ᤔᤠᤱᤛᤣᤒᤢᤱ/ᤁᤁ᤻ᤑᤧᤰᤘᤠ ᤋᤱᤏᤠᤶ ᤏᤡᤛ᤻ᤛᤣᤜᤠᤱᤔᤠ ᤛᤏᤠᤖᤢᤱ ᤏᤠᤶᤎᤢᤱ ᤗᤠᤎᤢᤱᤛᤣᤔᤡ ᤛᤣᤘᤠ ᤜᤕᤅ᤻ᤁᤡᤸᤗᤡᤱ ᤛᤡᤛᤣᤁ᤻ᤗᤠ ᥈᥎ ᤏᤠᤶᤀᤠᤱᤎᤠᤣ ᤁᤁ᤻ᤑᤧᤰᤘᤠ ᥇ ᤏᤠᤶ ᤌᤠᤖᤡᤰ ᤐᤠᤣᤅ᤻ᤒᤠ ॥ ᤍᤣᤀᤢᤔᤠᤀᤡ ᥏, ᤕᤰᤗᤰᤐᤠ ᤏᤡᤛ᤻ᤛᤣᤜᤠᤱᤔᤠᤖᤧ ᤏᤡᤛᤠᤶ ᤛᤠᤱᤗᤋᤧᤴ ᤂᤋᤪᤰᤐᤠ ᤏᤢ ᤔᤠᤱᤛᤣᤒᤢᤱ ᥉, ᤕᤰᤗᤰᤐᤠ ᤛᤠᤶᤕᤠᤣ ᤌᤠᤁᤢ ᤛᤣᤀᤡᤱ ᤏᤡᤛᤠᤶ ᤛᤠᤱᤗᤋᤧᤴ ᤑᤢ᤹ᤗᤢᤱᤃᤡᤀᤠᤣ ᤛᤠᤣ-ᤛᤠᤣᤖᤡᤰ ᤐᤠᤣᤅ᤻ᤒᤠ ᤐᤠᤣᤂᤠᤀᤠᤱ ᤘᤠ ॥
ᤕᤠᤱᤏᤡᤶᤒᤠ ᤁᤢᤃᤠᤣ ᤀᤡᤛᤡᤰ ᤜᤡᤱᤔᤴ ᤀᤡᤈᤠᤁ᤻ ᤁᤣᤈᤠᤣᤁ᤻ᤐᤠ ᤕᤠᤱᤏᤡᤶᤌᤡᤶᤒᤠ ᤁᤡᤖᤠᤋ᤻ᤖᤧ ᤀᤡᤏᤠᤜᤢᤖᤡ ᤕᤧᤶᤔᤠᤱᤎᤠᤣ ᤁᤴ ᤁᤁ᤻ᤑᤧᤰᤘᤠ ᤋᤱᤏᤠᤶᤔᤡᤴ ᤔᤢᤒᤣᤁ᤻ᤘᤠ ᤏᤢ ᤂᤡᤒᤣᤁ᤻ᤘᤠ ᤕᤧᤶᤗᤧ ᤁᤢᤛᤧᤶᤔᤠ ᤘᤏᤠᤶᤔᤡᤴ ᤐᤕᤶ ᤋᤱᤏᤠᤶᤖᤧ ᤏᤠᤘᤠᤀᤠᤣ ᤋᤠᤣᤔᤠ ᤀᤡᤸᤗᤡᤶ ᤘᤠ ॥ ᤋᤱᤏᤠᤶ ᤋᤡᤶᤒᤣ ᤋᤱᤏᤠᤶᤒᤠᤖᤣ ᤀᤡᤛᤡᤰ ᤁᤴ ᤋᤧᤴᤜᤠ᤹ᤀᤠᤣ ᤐᤕᤶ ᤕᤶᤒᤠ ᤗᤠᤎᤢᤱᤛᤣᤔᤡ ᤏᤢ ᤜᤕᤅ᤻ ᤁᤡᤸᤗᤡᤱ ᤀᤡᤈᤠᤁ᤻ ᤐᤠᤣᤅ᤻ᤒᤠ ᤘᤠ ॥ ᤁᤴ ᤋᤧᤴᤀᤠᤣ ᤕᤰᤋᤱᤒᤠ ᤔᤁ᤻ᤖ ᤘᤠᤖᤢᤶᤛᤡᤱᤔᤠ ᤐᤏᤠᤣ ᤕᤧᤶᤖᤧ ᤏᤠᤘᤠᤀᤠᤣ ᤀᤠᤱ ᤀᤡᤈᤠᤁ᤻ ᤔᤧᤈᤠᤣᤃᤢ᤹ ॥
ᤏᤡᤛ᤻ᤛᤣᤜᤠᤱᤔᤠ. ᤗᤠᤈᤣ᤹ᤔᤡᤱᤛᤠᤣ ᤔᤧᤶᤔᤠ ᤀᤱᤛᤡᤔᤠᤱ ᤔᤜᤠᤃᤢᤖᤢ ᤑᤸᤃᤢᤏᤴᤍᤖᤧ ᤏᤡᤛᤠᤶ ᤛᤠᤱᤗ ᤆᤠᤣᤃᤢᤒᤠ ᤋᤧᤴ ᤂᤋᤪᤰᤐᤠᤀᤠᤣᤏᤢ ᤁᤢᤜᤣᤁ᤻ᤛᤡᤱ ᤐᤠᤣᤂᤠᤱᤘᤠ ॥ ᤁᤁ᤻ᤑᤧᤰᤘᤠ ᤋᤱᤏᤠᤶ ᤛᤡᤔᤡᤁ᤻ᤗᤢᤱᤒᤠ ᤕᤖᤡᤰ ᤋᤧᤴᤀᤠᤣ ᤕᤰᤖᤡᤰ ᤛᤢᤘᤠᤱᤒᤠ ᤕᤠᤵᤔᤡᤖᤧ ᤐᤖᤡᤰ ᤐᤖᤡᤰᤗᤧ ᤔᤧᤍᤠᤣᤛᤢᤛᤠᤱ ᤁᤴ ᤏᤡᤛ᤻ᤛᤣᤜᤠᤱᤔᤠ ᤛᤏᤠᤖᤢᤱ ᤕᤜᤅ᤻ᤁᤡᤸᤗᤡᤱᤖᤣ ᤛᤠᤵᤔᤢᤴᤎᤢᤶ ᤘᤣ᤹ ᤐᤖᤡᤰᤐᤠ ᤘᤠ ॥ ᤏᤢ ᤔᤧᤴᤈᤠᤖᤡᤒᤠ ᤐᤕᤶ ᤜᤕᤅ᤻ ᤁᤡᤸᤗᤡᤱᤖᤧ ᤏᤠᤘᤠᤀᤠᤣᤀᤠᤱ ᤕᤢᤰᤛᤡᤱ ᤁᤧᤒᤠᤣᤅ᤻ᤒᤠ ᤁᤴ ᤌᤡᤰᤛᤡᤃᤣᤁ᤻ᤐᤠᤖᤠᤣ ॥
ᤏᤡᤛ᤻ᤛᤣᤜᤠᤱᤔᤠᤖᤧ ᤀᤠᤸᤗᤠᤣᤒᤠ ᤍᤣᤀᤢᤔᤠᤀᤡ ᥏ ᤂᤠ. ᤕᤰᤗᤠᤰᤁᤠᤣ ᤒᤡᤁᤪᤶ ᤋᤱᤒᤣ ᥇᥏᥋᥆ ᤗᤧ ᤜᤠᤱᤛᤠᤶ ᤕᤢᤔᤠ ᤏᤢ ᤜᤠᤱᤛᤠᤶ ᤌᤣᤒᤠ᤹ ᤗᤠᤶᤒᤠ ᤌᤡᤰᤛᤡᤣᤁ᤻ᤐᤠ ᤋᤢᤶᤍᤱ ᤐᤠᤣᤅ᤻ᤅᤡ ᤛᤠᤶᤈᤡᤰ ᤔᤢᤴᤎᤢᤶ. ᤛᤛᤡ ᤔᤢᤴᤎᤢᤶ. ᤛᤡᤔᤡᤁ᤻ᤗᤢᤱ ᤛᤏᤠᤖᤢᤱ ᤏᤢ ᤔᤧᤴᤇᤠᤶᤛᤠ ᤌᤡᤰᤜᤢᤵ ᤆᤠᤣᤁ᤻ᤔᤠᤛᤡᤡ ᤀᤱᤛᤡ ᤆᤠᤣᤳᤗᤢᤱᤖᤧ ᤔᤠᤗᤠᤶ ᤂᤠᤣᤛᤢᤒᤠ ᤐᤠᤏᤠᤣᤒᤠ ᤛᤢᤕᤧᤶ ᤐᤠᤣᤂᤠᤀᤠᤱᤒᤠᤣ ᤁᤢᤒᤣ ᤕᤢᤱᤛᤡᤱᤒᤠ ॥ ᤏᤡᤛ᤻ᤛᤣᤜᤠᤱᤔᤠᤖᤧ ᤋᤠᤏ᤻ᤍᤡ ᤛᤱᤈᤢᤶ ᤌᤠᤣᤒᤠᤣᤖᤧ ᤕᤠᤔ᤻ᤒᤰ ᤆᤠᤣᤁ᤻ᤁᤡ ᤀᤠᤳᤋᤠᤏ᤻ ᤘᤕᤠᤛᤠᤱ ᤁᤰᤑᤧᤴᤁᤠ ᤌᤡᤰᤏᤠᤶᤀᤠᤣ ᤒᤠᤁᤴ ᤋᤧᤴᤀᤠᤣ ᤋᤩᤠᤀᤠᤱ ᤔᤠᤱᤛᤣᤘᤠ ᤆᤠᤣᤃᤢᤖ ᤘᤕᤠᤒᤠ ᤕᤖᤡᤰᤁᤣ ᤛᤠᤵᤔᤢᤴᤎᤢᤶᤜᤠ᤹ ᤂᤠᤣᤍᤧᤳᤗᤠᤣ ॥
ᤀᤠᤸᤗᤠᤣᤒᤠ ᤁᤡᤖᤠᤋ᤻ ᤛᤠᤶᤕᤠᤣᤌᤠᤁᤢ ᤔᤢᤜᤡᤅ᤻ᤃᤢᤶ ᤀᤱᤛᤡᤔᤠᤱ ᤗᤡᤱᤍᤧᤴ ᤀᤠᤳᤔᤠᤏᤴᤍᤖᤧᤀᤠᤱ ᤒᤡᤁᤪᤶ ᤋᤱᤒᤣ ᥈᥆᥈᥍ ᤋᤱᤒᤣᤖᤧ ᤀᤠᤸᤗᤠᤣᤒᤠ ᤔᤠᤱᤛᤣᤒᤢᤱ ᥉, ᤑᤢ᤹ᤗᤢᤱᤃᤡ ᤀᤠᤣ ᤛᤠᤶᤕᤢᤰ ᤆᤠᤣᤁ᤻ᤁᤡ ᤏᤡᤛᤠᤶ ᤛᤠᤱᤗᤠᤆᤠᤣᤃᤢᤀᤱ ᤘᤕᤠ ॥ ᤋᤱᤒᤣᤌᤵᤔᤠ ᤔᤠᤱᤛᤣᤘᤠ ᤏᤢ ᤋᤱᤏᤠᤶ ᤋᤠᤣᤔᤠᤖᤧ ᤏᤠᤘᤠᤀᤠᤣ ᤘᤕᤠ ॥ ᤜᤕᤅ᤻ ᤁᤡᤸᤗᤡᤱᤖᤧ ᤏᤠᤘᤠᤣ ᤒᤡᤁᤪᤶ ᤋᤱᤒᤣ ᥈᥆᥍᥌ ᤀᤠᤱᤎᤠᤣ ᤔᤧᤴᤍᤱᤍᤱ ᤐᤕᤶ ᤕᤶᤒᤠᤖᤧ ᤏᤠᤘᤠᤀᤠᤣ ᤌᤡᤶᤒᤣ ᤆᤠᤣᤁ᤻ᤁᤡ ᤋᤠᤣᤔᤠ ᤀᤡᤸᤗᤡᤶ ᤕᤢᤱᤛᤡᤱᤅᤠᤱ ᤘᤠ ॥
ᤁᤢᤜᤣᤁ᤻ᤛᤡᤱ ᤕᤧᤶᤔᤠᤱᤎᤠᤣ ᤗᤠᤸᤗᤌᤠᤖᤡᤰ ᤆᤰᤔᤧᤶᤒᤢᤒᤠ ᤂᤋᤪᤰᤐᤠ ᤏᤢ ᤑᤢ᤹ᤗᤢᤱᤃᤡ ᥇ ᤗᤠᤱᤅᤧᤴ ᥇ ᤁᤡᤵᤐᤠᤱ ᤕᤧᤳ ᤛᤣᤔᤡ ᤜᤠᤔ᤻ᤔᤠ ᤀᤡᤸᤗᤡᤶ ᤘᤠ ॥ ᤀᤢᤏᤠᤜᤢᤖᤡᤀᤠᤱ ᤁ᤹ᤏᤠ ᤁᤁ᤻ᤑᤧᤰᤘᤠ ᤋᤱᤏᤠᤶᤔᤡᤴ ᤘᤏᤠᤶ ᤗᤧᤰᤛᤡᤱᤒᤠ ᤏᤢ ᤐᤖᤡᤰ ᤐᤖᤡᤰᤐᤠ ᤂᤣᤜᤠ᤹ ᤆᤠᤔᤠ ᤋᤱᤏᤠᤶᤖᤧ ᤏᤠᤘᤠᤀᤠᤣ ᤋᤠᤣᤔᤠ ᤀᤡᤸᤗᤡᤶ ᤘᤠᤖᤠᤣ ॥
