ᤔᤠᤱᤛᤣᤒᤢᤱ/ ᤛᤡᤔᤡᤁ᤻ᤗᤢᤱ ᤁᤢᤍᤡᤶ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤖᤧ ᤆᤠᤛᤠᤣᤁ᤻ ᤋᤱᤏᤠᤔ ᤔᤧᤍᤠᤣᤛᤢᤀᤠᤱ ᤘᤠ ॥ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠ ᤛᤠᤖᤧ ᤜᤡᤴᤍᤠᤣᤁ᤻ᤏᤢ ᤁᤧᤍᤱᤒᤠ ᤘᤠᤏᤠᤶ ᤀᤡᤛᤡᤰᤐᤠ ᤋᤱᤏᤠᤔ ᤆᤠᤛᤠᤣᤁ᤻ ᤋᤱᤏᤶᤗᤠᤣ ॥ ᤁᤴ ᤋᤱᤏᤠᤶᤔᤡᤴ ᤕᤠᤱᤄᤴᤗᤠᤶᤒᤠ ᤁᤢᤜᤣᤁ᤻ᤛᤡᤱ ᤐᤏᤣᤂᤠᤒᤠ ᤐᤠᤏᤗᤠᤣᤁ᤻ ᤔᤢᤴᤎᤢᤶ ᤘᤠᤖᤠᤣ ॥
ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤖᤧ ᤆᤠᤒᤠᤗᤡ ᤔᤣᤍᤣᤛᤢᤀᤠᤱ ᤐᤏᤠᤣ-ᤏᤠᤣᤖᤡᤰ ᤔᤧᤛᤠᤁ᤻ᤋᤢ. ᤔᤧᤍᤠᤣᤁ᤻ᤋᤢ. ᤔᤧᤃᤠᤣᤛᤢᤀᤠᤱ ᤁᤢᤛᤠᤏᤢ᤹ᤖ ᤋᤢᤶᤔᤠᤱ ᤐᤛᤋ᤻ ᤛᤋᤡ ᤌᤡᤰ ᤐᤖᤢᤵᤐᤠᤣ ᤔᤣᤈᤢᤶᤔᤠᤱ ᤛᤛᤠᤣᤋ᤻ᤛᤖᤠᤱᤏᤢ ᤛᤠᤣᤖᤡᤰ ᤔᤣᤈᤒᤠ ᤕᤠᤱᤄᤴ ᤌᤠᤒᤠᤣᤕᤧᤶᤔᤡᤒᤠ ᤘᤏᤠᤶᤀᤠᤣᤏᤢ ᤁᤴ ᤋᤱᤏᤠᤶᤔᤡᤴ ᤁᤢᤜᤣᤁ᤻ᤛᤡᤱ ᤐᤠᤣᤂᤠᤒᤠ ᤏᤠᤛᤠᤏ᤻ ᤘᤠ ॥
ᤆᤠᤛᤠᤣᤁ᤻ ᤋᤱᤏᤠᤶᤔᤠᤣ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠ ᤛᤡᤃᤠᤱᤒᤠ ᤕᤖᤡᤰᤁᤣ ᤛᤢᤜᤠᤱᤜᤠ᤹ᤖᤧ ᤀᤠᤒᤠᤱᤅᤣ ᤛᤢᤜᤠᤱᤒᤠ ᤀᤡᤸᤗᤡᤶ ᤀᤡᤛᤡᤰ ᤐᤖᤡᤰ ᤐᤖᤡᤰᤗᤧ ᤔᤧᤍᤠᤣᤛᤢᤖᤠᤣ ॥ ᤁᤢᤛᤡᤱᤀᤠᤣ ᤕᤠᤰᤌᤢᤱ ᤛᤘᤠᤱᤗᤣ ᤗᤌᤡᤰ ᤌᤡᤶᤒᤣᤀᤠᤣ ᤔᤧᤈᤢᤶᤔᤠᤱ ᤐᤏᤠᤣ-ᤏᤠᤣᤖᤡᤰ ᤕᤠ᤹ᤗᤠᤁ᤻ᤔᤠ ᤐᤠᤗᤠᤔ᤻ ᤂᤠᤩᤗᤡ ᤛᤠᤶᤗᤠᤣᤀᤡ . ᤁᤣᤗᤠᤅ᤻ ᤗᤠᤅ᤻ᤅᤡ ᤑᤢᤍᤱᤆᤠᤀᤡ ᤔᤧᤍᤠᤣᤛᤢᤖᤠᤣ ॥ ᤖᤠᤀᤡ ᤛᤢᤘᤠᤱᤗᤣ ᤌᤡᤶᤒᤣᤀᤠᤣ ᤐᤖᤡᤰ ᤐᤖᤡᤰᤐᤠ ᤛᤠᤁᤣᤗᤠ ᤗᤠᤱᤅᤡ ᤑᤢᤍᤱ ᤆᤠᤠᤆᤠᤀᤡ ᤔᤣᤍᤠᤣᤛᤢ ॥
ᤆᤠᤛᤠᤣᤁ᤻ ᤋᤱᤏᤠᤶᤔᤡᤴ ᤁᤢᤜᤣᤁ᤻ᤛᤡᤱᤅᤠᤣ ᤋᤱᤏᤠᤶᤖᤧ ᤏᤠᤘᤠᤀᤠᤣ ᤜᤠᤣᤵᤗᤠᤸᤗᤧ ᤆᤠᤛᤠᤣᤁ᤻ ᤛᤣᤘᤠᤖᤰᤁᤠᤱ ᤔᤧᤔᤧᤳᤋᤢ ॥ ᤂᤧᤴ ᤕᤧᤶᤔᤠᤣ ᤁᤧᤍᤢᤶᤒᤠ ᤆᤠᤜᤠ᤹ ᤛᤢᤶᤔᤠᤀᤠᤱ ᤔᤠᤱᤀᤠᤣ ᤋᤠᤣᤔ᤻ᤔᤠ ᤀᤡᤸᤗᤡᤶ ᤘᤕᤠ ॥ ᤐᤠᤜᤧᤴᤏᤣ ᤀᤰᤂᤣᤗ᤹ᤖᤡᤰ ᤋᤱᤏᤠᤶᤖᤧ ᤏᤠᤘᤠᤀᤠᤣ ᤌᤠᤣᤒᤠᤣ ᤐᤠᤣᤂᤠᤖ ᤐᤣᤒᤠᤖᤠᤣ ॥ ᤁᤴ ᤆᤠᤛᤠᤣᤁ᤻ ᤋᤱᤏᤠᤶᤔᤡᤴ ᤀᤠᤸᤗᤠᤣ ᤁᤣᤈᤡᤖᤣ ᤏᤠᤘᤠᤀᤠᤣ ᤀᤠᤱ ᤋᤃᤡ ᤔᤧᤓᤠᤣᤛᤢᤖ ᤔᤣᤘᤠ ᤔᤡᤰᤛᤣᤏ᤻ᤌᤡᤶᤒᤠᤜᤠ᤹ᤖᤧ ॥
