑᤠᤣᤅ᤻ᤔᤠᤸᤗᤧ ᤀᤅᤣᤁ᤻ᤘᤠᤀᤡᤴ ᤕᤠᤱᤍᤠᤱᤅᤠᤣ ᤔᤧᤕᤠᤰᤋᤢ᤹ ॥ ᤔᤧᤘᤠᤃᤧᤴ ᤏᤠᤶᤒᤡᤴ ᤔᤧᤶᤒᤠᤣᤅᤅᤣ ᤂᤣᤛᤣᤒᤠ ᤗᤠᤒᤠᤜᤠ᤹ ᤑᤡᤖᤡᤱᤗᤡᤱᤏᤠ ᤔᤧᤒᤸᤗ, ᤗᤠᤁᤠᤳ ᤔᤧᤗᤳᤋᤢ᤹ ᤜᤧᤰᤕᤩᤠᤱ ᤀᤠᤒᤠᤱᤅᤣ ᤌᤠᤁ᤻ᤜᤠ᤹ᤖᤧ ᤔᤡᤱᤗᤠᤣᤅ᤻ᤅᤡ ᤐᤠ᤺ ᤏᤢ ᤔᤠ᤺ᤖᤧ ᤔᤡᤱᤅᤡᤴ ᤔᤧᤒᤠᤳᤋᤢᤀᤠᤱ ᤂᤢᤏᤧ ᤁᤢᤛᤠ᤺ᤖᤧ ᤏᤠᤘᤠᤀᤠᤣ ᤛᤠᤘᤠᤏ᤻ ᤁᤧᤒᤠᤣᤂᤠᤀᤱ ᤁᤧᤘᤠ ᤀᤠᤸᤗ ᤏᤠᤶᤗᤧ ᤁᤧᤏᤡᤛᤠ. ᤗᤠᤒᤠᤖᤧ ᤁᤧᤏᤡᤛᤠ. ᤂᤣᤛᤣᤒᤠᤜᤠ᤹ᤖᤧ ᤁᤧᤏᤡᤛᤠ. ᤁᤢᤍᤡᤶ ᤀᤠᤕᤢ/ᤜᤡᤱᤒᤠ ᤐᤠᤣᤂᤧ ॥ ᤗ᤹ᤖᤡᤰ ᤔᤢ᤹ᤀᤡ ᤐᤡ᤹ᤀᤡ ᤕᤠᤱᤍᤠᤱ ᤑᤠᤣᤅ᤻ᤔᤠ ᤀᤡᤸᤗᤡᤶ ᤘᤠ ॥
ᤜᤡᤱᤜᤡᤱᤒᤠ ᤐᤠᤣᤂᤧ ᤗ᤹ᤖᤡᤰ ᤔᤢᤀᤡ ᤔᤧᤒᤡᤖᤢᤖ ᤐᤠᤱᤓᤣ᤹ᤛ᤻ᤔᤠ ᤋᤢᤶᤓᤠᤰᤔᤠᤖᤧ ᤀᤅᤣᤁ᤻ᤘᤠᤀᤡᤴ ᤑᤗᤠᤶᤛᤡᤱ ᤔᤡᤱᤔᤣᤘᤠᤏ᤻ᤍᤢ ॥ ᤑ- ᤑᤠ᤹ᤀᤡᤸᤗᤧ ᤑ᤺ᤁᤧᤖᤒᤠ ᤏᤡᤛ᤻ᤛᤣᤒᤠ, ᤗᤠᤶ- ᤑᤠ᤹ᤀᤡᤸᤗᤧ ᤔᤠᤖᤠᤶ, ᤛᤡᤱ- ᤑᤠ᤹ᤀᤡᤸᤗᤧ ᤏᤠᤶᤛᤡᤱ ᤗᤠᤛᤡᤱ ᤁᤢᤛᤡᤱᤒᤠ ᤛᤡ᤺ᤱ ᤕᤠ ᤏᤡᤛ᤻ᤛᤣᤖᤧ ᤔᤠᤖᤠᤶ ᤗᤠᤶᤗᤠᤣᤒᤠ ᤗ᤹ᤖᤡᤰ ᤔᤡᤱᤔᤣᤘᤠᤏ᤻ᤍᤢ ॥ ᤋᤠᤏ᤻ᤍᤡ ᤐᤣᤀᤠᤱ ᤐᤠᤜᤧᤴ ᤑᤗᤠᤶᤛᤡᤱᤅᤡᤴ ᤋᤢᤳᤋᤢ ᤋᤢᤶᤔᤩᤠᤜᤠᤱᤗᤧ ᤏᤡᤛ᤻ᤛᤣᤜᤠᤱᤔᤠ ᤔᤡᤱᤔᤧᤘᤠᤏ᤻ᤍᤢ ॥ ᤛᤧᤰᤂᤠᤀᤣ ᤑᤗᤠᤶᤛᤡᤱᤖᤧ ᤕᤠᤔ᤻ᤒᤰ ᤂᤠᤈᤠᤣᤅ᤻ᤜᤠ᤹ ᤐᤠᤜᤧᤰᤁᤣᤍᤱᤒᤠ ᤐᤠᤣᤂᤠᤖᤐᤣ ॥
ᤑᤗᤠᤶᤛᤡᤱᤖᤧ ᤛᤠᤘᤠᤏ᤻ ᤐᤠᤋᤢᤖᤠᤣ ᤔᤧᤈᤠᤣᤃᤢ ॥ ᤜᤡᤴᤈᤠ᤹ᤀᤡᤴ ᤜᤠᤱᤕᤢᤰᤛᤠᤶᤒᤠ ᤐᤠᤣᤅ᤻ ᤁᤧᤖ᤹ᤒᤠ ᤐᤠᤋᤢᤀᤠᤱ ᤘᤕᤠ ᤂᤠᤀᤡᤰ ᤛᤠᤶᤒᤠᤖᤧ ॥ ᤕᤠᤱᤛᤠ᤹ᤒᤠ ᤜᤡᤶᤛᤕᤅ᤻ᤅᤠᤣ ᤛᤠᤘᤠᤏ᤻ ᤁᤧᤒᤠᤣᤅ᤻ᤒᤠ ᤑᤗᤠᤶᤛᤡᤱ ᤆᤠᤈᤛᤠᤱ, ᤛᤧᤸᤗᤠᤁ᤻ ᤘᤠᤔᤡ ᤘᤠᤛᤠᤱ ᤕᤁ᤻ ᤔᤧᤶᤒᤠᤐ᤻ᤏᤠ ॥ ᤏᤠᤣᤎᤡᤶ ᤕᤠᤱᤏᤡᤶᤒᤠ. ᤛᤡᤱᤛᤡᤱᤒᤠ ᤗᤢᤶᤗᤢᤶᤒᤠ ᤜᤡᤴᤈᤠ᤹ ᤑᤗᤠᤶᤛᤢᤱᤖᤧ ᤐᤠᤏᤠᤣ ᤋᤠᤕᤧᤶᤖᤧ ᤀᤡᤒᤢ ᤐᤡᤖᤢ᤹ ॥ ᤁᤖ ᤜᤧᤴᤕᤧᤶᤒᤠ ᤋᤢᤰᤂᤣ ᤏᤢ ᤛᤠᤰᤗᤧ ᤈᤡᤷᤃᤠᤱ ᤘᤕᤠ ᤜᤡᤴᤇᤡ᤹ ᤜᤡᤶᤛᤕᤅ᤻ ॥
ᤏᤠᤶᤀᤧᤳᤇᤠ᤹ ᤗᤠᤀᤧᤳᤇᤠ ᤐᤠᤣᤂᤠᤣ ᤑᤗᤠᤶᤛᤡᤱ ᤛᤠᤘᤠ᤻ᤏᤢᤛᤠᤣᤖᤡᤰ ᤁᤢᤶᤔᤠᤖᤧ ᤁᤢᤏᤢᤀᤠᤱ ᤌᤢᤱᤔᤠ ᤔᤣᤄᤠᤣᤛᤢᤴ ॥ ᤛᤢᤶ ᤋᤱᤒᤣ ᤁᤧᤖᤠᤸᤗᤧ ᤁᤢᤶᤔᤠ ᤜᤱᤛᤔᤋᤡ ᤔᤠᤛᤡᤱ ᤜᤧᤴᤁᤩᤠᤱ ᤁᤢᤶᤔᤠᤖᤧ ᤔᤡᤶᤔᤠᤱ ᤔᤧᤱᤄᤠᤣᤔ᤻ᤏᤠ ᤐᤠᤣᤂᤠ ॥ ᤕᤖᤡᤰ ᤋᤱᤒᤣ ᤁᤢᤶᤒᤠᤖᤠᤱ ᤘᤣ᤹ ᤔᤣᤂᤡᤶ ᤔᤣᤈᤠᤣᤃᤢᤴ ᤐᤠᤠ᤺ ᤔᤠ᤺ ᤏᤧᤵᤔᤠᤱᤗᤧ ᤔᤡᤶ ᤁᤢᤶᤒᤠᤗᤠᤶᤒᤠᤀᤣ ᤂᤠᤣᤛᤢᤖ ᤘᤕᤧ ॥
ᤜᤡᤴᤍᤠᤣᤁ᤻ᤗᤣ ᤗᤠᤎᤠ᤹ ᤋᤃᤡᤑᤠᤣᤔᤠ ᤐᤈᤠ᤹ ᤆᤠ᤹ᤖᤧᤒᤠᤸᤗᤧ ᤐᤠᤱᤓᤣᤛᤠᤒᤠᤖᤧᤀᤠᤱ ᤛᤢᤈᤠᤀᤠᤣ ᤈᤃᤴᤘᤠᤈᤖᤧ ᤏᤡᤛᤡᤃᤣᤁ᤻ᤐᤠ ᤔᤣᤂᤡᤶ ᤈᤠᤣᤃᤢ ॥ ᤜᤣᤁᤩᤠᤱ ᤕᤠᤶᤔᤠᤣ ᤜᤡᤶᤛᤕᤅ᤻ ᤁᤢᤍᤡᤶᤒᤠ ᤐᤠᤣᤂᤠ ॥ ᤁᤖᤛᤠᤱ ᤐᤠᤱᤓᤣ᤹ ᤌᤠᤱᤒᤣ᤹ᤒᤠ ᤋᤢᤰᤂᤣᤜᤠ᤹ᤃ ᤁᤢᤀᤡᤛᤡᤰ ॥
ᤀᤠᤸᤗᤠᤣᤀᤠᤱ ᤆᤢᤰᤆᤡᤏᤠᤶᤒᤠ ᤗᤌᤡᤰ ᤕᤶᤒᤠ ᤏᤠᤶᤛᤡᤱᤌᤡᤰ ᤕᤢᤱ ॥ ᤏᤠᤶᤛᤡᤱᤗᤣ ᤆᤡᤈᤣᤵ ᥋᥆ ᤔᤡᤋᤖ᤻ ᤕᤠᤣ ᤆᤢᤰᤛᤠ ᤀᤡᤰᤋᤠᤵ ᤏᤧ ॥ ᤀᤡᤰᤋᤠᤵᤀᤠᤣ ᤋᤃᤡᤒᤠ ᤁᤧᤕᤔ᤻ᤒᤠ᤹ ᤜᤡᤶᤕᤠᤣᤁ᤻ ᤏᤧ ॥ ᤒᤠᤁᤴ ᤋᤧᤴᤏᤠᤣ ᤏᤡᤛ᤻ᤛᤣᤜᤠᤱᤔᤠ ᤑᤗᤠᤶᤛᤡᤱ ᤛᤠᤘᤠᤏ᤻ ᤐᤠᤣᤂᤠᤒᤠ ᤐᤪᤔᤠᤱᤃᤡ ᤘᤠ ॥ ᤏᤡᤛ᤻ᤛᤣᤜᤠᤱᤔᤠᤖᤧ ᤆᤠᤣᤃᤢᤒᤠ ᤕᤠᤔ᤻ᤒᤰ ᤏᤢ ᤐᤠᤋᤢᤒᤠ ᤐᤠᤏ᤻ᤜᤠ᤹ ᤛᤛᤡ ᤔᤢᤴᤎᤢᤶᤖᤧ ᤏᤠᤘᤠᤀᤠᤣ ᤛᤡᤔᤡᤁ᤻ᤗᤢᤱ ᤁᤢᤍᤡᤶ ᤔᤧᤴᤍᤱᤍᤱ ᤌᤠᤣᤎᤠᤣ ᤐᤠᤣᤖ ᤀᤡᤱᤛᤣ ᤐᤠᤣᤅ᤻ᤗ ᤘᤠ ॥ ᤁᤡᤖᤠᤋ᤻ ᤛᤠᤶᤕᤠᤣ ᤛᤛᤡ ᤔᤢᤴᤎᤢᤶᤖᤧ ᤕᤠᤶᤔᤠᤣ ᤌᤠᤣᤒᤠᤣ ᤛᤠᤒᤠᤖᤧ ᤏᤠᤘᤠᤀᤠᤣ ᤛᤡᤁ᤻ᤔᤧᤴᤇᤢᤰ ᤏᤠᤈᤶ ᤘᤠ ॥ ᤁᤖ ᤀᤠᤸᤛᤠᤱ ᤏᤡᤛ᤻ᤛᤣᤜᤠᤱᤔᤠ ᤑᤗᤠᤶᤛᤡᤱ ᤛᤠᤘᤠᤏ᤻ ᤐᤠᤣᤂᤠᤒᤠ ᤋᤧᤴᤏᤡᤴ ᤁᤢᤀᤡᤛᤡᤰ ᤏᤧ ॥
