ᤀᤡᤔᤠᤏ᤻ᤛᤡᤱ ᤆᤧᤔ᤻ᤈᤠᤣᤱ ᤀᤡᤋᤢᤶ; ᤁᤢᤛᤡᤱ ᤏᤡᤋ᤻ᤋᤢᤶ

ᤁᤢᤛᤱ ᤏᤠᤈᤡᤖᤡ  ᤋᤱᤒᤣ ᥇ ᤈᤏᤘᤖᤡ ᥈᥆᥈᥊ ᤁᤡᤖᤠᤋ᤻ ᤐᤠᤏ᤻ᤍᤠᤱ ᤏᤢ ᤛᤠᤰᤌᤡᤶᤛᤠᤶᤒᤠ ᤀᤡᤔᤠᤏ᤻ᤛᤡᤱᤜ ᤆᤧᤔ᤻ᤈᤠᤣᤱᤗᤧᤴ ᥇᥈᥇ᤛᤡᤃᤣᤁ᤻ᤐᤠ ᤛᤠᤘᤠᤏ᤻ ᤋᤱᤏᤠᤶ ᤕᤁ᤻ᤘᤠᤍᤱ ᤌᤡᤶᤒᤣᤏᤢᤛᤠᤣᤖᤡ ᤔᤧᤴᤍᤱᤍᤱ ᤋᤠᤣᤛᤡᤱ ᤐᤠᤣᤁ᤻ᤂᤧᤀᤠᤱ ᤘᤠ ॥ ᤂᤢᤏᤧ᤹ ᤀᤠᤀᤡᤴᤏᤢ ᥇᥈᥆ ᤋᤱᤒᤣ ᤋᤃᤡ ᤋᤣᤔᤧᤴ ᤗᤠᤈᤣ᤹ ᤁᤠᤗᤡᤶᤐᤠᤣᤅ᤻ᤒᤠ ᤖᤡᤴᤁᤧᤒᤢᤱ ᤍᤠᤣᤅ᤻ᤃᤠᤪ ᤕᤢᤰᤐᤢᤱᤅᤠᤣ ᤕᤧᤔᤧᤗᤡᤱ ᤔᤣᤄ᤻ᤒᤖ᤻ᤛᤡᤱ ᤆᤧᤔ᤻ᤈᤠᤣᤱ ᤏᤢ ᤍᤠᤘᤠᤐᤢᤜᤠᤱᤔᤠ ᤆᤧᤔ᤻ᤈᤠᤣᤱᤗᤧᤴ ᤑᤰᤋᤢᤱᤗᤠᤶ ᤋᤢᤰᤛᤡᤃᤣᤁ᤻ᤐᤠ ᤔᤢ᤹ᤀᤡᤍᤠᤱᤗᤧ ᤏᤠᤘᤠᤀᤠᤣ ᤏᤠᤈᤡᤖᤡ ᤋᤱᤒᤣ ᥇. ᤈᤏᤘᤖᤡ ᥇᥏᥆᥊ ᤋᤱᤃᤵᤗᤧ ᤛᤠᤘᤠᤏ᤻ᤍᤧᤀᤠᤱ ᤘᤕᤧ ॥

ᤆᤧᤔ᤻ᤈᤠᤣᤱᤜᤠᤱᤅᤡᤴ ᤀᤠᤒᤠᤱᤅᤣ ᤐᤠᤱᤓᤣ᤹ᤒᤠ ᤏᤡᤛᤠᤶᤜᤡᤶᤗᤠᤶᤒᤠ ᤔᤧᤋᤪᤡᤁᤢᤗᤣᤛᤴ (ᤀᤠᤸᤗᤠᤣᤒᤠ ᤀᤧᤛ᤻.ᤀᤡ.ᤀᤡ.) ᤗᤛᤢᤀᤠᤱ ᤆᤔ᤻ ᤏᤡᤛᤠᤶ ᤙᤰᤏᤡᤔ᤻ ᤆᤠᤣᤁ᤻ᤛᤧ ᤁᤸᤁᤳᤋᤠ ᤐᤣ ॥ ᤂᤧ᤹ᤀᤠᤣᤗᤠᤶᤒᤠ ᤀᤠᤀᤡ. ᤀᤣ. ᤗᤛᤢᤀᤠᤱ ᤜᤠᤱᤗᤢᤱ /ᤒᤡ. ᤀᤣ. ᤏᤡᤖᤢᤖ ᤕᤠᤃᤧᤸᤗᤧ ᤁᤢᤶᤒᤠ ᤔᤣᤄ᤻ᤒᤖ᤻ᤛᤡᤱ ᤔᤠᤱᤛᤡᤱᤅᤠᤱ ᤐᤠᤱᤅᤣ ᤜᤡᤶ ᤏᤢᤁ᤻ᤂᤧᤀᤠᤱ ᤘᤕᤧ ॥ ᤐᤠᤱᤓᤣ᤹ ᤏᤢᤁ᤻ᤂᤧᤀᤠᤱ ᤍᤠᤷᤈᤡ᤹ᤗᤡᤱ. ᤛᤢᤰᤂᤡᤶ  ᤗᤠᤈᤣ᤹ᤀᤠᤣ ᤛᤡᤰᤛᤠᤶᤒᤠ ᤕᤠᤔ᤻ᤒᤰ ᤆᤠᤣᤃᤧ ॥ ᤀᤰᤁᤣᤖᤡᤰ ᤛᤡᤰᤛᤠᤶᤒᤠ ᤆᤠᤣᤃᤧᤖ ᤕᤠᤃᤧᤒᤠ ᤕᤧᤶᤔᤠᤣ ᤀᤠᤒᤠᤱᤅᤣ ᤏᤧᤳᤋᤡᤁᤠᤵᤔᤠᤖᤧ ᤏᤠᤘᤠᤀᤠᤣ ᤀᤔᤡᤖᤴ ᤆᤧᤔ᤻ᤈᤠᤣᤱᤏᤢ ᤋᤧᤴᤎᤠᤶ ᤔᤣᤁ᤻ᤂᤡᤶ ᤔᤧᤳᤇᤡᤱ ॥

ᤆᤧᤔ᤻ᤈᤠᤣᤱᤜᤠᤱᤅᤡᤴ ᤀᤠᤒᤠᤱᤅᤣ ᤛᤢᤘᤠᤱᤃᤧᤴ ᤁᤡᤖᤠᤋ᤻ ᤜᤠᤰᤏᤠᤔ᤻ᤒᤠ ᤌᤡᤱᤃᤠ ᤐᤠᤏ᤻ᤍᤠᤱ. ᤛᤠᤵᤔᤢᤴᤎᤢᤶ. ᤛᤠᤰᤌᤡᤶ ᤜᤧᤰᤋᤶᤒᤠ ᤜᤠᤰᤏᤠᤔ᤻ᤒᤠ ᤌᤡᤱᤃᤠᤜᤠ᤹ᤖᤧᤴ ᤁᤠᤣᤶᤓᤠᤣ . ᤀᤡᤱᤛᤧ ᤏᤢ ᤌᤠᤣᤒᤠᤣ ᤆᤠᤣᤁ᤻ᤔᤠ ᤜᤣᤁ᤻ᤕᤠᤔ᤻ᤔᤡᤴ ᤁᤢᤜᤡᤱᤜᤡᤱ ᤆᤠᤣᤃᤢ ॥ ᤐᤠᤄᤧᤴ ᤆᤰᤔᤧᤶᤒᤢ᤹ᤒᤠ ᤁᤢᤜᤣᤁ᤻ᤕᤠᤔ᤻ᤗᤧ ᤂᤢᤏᤧ᤹ ᤁᤡᤖᤠᤋ᤻ ᤛᤢᤘᤠᤱᤗᤧᤴ ᤔᤧᤶᤔᤠᤛᤠᤣ ᤙᤠᤣᤎᤢᤱᤃᤧᤶᤒᤠ ᤐᤠᤣᤁ᤻ᤂᤧᤀᤠᤱ ᤘᤠ ॥ ᤖᤧᤱᤛᤠᤣᤒᤠ. ᤛᤠᤶᤏᤡᤒᤠ  ᤆᤧᤔ᤻ᤈᤠᤣᤱᤜᤠᤱᤗᤧ ᤕᤖᤡᤰ ᤜᤧᤴᤗᤠᤒᤠ ᤛᤠᤵᤐᤴᤜᤠ᤹ ᤛᤠᤵᤋᤢᤛᤡᤀᤠᤱ ᤛᤠᤵᤗᤴ ᤆᤠᤣᤃᤢᤛᤡ ॥  ᤐᤠᤃᤴ ᤆᤰᤗᤠᤀᤠᤣ ᤂᤢᤏᤧ᤹ ᤁᤠᤰᤋᤃᤡ ‘ᤁᤡᤖᤠᤋ᤻ ᤀᤡᤋᤡᤜᤠᤛ᤻’ ᤛᤠᤵᤋᤢ ॥ ᤕᤠᤱᤛᤡ ᤔᤡᤰᤑ᤹ᤗᤠ ᤐᤠᤏ᤻ᤍᤠᤱᤗᤠᤶ ᤀᤠᤱ ‘ᤍ ᤜᤡᤛ᤻ᤋᤪᤡ ᤀᤧᤴᤍ ᤁᤸᤆᤖ᤻ ᤀᤑ᤻ ᤁᤡᤖᤠᤋ᤻ ᤐᤡᤐᤸ’ ᤁᤧᤖ᤹ᤒᤠ ᤁᤡᤖᤠᤋ᤻ ᤛᤠᤵᤔᤢᤴᤎᤢᤶᤗᤧ ᤂᤢᤏᤧ᤹ ᤁᤵᤋᤠᤣᤕᤠᤣᤒᤠᤍᤡᤶ ᤁᤢᤔᤡᤱ ᤀᤡᤱᤅᤧ ॥ ᤂᤢᤏᤧ᤹  ᤐᤠᤏ᤻ᤍᤠᤱ. ᤛᤠᤵᤙᤰᤗᤧᤵᤑᤠᤱ ‘ᤋᤢᤶ ᤕᤠᤰᤌᤢᤱ ᤏᤡᤱᤘᤠ᤹ᤓᤢ ᤛᤠᤵᤗᤠ’ ᤏᤢ ‘ᤕᤠᤰᤌᤢᤱ ᤏᤡᤛᤡᤃᤣᤁ᤻ ᤛᤠᤵᤗᤠ” ᤛᤠᤵᤋᤢ ॥ ᤁᤴ ᤛᤠᤵᤐᤴᤏᤡᤴᤏᤣ ᤕᤠᤰᤌᤢᤱ ᤐᤠᤏ᤻ᤍᤠᤱᤒᤠ ᤌᤡᤰᤛᤡᤃᤣᤁ᤻ᤐᤠ ᤏᤡᤋ᤻ᤇᤠᤵ ᤛᤠᤵᤗᤧᤵᤗᤧ ᤏᤠᤘᤠᤀᤠᤣ  ᤏᤠ.ᤋ. ᥇᥏᥌᥎ ᤀᤠᤱᤎᤠᤣ ᤛᤢᤰᤂᤡᤶᤒᤠ ᤏᤡᤛᤠᤶᤜᤡᤶᤜᤠ᤹ᤀᤠᤣ ᤙᤰᤏᤡᤔ᤻ ᤔᤧᤒᤠᤣᤁ᤻ᤂᤧ ॥ ᤐᤠᤏ᤻ᤍᤠᤱ ᤛᤠᤵᤙᤰ ᤋᤧᤱᤃᤵᤐᤠᤣ ᤕᤠᤰᤌᤢᤱ-ᤐᤧᤏᤡ-ᤔᤡᤰᤑᤢ᤹ᤗᤠ ᤐᤠᤏ᤻ᤇᤣᤰᤘᤠᤓᤢ. ᤕᤠᤰᤌᤢᤱ-ᤗᤧᤵᤆᤠ-ᤔᤡᤰᤑᤢ᤹ᤗᤠ ᤐᤠᤏ᤻ᤇᤣᤰᤘᤠᤓᤢ ᤛᤢᤶᤓᤢᤱ ᤆᤠᤣᤃᤢᤀᤠᤱ ᤐᤠᤏ᤻ᤇᤣᤰᤘᤠᤛᤠᤵᤐᤠ ᤀᤠᤱ ᤐᤠᤣᤁ᤻ᤂᤧ ॥ ᤜᤧᤰᤁᤣᤖᤡᤰᤁᤣ ᤂᤢᤏᤧ᤹ ᤕᤠᤰᤌᤢᤱ-ᤐᤧᤏᤡ-ᤔᤡᤰᤑᤢ᤹ᤗᤠ ᥉ ᤐᤠᤏ᤻ᤍᤠᤱᤅᤡᤒᤠ ‘ᤁᤡᤖᤠᤋ᤻ ᤒᤠᤩᤁᤖᤴ/ᤕᤠᤰᤌᤢᤱ ᤜᤢᤵᤐᤠᤏ᤻’ ᤛᤠᤵᤋᤢ ॥ ᤁ᤹ᤏᤠ ᤔᤢᤴᤎᤢᤶ ᤏᤢ ᤛᤠᤰᤌᤡᤶ ᤋᤧᤱᤃᤵᤐᤠ ‘ᤁᤡᤖᤠᤋ᤻ ᤛᤢᤴᤎᤢᤶ (ᤁᤡᤖᤠᤋ᤻ᤁᤠᤣ ᤒᤧᤍ᤻). ᤛᤡᤘᤠᤂᤠᤜᤢᤴ ᤛᤠᤵᤐᤴᤜᤠ᤹ ᤛᤠᤵᤋᤢᤛᤡ ॥ ᤁᤴᤏᤢᤛᤠᤣᤖᤡ ᤂᤢᤏᤧ᤹ ᤘᤣ᤹ ᤘᤣ᤹ ᤔᤡᤱᤒᤠ ᤔᤠᤵᤔᤠ ᤕᤖᤡᤰ ᤀᤡᤱᤙᤠᤣᤜᤠ᤹ ᤛᤠᤵᤗᤴ ᤆᤠᤣᤃᤢᤛᤡᤀᤠᤱ ᤔᤧᤘᤠ ॥ ᤀᤰᤂᤣᤖᤡᤰ ᤂᤢᤏᤧ᤹ ᤁᤢᤈᤠ᤹ᤀᤡ ᤁᤠᤣᤔ᤻ᤓᤠᤣᤛᤠᤒᤠ. ᤔᤢᤴᤎᤢᤶᤛᤠᤵᤐᤠ. ᤛᤠᤵᤔᤢᤴᤎᤢᤶᤛᤠᤒᤠ. ᤏᤡᤋ᤻ᤇᤠᤵᤛᤠᤵᤐᤴᤛᤠᤵᤐᤠ. ᤜᤢᤵᤐᤠᤏ᤻ᤛᤠᤵᤐᤠ. ᤐᤠᤏ᤻ᤇᤣᤰᤘᤠᤓᤢᤛᤠᤒᤠ ᤜᤧᤰᤋᤶᤒᤠ ᤕᤁ᤻ᤁᤧᤴ ᤜᤧᤴᤗᤠᤒᤠ ᤛᤢᤶ ᤐᤠᤏ᤻ᤍᤠᤱᤅᤡᤒᤠ ᤛᤠᤶᤏᤡᤒᤠ ᤘᤕᤧ ॥

ᤂᤢᤏᤧ᤹ ᤏᤧᤐᤠᤗ᤻ ᤑᤧᤖᤧᤀᤠᤱ ᤗᤡᤶᤒᤢᤘᤠᤏ᤻ ᤛᤢᤎᤠᤖ᤻ ᤛᤱᤄ ᤜᤢᤵᤆᤢᤶ ᤆᤠᤣᤃᤢᤀᤠᤱ ᤀᤠᤒᤠᤱᤅᤣ ᤗᤠᤶᤗᤠᤣᤀᤠᤣ ᤜᤠᤱ ᤋᤪᤡᤓᤢᤘᤴ ᤋᤃᤡ  ᤗᤡᤶᤒᤢᤘᤴ ᤀᤡᤋ᤻ᤕᤱᤗᤧᤴ ᤏᤠᤁ᤻ ᤔᤧᤕᤢᤰᤂᤢ ॥ ᤀᤰᤂᤣᤖᤡᤰ ᤂᤢᤏᤧ᤹ ᤏᤧᤐᤠᤗ᤻ᤒᤠ ᤌᤡᤰᤛᤡᤃᤣᤁ᤻ᤐᤠ ᤆᤢᤶᤓᤠᤣᤍᤡᤱ ᤀᤡᤋ᤻ᤕᤱᤗᤧᤴ ᤀᤡᤋ᤻ᤇᤠᤒᤠ ᤀᤠᤱ ᤗᤠᤣ ॥ ᤂᤢᤏᤧ᤹ ᤒᤡ.ᤋ. ᥈᥆᥇᥋ ᤗᤧ ᤏᤧᤐᤠᤗ᤻ᤒᤠ ᤌᤡᤰᤛᤡᤃᤣᤁ᤻ᤗᤧᤱ ᤐᤠᤣᤁ᤻ᤂᤧᤒᤠ ᤛᤣᤁ᤻ᤛᤡᤱᤅᤠᤣ ᤏᤧᤐᤠᤗ᤻ ᤐᤪᤈᤠᤋᤠᤴᤋᤪᤡᤰ ᤔᤜᤠᤛᤓᤠᤗᤠᤶ ᤕᤧᤓᤠᤱᤛᤠ ᤔᤡᤱᤒᤠᤣᤛᤠᤵ ᤐᤠᤣᤃᤧᤀᤠᤱ ᤘᤕᤧ ॥ ᤁᤖ ᤛᤠᤱᤃᤣᤅ᤻ ᤐᤠᤣᤁ᤻ᤂᤧᤀᤠᤱ ᤆᤧᤔ᤻ᤈᤠᤣᤱᤜᤠᤱᤅᤡᤴ ᤗᤡᤶᤒᤢᤘᤠᤏ᤻ ᤋᤧᤱᤃᤵ ᤗᤧᤖᤢᤀᤠᤱ ᤏᤧᤘᤠᤗᤠ ᤏᤠ ᤌᤠᤛᤡᤱ ॥ ᤂᤢᤏᤧ᤹ ᤋᤪᤡᤓᤢᤘᤴ ᤛᤡᤔᤡᤰᤗᤢᤱᤜᤡᤶᤔᤠᤣ ᤁᤡᤖᤠᤋ᤻ ᤐᤠᤏ᤻ᤍᤠᤱ ᤏᤢ ᤛᤠᤰᤌᤡᤶᤛᤠᤶᤒᤠᤖᤧ ᤏᤠᤘᤠᤀᤠᤣ ᤕᤢᤰᤋᤡᤱ ᤐᤠᤣᤁ᤻ᤂᤧ ॥ ᥇᥊ ᤋᤱᤒᤣ ᤂᤧ᤹ᤀᤠᤣ ᤕᤠᤃᤧᤀᤠᤱ ᤕᤠᤱᤛᤡ ᤗᤧᤳᤋᤡᤱ ᤐᤡᤖᤢ ᤜᤧᤰᤁᤠᤩᤱ ᤍᤠᤷᤈᤡ᤹ᤗᤡᤱ ᤐᤣᤀᤠᤱ ᤕᤢᤱᤛᤡᤱ ॥ ᤐᤠᤄᤣ᤹ᤕᤠᤣ ᤂᤢᤏᤧ᤹ ᥎ ᤀᤰᤋᤢᤒᤖ᤻ ᥇᥏᥍᥌ ᤗᤧ ᤔᤠᤛᤡᤱ ॥

ᤀᤰᤂᤣᤖᤡᤰ ᤁᤢᤜᤡᤱᤜᤡᤱ ᤋᤡᤰᤋᤢᤒᤠ ᤁᤢᤕᤠᤔ᤻ᤒᤰᤁᤡᤸᤗᤧ ᤂᤢᤏᤧ᤹ ᤔᤧᤴᤍᤱᤍᤱ ᤁᤢᤔᤡᤱ ᤀᤡᤱᤅᤧ ॥ ᤂᤢᤏᤧ᤹ ᤕᤧᤳᤐᤡᤛᤠᤱ ᤁᤧᤳᤋᤢᤒᤠ ᤗᤰᤑᤠᤖᤧᤴ ᤏᤠᤈᤶ ᤆᤠᤣᤃᤢᤖ ᤏᤧᤐᤠᤗ᤻ ᤗᤠᤈᤣ᤹ᤖᤧ ᤕᤠᤰᤐᤱᤃᤣᤴ ᤛᤠᤶᤔᤢᤰᤐᤠ ᤀᤡᤱᤓᤴ ᤆᤠᤣᤃᤢ ᤜᤧᤰᤁᤠᤩᤱ ᤒᤡ.ᤋ. ᥈᥆᥋᥋ ᤗᤧ ᤀᤡᤱᤓᤧᤴ ᤋᤧᤳᤋᤡ ᤛᤠᤵᤗᤴ ᤆᤠᤣᤃᤢ ॥ ᤕᤠᤱᤛᤡ ᤕᤠᤰᤑᤠ ᥇᥆ ᤒᤠ ᤏᤧᤐᤠᤗᤡ ᤐᤠᤏ᤻ᤍᤠᤀᤠᤣ ᤁᤢᤎᤰᤛᤢᤶ ᤌᤠ᤹ᤛᤠ ᤑᤳᤇᤢᤖ ᤏᤠᤈᤶ ᤁᤧᤳᤋᤢ ॥ ᤁ᤹ᤏᤠ ᤁᤡᤖᤠᤋ᤻ ᤕᤠᤰᤌᤢᤱ ᤛᤢᤔᤠᤈᤡᤗᤠᤶᤒᤠ ᤀᤠᤱ ᤙᤠᤣᤎᤢᤱᤃᤧᤶᤒᤠ ᤑᤠ᤹ᤀᤠᤱ ᤆᤔ᤻ ᤏᤠᤈᤶ ᤘᤠ ॥ ᤌᤢᤶ ᤌᤢᤶ ᤁᤢᤀᤡᤋ᤻ᤗᤠ ᤕᤢᤰᤛᤡᤱ ᤔᤧᤒᤠᤣᤁ᤻ᤂᤧᤀᤠᤱ ᤔᤧᤕᤧᤵ. ᤋᤱᤒᤣᤎᤰ ᤛᤠᤘᤠᤏ᤻ ᤋᤱᤏᤠᤶ ᤋᤠᤣᤛᤡᤱ ᤐᤠᤣᤅ᤻ ॥ ᤀᤰᤁᤣᤖᤡᤰ ᤆᤧᤔ᤻ᤈᤠᤣᤱᤜᤠᤱᤅᤡᤴ ᤗᤠᤈᤣ᤹ᤀᤠᤣ ᤔᤧᤶᤔᤠᤛᤠᤣ ᤀᤠᤈᤢᤏᤡ ᤐᤠᤣᤁ᤻ᤂᤧᤀᤠᤱ ᤘᤠ ॥