ᤔᤠᤱᤛᤣᤒᤢᤱ/ ᤔᤢᤰᤁᤢᤶᤗᤢᤱ ᤏᤠᤶᤒᤡᤴ ᤏᤧᤐᤠᤗ ᤋᤠᤔᤵᤗᤧᤈᤢᤱ ᤌᤢᤶ, ᤗᤡᤶᤒᤢᤘᤠᤏ᤻ ᤀᤠᤣ ᤁᤧᤏᤧᤒᤠ ᤗᤌᤡᤶ ᤛᤣᤘᤠ ᤋᤠᤰᤋᤧᤴᤗᤠᤣ ॥ ᤕᤠᤱᤏᤡᤶᤖᤧ ᤏᤠᤘᤠᤀᤠᤣ ᤛᤧᤰᤂᤠᤀᤣ ᤐᤏᤠᤣᤒᤠ ᤋᤧᤴ ᤏᤧ ॥ ᤁᤴ ᤋᤧᤴᤀᤠᤣᤏᤢ ᤔᤢᤖᤢᤶᤃᤧᤴ ᤔᤢᤴᤎᤢᤶᤔᤡ ᤛᤣᤘᤠ ᤋᤠᤰᤋᤧᤴ ᤛᤧᤴᤇᤣᤀᤡ ᤑᤰᤋᤠᤱᤗᤢᤱ ᤁᤢᤍᤱᤒᤠ ᤑᤢᤳᤖᤡᤕᤠᤖᤡᤰ ᤛᤧᤸᤗᤧᤱᤏᤠ ᤏᤠᤅ᤻ᤈᤱ ᤗᤧᤰᤁᤠᤱ ᤏᤧᤒᤠ ᤏᤡᤕᤠᤖᤠᤠ ᤏᤡᤎᤠᤐ᤻ ॥ ᤔᤢᤴᤎᤢᤶᤔᤡ ᤋᤧᤴ ᤛᤡᤍᤡᤱᤆᤠᤣᤁ᤻ᤏᤢ ᤛᤠᤣ-ᤛᤠᤣᤖᤡᤰ ᤗᤢᤱᤔᤠ ᤐᤜᤡᤔ᤻ᤒᤠ ᤏᤡᤕᤠᤠᤖᤠ ᤁᤠᤣᤁ᤻ᤔᤠ ᤑᤠᤱᤈᤱ. ᤕᤱᤄᤱᤒᤠ ᤏᤡᤕᤠᤖᤠᤜᤠ᤹ ᤏᤡᤎᤠᤐ᤻ᤗᤠᤣ ॥
ᤁᤡᤖᤠᤋ᤻ ᤕᤠᤰᤌᤢᤱ ᤔᤢᤴᤎᤢᤶᤔᤠᤣ ᤔᤢᤴᤁᤢᤶᤗᤢᤱᤅᤡᤴ ᤔᤢᤴᤎᤢᤶᤔᤡ ᤋᤧᤴᤖᤧ ᤏᤠᤘᤠᤀᤠᤣ ᤐᤠᤣᤎᤰ ᤐᤠᤣᤂᤠᤀᤠᤱ ᤘᤠ ॥ ᤔᤢᤴᤎᤢᤶᤔᤡ ᤐᤠᤏ᤻ ᤀᤡᤛᤡᤰ ᤔᤢᤰᤁᤣ ᤔᤢᤰᤗᤧ ᤁᤢᤶᤍᤢᤀᤠᤱ ᤕᤢᤱᤒᤠ ᤋᤧᤴ ॥ ᤛᤣᤘᤠᤛᤠᤜᤠ᤹ᤖᤧ ᤔᤢ᤹ᤀᤡ ᤏᤠᤁ᤻ᤔᤠᤸᤗᤧ ᤂᤠᤣᤁᤧᤍᤧᤵᤐᤠ ᤋᤧᤴ. ᤛᤠᤱᤗᤒᤠ ᤛᤣᤘᤠ ᤋᤠᤰᤋᤧᤴ ᤁᤧᤗ᤹ᤒᤠ ᤁᤢᤛᤡᤱ ᤏᤡᤳᤋᤧᤳ ॥ ᤁᤴ ᤛᤣᤘᤠ ᤋᤠᤰᤋᤧᤴᤏᤡᤴ ᤕᤢᤔᤠ᤹ ᤕᤢᤰᤏᤠᤋᤧᤴᤖᤠᤣ ᤁᤧᤗ᤹ᤒᤠ ᤐᤕᤶᤒᤠ ᤏᤛᤠᤏ᤻ ᤏᤢ ᤋᤠᤣᤘᤠ ᤘᤠ ॥
ᤔᤢᤰᤁᤢᤶᤗᤢᤱ ᤔᤠᤱᤕᤢᤰᤏᤠ ᤛᤣᤘᤠ ᤋᤠᤰᤋᤧᤴᤀᤠᤣ ᤐᤣᤁ᤻ᤔᤠ ᤛᤣᤘᤠ ᤆᤠᤣᤁ᤻ᤔᤠ ᤀᤠᤵᤑᤠ᤹ᤗᤱᤎᤠᤣ ᤁᤢᤜᤣᤁ᤻ᤛᤡᤱ ᤐᤠᤣᤂᤠ ᤁᤧᤖ᤹ᤒᤠ ᤕᤧᤴᤏᤡᤋ᤻ ᤌᤠᤀᤡᤱ ᤜᤠᤣᤐ᤻ ॥ ᤔᤢᤴᤎᤢᤶᤔᤠᤣ ᤐᤠᤣᤎᤰ ᤐᤠᤣᤅ᤻ᤒᤠᤖᤧ ᤏᤠᤔ᤻ᤓᤣᤀᤠᤣ ᤜᤧᤴᤇᤡᤱ ᤜᤧᤴᤇᤡᤱ ᤋᤱᤒᤣ ᤋᤃᤡᤀᤣ ᤕᤢᤰᤛᤡᤱ ᤐᤠᤣᤂ᤻ᤒᤠ ᤁᤧᤖ᤹ᤒᤠ ᤆᤡᤈᤧᤵᤔᤠ ᤛᤢᤰᤋᤧᤳ ॥
ᤔᤠᤵᤔᤠ ᤀᤡᤸᤗᤡᤰ ᤋᤱᤒᤣ ᤋᤃᤡ ᤔᤢᤰᤁᤢᤶᤗᤢᤱ ᤛᤣᤘᤠ ᤋᤠᤰᤋᤧᤴ ᤁᤢᤓᤣᤛᤠᤱ ᤁᤧᤕᤢᤱᤒᤠ ᤋᤧᤴᤇᤠᤒᤠᤜᤠ᤹ᤖᤧ ᤜᤢᤴᤇᤡ ᤔᤧᤴᤍᤠᤰ ᤏᤢ ᤌᤢᤔ᤻ᤒᤠᤜᤠ᤹ ᤋᤠᤶᤓᤢᤱᤅᤠᤣ ᤆᤠᤗᤠᤶᤛᤧ ᤔᤣᤍᤣ᤹ᤖᤢᤛᤡᤒᤠᤀᤡᤴ ᤐᤠᤜᤣᤰᤁᤣ ᤔᤧᤔ᤻ᤕᤠ ᤔᤧᤒᤣ ॥ ᤔᤠᤵᤐᤠ ᤕᤧᤴᤏᤠᤱᤛᤠᤱ ᤔᤧᤴᤄᤠᤣᤛᤢᤛᤡᤴᤏᤠᤱ ᤕᤢᤔᤠᤔᤠᤱᤗᤧ ᤛᤧᤘᤠᤜᤧᤏᤠ ᤔᤧᤍᤠᤣᤏ᤻ᤍᤢ ᤜᤧᤰᤁᤠᤩᤱᤗᤰ ᤕᤠᤶᤔᤠᤣ ᤔᤧᤴᤍᤠᤰᤂᤠ᤹ ᤁᤢᤀᤡᤛᤡᤰ ᤔᤧᤄᤠᤣᤛᤢᤛᤡ/ ᤔᤧᤍᤠᤩ ᤁᤧᤖ᤹ᤒᤠ ᤐᤠᤏ᤻ᤛᤢᤶᤌᤡᤰ ᤘᤠ ॥
ᤔᤢᤰᤁᤢᤶᤗᤢᤱᤖᤧ ᤛᤣᤘᤠ ᤋᤠᤰᤋᤧᤴᤖᤧ ᤏᤠᤘᤠᤀᤠᤣ ᤀᤠᤰᤂᤣᤖᤡᤰ ᤁᤢᤜᤣᤁ᤻ᤛᤡᤱ ᤐᤠᤣᤂᤠᤛᤠᤱ ᤁᤴ ᤀᤠᤏᤡ᤹ ᤋᤧᤴᤒᤠ ᤏᤠᤈᤶᤔᤡᤒᤠ ᤘᤠᤋᤡᤖᤧ ᤏᤠᤘᤠᤀᤠᤣ ᤋᤃᤡ ᤐᤠᤣᤖ ᤘᤠ ॥ ᤀᤠᤸᤗᤠᤣ ᤛᤠᤶᤕᤠᤣᤀᤡᤒᤠ ᤋᤠᤰᤁᤴᤍᤧᤴ ᤐᤠᤣᤂᤠᤀᤠᤱ ᤏᤧ ॥ ᤛᤣᤘᤠ ᤆᤠᤣᤁ᤻ᤛᤧ ᤔᤠᤱᤄᤠ ᤔᤠᤱᤄᤠᤏᤢ ᤕᤁ᤻ᤋᤱᤒᤠ ᤏᤧᤐᤠᤗᤒᤠ ᤏᤢ ᤋᤧᤔᤧᤴ ᤗᤠᤈᤣ᤹ᤏᤢ ᤔᤧᤍᤠ ॥ ᤁᤧᤍᤠᤒᤠ ᤛᤣᤘᤠ ᤛᤠᤜᤠ᤹ ᤕᤁ᤻ᤋᤱᤒᤠ ᤁᤡᤖᤠᤋ᤻ ᤛᤠᤶᤕᤠᤣ ᤛᤠ᤺ ᤏᤢ ᤜᤡᤴᤍᤢ ᤛᤠᤶᤕᤠᤣᤒᤠ ᤔᤧᤍᤠ ॥ ᤘᤣ᤹ ᤛᤠᤶᤕᤠᤣᤒᤠᤀᤠᤱ ᤜᤧᤶᤔᤠᤩᤁᤣ ᤛᤣᤘᤠ ᤆᤠᤣᤁ᤻ᤛᤧ ᤔᤢ᤹ᤀᤡ ᤏᤠᤁ᤻ᤛᤧ ᤔᤧᤍᤠᤖᤠᤣ ॥
ᤔᤢᤰᤁᤢᤶᤗᤢᤱᤅᤠᤣ ᤔᤠᤱᤜᤧᤰᤔᤠ ᤕᤠ ᤛᤣᤘᤠ ᤋᤠᤣᤔ᤻ᤔᤠᤀᤠᤱ ᤏᤠᤁ᤻ᤏᤠᤒᤠ ᤔᤢ᤹ᤀᤡ. ᤔᤢᤰ. ᤋᤠᤣᤘᤠᤜᤠ᤹ ᤁᤧᤳ ᤁᤧᤗ᤹ᤒᤠ ᤐᤕᤶᤒᤠ ᤏᤛᤠᤏ᤻ ᤘᤠ ॥ ᤜᤧᤰᤁᤠᤩᤱᤛᤧ ᤋᤧᤴᤗᤧ ᤔᤡᤱᤅᤠᤱ ᤔᤢᤰᤁᤢᤶᤗᤢᤱ ᤐᤠᤣᤂᤠᤒᤠ ᤖᤠᤣ ॥ ᤔᤢᤰᤁᤢᤶᤗᤢᤱᤖᤧ ᤁᤢᤛᤶᤔᤠᤣ ᤁᤡᤖᤠᤋ᤻ ᤛᤠᤶᤕᤠᤣᤛᤠᤖᤧ ᤔᤠᤱᤜᤡᤶ ᤏᤧ ॥ ᤔᤠᤱᤜᤡᤶᤖᤧ ᤁᤢᤓᤣᤛᤠᤱ ᤗᤠᤈᤣ᤹ ᤔᤡᤱᤛᤠᤣ ᤔᤧᤶᤔᤠ ᤔᤠ᤺ᤌᤠᤁᤢ ᤑᤸᤃᤢᤏᤴᤍᤖᤧ ᤆᤀᤡᤋ᤻ᤗᤱ ᤕᤢᤰᤛᤡᤱ ᤐᤠᤣᤂᤠᤀᤠᤱ ᤕᤢᤱ ॥
ᤔᤢᤰᤁᤢᤶᤗᤢᤱᤅᤡᤴ ᤐᤣᤏᤣ ᤐᤏ᤻ᤍᤠᤱ ᤐᤠᤌᤡᤓᤖᤠᤀᤠᤱ ᤔᤧᤔᤧᤳᤋᤢ ॥ ᤜᤡᤴᤍᤢ ᤛᤠᤶᤕᤠᤣᤖᤧ ᤐᤠᤌᤡᤓᤖᤠ ᤍᤣᤒᤡᤖᤧ ᤆᤀᤡᤋ᤻ᤗᤢᤱ ᤕᤢᤰᤛᤡᤱ ᤔᤧᤈᤠᤣᤃᤢᤀᤠᤱ ᤕᤢᤱ ॥ ᤛᤣᤘᤠᤖᤧ ᤑᤠ᤹ᤀᤠᤱ ᤜᤧᤴᤇᤡᤱ ᤜᤧᤴᤇᤡᤱ ᤛᤣᤘᤠᤛᤠᤜᤠ᤹ ᤔᤧᤍᤠᤒᤠ ᤋᤧᤴᤀᤠᤣ ᤕᤠᤵᤔᤡᤖᤧ ᤆᤠᤣᤁ᤻ᤏᤠᤒᤠ ᤔᤠᤵᤐᤠ ᤐᤏᤠᤣᤒᤠ ᤗᤠᤶ ᤐᤠᤣᤂᤠᤀᤠᤱ ᤏᤧ ॥
ᤔᤢᤰᤁᤢᤶᤗᤢᤱᤅᤠᤣ ᤁᤧᤵᤔᤠ ᤔᤠᤵᤐᤠ ᤆᤠ᤹ ॥ ᤁᤧᤖᤧᤰᤏᤢᤸᤗᤧ ᤋᤃᤡ ᤀᤠᤳᤋᤠᤴᤏᤢᤛᤠᤱ ᤋᤠᤵᤗᤣᤈᤢᤱ ᤐᤠᤱᤈᤢᤶ ᤁᤧᤵᤔᤠ ᤐᤠᤣᤅ᤻ ᤜᤧᤴᤏᤠᤱᤎᤠᤣ ᤔᤢᤰᤁᤢᤶᤗᤢᤱ ᤕᤠᤣᤛ᤻ᤔᤠ ᤑᤣᤂᤡ ᤁᤧᤵᤔᤠ ᤐᤠᤣᤅ᤻ ॥ ᤕᤠᤣᤛ᤻ᤔᤠ ᤑᤣᤍᤡᤀᤠᤣ ᤀᤣᤀᤠᤱ ᤕᤠᤱᤎᤠᤣᤁ᤻ᤔᤠ ᤋᤧᤴᤜᤠ᤹ ᤏᤧ ॥ ᤆᤢᤰᤛᤠ ᤐᤠᤱᤈᤢᤶᤔᤣ ᤏᤧ ॥ ᤜᤧᤴ ᤋᤧᤴᤏᤠᤱᤎᤠᤣ ᤗᤠᤎ᤹ᤠ ᤗᤠᤶ ᤔᤧᤒᤣᤁ᤻ᤏᤧᤴ ॥ ᤗᤠᤱᤄᤣᤁ᤻ᤔᤠᤀᤠᤱᤗᤰ ᤐᤠᤣᤁ᤻ᤔᤠᤐᤠᤣᤅ᤻ ॥ ᤕᤶᤒᤠ ᤗᤠᤶᤏᤧ ᤜᤧᤴᤏᤠᤱᤎᤠᤣ ᤌᤠᤣᤛ᤻ᤔᤠ ᤑᤣᤍᤡ ᤁᤧᤵᤐᤠ ᥇ ᤁᤢᤔᤢᤰ ᤀᤠᤱᤎᤠᤣ ᥈ ᤁᤢᤔᤢᤰ ᤌᤠᤖᤡᤰᤗᤧ ᤀᤠᤃᤧᤴ ॥ ᤀᤠᤰᤂᤧᤴᤕᤠᤁ᤻ ᤗᤠᤱᤄᤣᤁ᤻ᤔᤠ ᤕᤠᤏ᤻ᤍᤧᤳ ᤜᤧᤸᤗᤧ ᤏᤠᤶᤓᤣᤀᤠᤣᤀᤠᤱ ᤐᤠᤠᤣᤅ᤻ ॥
ᤌᤠᤣᤛ᤻ᤔᤠ ᤑᤧᤍᤡ ᤀᤠᤣ ᤕᤠᤱᤎᤠᤣᤁ᤻ᤔᤠ ᤋᤧᤴᤜᤠ᤹ ᤏᤧ ॥ ᤆᤢᤰᤛᤠ ᤐᤠᤱᤈᤢᤶᤔᤠᤱ ᤏᤧ ॥ ᤁᤴ ᤋᤧᤴᤏᤠᤱᤎᤠᤣ ᤗᤠᤱᤄᤣᤁ᤻ᤔᤠᤀᤠᤱ ᤐᤣᤁ᤻ᤔᤠᤸᤗᤧ ᤜᤠᤸᤗᤧᤰ ᤗᤠᤱᤄᤣᤁ᤻ᤔᤠᤀᤠᤱ ᤐᤣᤁ᤻ᤔᤠᤸᤗᤧ ᥇ ᤔᤢᤰᤁᤠᤱᤎᤠᤣ ᥈ ᤕᤠ ᥉ ᤔᤢᤰᤗᤧ ᤀᤠᤃᤧᤳ ॥ ᤁᤢᤓᤠ᤹ ᤗᤠᤱᤄᤣᤁ᤻ ᤔᤧᤴᤕᤠᤔ᤻ᤏᤒᤠᤖᤧ ᤑᤠ᤹ᤀᤠᤱ ᤔᤏᤠ ᤁᤧᤃᤢᤒᤠ ᤕᤠᤵᤔᤡᤀᤠᤱ ᤔᤧᤘᤠᤖᤠᤣ ॥ ᤜᤢᤴᤇᤡ᤹ ᤕᤠᤱᤀᤠᤣ ᤕᤠᤵᤔᤡ ᤌᤠᤣ ᤋᤣ᤹ᤔᤠ ᤕᤢᤐ᤻ᤔᤠᤛᤡ ᤕᤠᤔ᤻ᤒᤰ ᤔᤧᤈᤠᤣᤁ᤻ ॥
ᤔᤢᤰᤁᤢᤶᤗᤢᤱᤅᤡᤴ ᤋᤠᤰᤁᤴᤍᤧᤴᤖᤧ ᤏᤠᤘᤠᤀᤠᤣ ᤀᤠᤸᤛᤠᤱ ᤑᤠᤣᤔᤠ ᤀᤢᤛ᤻ᤖᤢᤒᤠ ᤆᤠᤣᤁ᤻ᤔᤠ ᤑᤠ᤹ᤀᤠᤱ ᤁᤣᤒᤸᤁᤠᤖ ᤕᤢᤱᤔᤠ ᤋᤶᤛᤡᤱ ᤔᤧᤈᤠᤣᤁ᤻ᤗ ᤔᤣᤘᤠ ॥ ᤁᤴᤏᤡᤴ ᤕᤢᤰᤑᤠᤣ ᤗᤠᤶᤒᤠ ᤔᤧᤴᤏᤠᤱ ᤐᤠᤱᤅᤣᤒᤠ ᤗᤧᤱᤛᤱᤅᤡᤒᤠ (ᤒᤠᤩᤒᤛᤠᤕᤡᤁ᤻) ᤕᤠᤔ᤻ᤒᤰᤗᤠᤣ ॥ ᤁᤣᤒᤸᤁᤠᤖ ᤕᤢᤱᤔᤠ ᤑᤠ᤹ᤀᤠᤱ ᤔᤢᤰᤁᤢᤶᤗᤢᤱ ᤂᤡᤖᤡᤘᤖᤡ ᤜᤧᤴᤇᤡᤱ ᤜᤧᤴᤇᤡᤱ ᤌᤠᤣᤁ᤻ᤑᤧ᤹ᤗᤠ ᤔᤧᤗᤧᤂᤢᤀᤠᤱ ᤘᤠ ॥
ᤁᤴ ᤕᤠᤔ᤻ᤒᤰᤁᤠᤣ᤹ ᤁᤢᤓᤠ᤹ ᤋᤧᤴᤇᤠᤒᤠᤜᤠ᤹ ᤁᤣᤒᤸᤁᤠᤖ ᤗᤧᤶᤈᤠᤱ ᤔᤧᤄᤡᤶᤛᤡᤱᤅᤠᤱ ᤁᤣᤒᤗᤁᤠᤖ ᤕᤢᤰᤛᤡᤱ ᤆᤠᤣᤁ᤻ᤔᤠᤐᤠᤣᤅ᤻ ᤁᤧᤖ᤹ᤒᤠ ᤐᤠᤏ᤻ᤀᤠᤣ ᤔᤧᤘᤠ ॥ ᤕᤖᤡᤰ ᤂᤠᤶᤒᤠᤣᤅ᤻ᤒᤠ ᤗᤢᤱᤒᤠᤣᤅ᤻ᤒᤠᤜᤠ᤹ ᤛᤣᤛᤣᤒᤠ ᤋᤧᤴ ᤔᤢᤰᤁᤢᤶᤗᤢᤅᤠᤣ ᤁᤣᤒᤸᤁᤠᤖ ᤕᤢᤱᤔᤠ ᤔᤧᤏᤢ᤹ᤏᤧᤴ ॥ ᤛᤣᤘᤠ ᤋᤠᤰᤋᤧᤴ ᤆᤡᤏ᤻ᤈᤠ. ᤔᤠᤱ ᤛᤡᤳᤇᤡᤱ ᤁᤧᤖ᤹ᤒᤠ ᤐᤠᤏ᤻ᤓᤠᤣᤅ᤻ ᤔᤧᤈᤠᤣᤃᤢᤀᤠᤱ ᤘᤠ॥
ᤔᤢᤰᤁᤢᤶᤗᤢᤱ ᤋᤠᤱᤛᤣᤐ᤻ ᤜᤣᤁ᤻ᤕᤠᤔ᤻ᤒᤠᤖᤧ ᤔᤢᤰᤁᤢᤶᤗᤢᤱᤅᤠᤣ ᤁᤣᤒᤗᤁᤠᤖ ᤕᤢᤰᤛᤡᤱ ᤆᤠᤣᤁ᤻ᤔᤠ ᤗ᤹ᤖᤡᤰ. ᤌᤠᤣᤁ᤻ᤑᤧ᤹ᤗᤠ ᤔᤧᤗᤧᤂᤢᤒᤠ ᤋᤧᤴᤀᤠᤣ ᤕᤠᤶᤔᤠᤣ ᥈᥆,᥆᥆᥆ ᤛᤡᤱᤒᤢᤱ ᤗᤣᤐ᤻ᤔᤠ ᤑᤠ᤹ᤀᤠᤱ ᤜᤣᤁ᤻ᤕᤠᤔ᤻ ᤔᤧᤈᤠᤣᤃᤢᤖ ᤔᤧᤘᤠ ॥ ᤛᤠᤣᤛᤠᤣᤖᤡᤰ ᤔᤢᤰᤁᤢᤶᤗᤢᤱᤅᤠᤣ ᤁᤣᤒᤗᤁᤠᤖ ᤕᤢᤱᤐᤠᤱᤔᤠᤛᤡ ᤔᤧᤏᤢ᤹ᤏᤧᤴ ᤁᤧᤖ᤹ᤒᤠ ᤐᤠᤏ᤻ ᤐᤎᤠᤐ᤻ᤐᤠ ᤏᤠᤘᤠᤀᤠᤣ ᤘᤠᤖᤠᤣ ॥
ᤁᤢᤰᤁᤢᤶᤗᤢᤱᤅᤡᤴ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤖᤧ ᤛᤣᤘᤠ ᤋᤠᤰᤋᤧᤴ. ᤛᤣᤘᤠ ᤆᤠᤣᤁ. ᤋᤠᤣᤘᤠ ᤔᤔᤠ ᤋᤧᤴᤗᤠᤣ ॥ ᤜᤧᤰᤁᤧᤸᤗᤧ ᤁᤴ ᤋᤧᤴᤏᤡᤴ ᤐᤏᤠᤣᤒᤠ ᤆᤠᤣᤁ᤻ᤁᤡ ᤋᤠᤱᤛᤧᤵ ᤔᤧᤵᤔᤠ ᤁᤧᤖᤧᤰᤗᤧ ᤕᤠᤔ᤻ᤒᤰᤗᤠᤣ ॥
ᤔᤢᤰᤁᤢᤶᤗᤢᤱ ᤋᤠᤱᤛᤧᤐ᤻ ᤜᤣᤁ᤻ᤕᤠᤔ᤻ᤒᤠ ᤗᤰᤗᤠᤣᤒᤠᤖᤧ ᤌᤰᤔᤣᤐᤠ ᥉᥇ ᤏᤢ ᥉᥈ ᤀᤠᤣ ᤐᤕᤶᤃᤧᤴ ᤛᤡᤱᤛᤠ᤺ᤗᤣᤐ᤻ᤔᤠ ᤌᤡᤶᤒᤣ᤹ ᤜᤣᤁ᤻ᤛᤡᤱ ᤐᤠᤣᤂᤠᤀᤠᤱ ᤘᤠ ॥ ᤛᤡᤱᤛᤠ᤺ᤀᤠᤣ ᤕᤁ᤻ᤐᤖᤡᤰᤐᤠ ᤗᤣᤇᤡᤱ ᤐᤠᤣᤅ᤻ᤗ ᤘᤠ ॥ ᤕᤁ᤻ ᤐᤖᤡᤰᤐᤠ ᤎᤡᤐ᤻. ᤆᤡᤔᤗ. ᤖᤠᤤᤋ᤻. ᤀᤠᤱ. ᤆᤠᤐ᤻ ᤀᤠᤱᤘᤣ᤹ ᤐᤠᤜᤧᤴ ᤋᤧᤴᤀᤠᤣ ᤁᤧᤏᤢ᤹ᤒᤠ ᤛᤡᤱᤛᤠ᤺ᤜᤠ᤹ ᤗᤣᤇᤡᤱ ᤐᤠᤣᤅ᤻ᤗ ᤘᤠᤒᤠ ॥ ᤛᤡᤱᤛᤠ᤺ᤜᤠ᤹ ᤗᤰᤗᤠᤣᤒᤠ ᤂᤃᤧᤴᤍᤪ ᤑᤧᤶᤒᤢᤖᤧ ᤐᤠᤋᤢᤒᤠ ᤀᤡᤛᤡᤰ ᤛᤡᤱᤛᤠ᤺ᤜᤠ᤹ ᤏᤷᤛᤖᤡ ᤌᤢᤶᤁᤠ᤹ᤋᤱᤅᤡᤒᤠ ᤋᤠᤶᤓᤢᤱ ᤛᤜᤠᤱᤕᤢᤰᤗᤠᤶᤒᤠ ᤀᤡᤅᤠᤀᤠᤱ ᤛᤡᤱᤛᤠ᤺ᤗᤣᤐ᤻ᤔᤠ ᤌᤡᤶᤒᤣ᤹ ᤋᤃᤡ ᤐᤠᤣᤖᤘᤠᤒᤠ ᤐᤠᤋᤢᤀᤠᤱ ᤘᤠ ॥
ᤔᤢᤰᤁᤢᤶᤗᤢᤱ ᤛᤣᤘᤠ ᤋᤠᤰᤋᤧᤴ ᤋᤠᤱᤛᤧᤐ᤻ᤔᤠ ᤐᤕᤶ ᤌᤡᤶᤒᤣ᤹ ᤜᤣᤁ᤻ᤕᤠᤔ᤻ᤀᤠᤣ ᤋᤠᤐ᤻ᤗᤣᤈᤢᤱ ᤐᤠᤂᤠᤒᤠ ᤌᤢᤶᤜᤠ᤹ᤀᤠᤣ ᤐᤠᤴᤌᤖ. ᤀᤡᤗᤠᤶ. ᤈᤠᤐᤠ. ᤔᤠᤣᤖᤅ᤻. ᤛᤢᤴᤛᤖᤡ. ᤎᤴᤁᤢᤋᤠ. ᤋᤣᤖᤌᤢᤶ ᤗᤰᤔᤧᤴᤏᤠᤱ ᤘᤣ᤹ᤋᤧᤴᤏᤢᤀᤠᤱ ᤔᤧᤈᤢᤵᤛᤧᤀᤠᤱ ᤔᤧᤘᤠᤒᤠ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤌᤠᤣᤛᤢᤍᤡᤶᤒᤠ ᤐᤪᤣᤔ᤻ ᤕᤧᤁ᤻ᤋᤧᤴᤖᤧ ᤐᤠᤋᤢᤀᤠᤱ ᤘᤠ ॥
ᤔᤢᤰᤁᤢᤶᤗᤢᤱ ᤋᤠᤱᤛᤧᤐ᤻ᤖᤧ ᤁᤴ ᤐᤕᤶᤃᤧᤴ ᤌᤡᤶᤒᤣ᤹ ᤜᤣᤁ᤻ᤕᤠᤔ᤻ᤔᤡᤴ ᤔᤠᤱᤛᤣᤘᤠ. ᤕᤰᤘᤠ ᤛᤣᤘᤠ ᤆᤠᤣᤁ᤻ᤁᤡ ᤁᤢᤜᤣᤁ᤻ᤛᤡᤱ ᤘᤠᤂᤠᤀᤠᤱ ᤘᤕᤠ ॥ ᤁᤴ ᤛᤡᤱᤛᤠ᤺ᤗᤣᤐ᤻ᤔᤠ ᤌᤡᤶᤒᤣ᤹ᤀᤡᤴ ᤆᤰᤔᤧᤶᤒᤢ᤹ᤒᤠ ᤌᤰᤔᤣᤐᤠ ᥇᥋ ᤌᤠᤖᤡᤰ ᤔᤧᤴᤍᤱᤍᤱ ᤐᤠᤣᤅ᤻ᤒᤠ ॥ ᤁᤴ ᤐᤏᤠᤣᤒᤠ ᤕᤠᤱᤏᤡᤶ ᤏᤢ ᤛᤣᤘᤠ ᤋᤠᤰᤋᤧᤴ ᤋᤠᤱᤛᤧᤐ᤻ᤔᤠ ᤌᤡᤶᤒᤣ᤹ᤀᤠᤣ ᤁᤧᤖᤧᤰᤁᤠᤣ ᤀᤢᤴᤏᤡᤱ ᤐᤣᤗᤡ ᤜᤣᤁ᤻ᤕᤠᤔ᤻ᤒᤠᤖᤧ ᤔᤧᤈᤠᤣᤃᤢᤀᤠᤱ ᤘᤠ ॥
ᤁᤢᤓᤠ᤹ ᤕᤠᤵᤔᤡᤖᤧ ᤑᤠ᤹ᤍᤠᤖᤧ ᤑᤠ᤹ᤀᤠᤱ ᤕᤢᤰᤑᤠᤣ ᤑᤢᤱ ᤕᤢᤰᤑᤠᤣᤖᤧᤀᤣ ᤗᤧᤅ᤻ᤔᤠ ᤐᤠᤱᤄᤢᤛᤡᤒᤠ ᤀᤰᤋᤶᤒᤠ ᤕᤔ᤻ᤒᤰᤁᤠᤣ ᤗᤧᤵᤔᤡ ᤘᤠᤒᤠ ॥ ᤁᤖ ᤕᤢᤰᤑᤠᤣ ᤌᤰᤛᤠ ᤐᤡᤳ / ᤐᤡᤳᤐᤠ ᤛᤧᤵᤔᤠᤛᤡᤸᤗᤧ ᤕᤢᤰᤑᤠᤣᤖᤧᤀᤣ ᤆᤡᤛᤠᤰ ᤀᤠᤔᤧᤵᤐᤠ ॥ ᤁᤴ ᤀᤠᤰᤋᤶᤒᤠ ᤃᤏᤋᤴᤋᤪ. ᤀᤠᤰᤋᤶᤒᤠ ᤎᤷᤔ ᤏᤡᤖᤐᤣᤇ᤻ᤕᤒᤠ ॥ ᤛᤡᤔᤡᤁ᤻ᤗᤢᤱ ᤀᤠᤳᤋᤠᤣ᤹ᤀᤠᤱ ᤔᤧᤴᤘᤠᤏᤠᤒᤠ ᤂᤠᤗᤠᤣᤏ᤻ ᤏᤧᤐᤠᤗᤀᤠᤣᤖᤰ ᤘᤠᤒᤠ ॥
